ວັນທີ 19 ຕຸລາ 2022 ທີ່ນະຄອນຫຼວງວຽງຈັນ ຄະນະຮັບຜິດຊອບຈັດງານປະເພນີບຸນນະມັດສະການພຣະທາດຫຼວງວຽງຈັນ ປະຈໍາປີ 2022 ໄດ້ຖະແຫຼງຂ່າວກ່ຽວກັບການກະກຽມງານບຸນຣພະທາດຫຼວງວຽງຈັນ ເປັນກຽດຖະແຫຼງໂດຍທ່ານ ຖະໜອມ ທໍາທອງ ປະທານແນວລາວສ້າງຊາດ ນະຄອນຫຼວງວຽງຈັນ (ນວ), ທ່ານນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວ ນວ, ທ່ານນາງ ວັນມະນີ ພິມມະສານ ຫົວໜ້າພະແນກອຸດສາຫະກໍາ ແລະ ການຄ້າ ນວ, ທ່ານ ພົນຈັດຕະວາ ບົວພັນ ຟອງມະນີ ຫົວໜ້າກອງບັນຊາການປ້ອງກັນຄວາມສະຫງົບ ນວ ແລະ ທ່ານ ຄໍາສະຫວັນ ໂຄດໄຊ ຮອງເຈົ້າເມືອງໄຊເສດຖາ, ມີຫົວໜ້າ, ຮອງຫົວໜ້າພະແນກຂະແໜງກ່ຽວຂ້ອງ ແລະຫົວໜ່ວຍທຸລະກິດເຂົ້າຮ່ວມ.
ທ່ານ ຖະໜອມ ທໍາທອງ ກ່າວວ່າ: ການຈັດງານຄັ້ງນີ້ ເພື່ອອະນຸລັກຮັກສາ ແລະສົ່ງເສີມວັດທະນະທຳຮີດຄອງປະເພນີອັນດີງາມຂອງບຸນນະມັດສະການພຣະທາດຫຼວງຂອງຊາວລາວກໍຄືຊາວ ນະຄອນຫຼວງວຽງຈັນ ທີ່ເຄີຍສືບທອດກັນມາແຕ່ບູຮານນະການໃຫ້ມີຄວາມໂດດເດັ່ນ ແລະເປັນທີ່ຮັບຮູ້ໃນເວທີສາກົນ ທັງເປັນການສ້າງໂອກາດໃນການຈັດຕັ້ງປະຕິບັດ 2 ວາລະແຫ່ງຊາດກໍ່ຄືການຟື້ນຟູເສດຖະກິດດ້ວຍຮູບການຊຸກຍູ້ສົ່ງເສີ່ມການທ່ອງທ່ຽວສົ່ງເສີ່ມການຄ້າ ສິນຄ້າຄອບຄົວຕົວແບບທີ່ຈະກ້າວເປັນສິນຄ້າໂອດ໋ອບທີ່ໄດ້ກາໝາຍແຫ່ງຊາດ ແລະສິນຄ້າຂອງບັນດາວິສາຫະກິດຂະໜາດນ້ອຍ ແລະກາງໄດ້ມາວາງສະແດງ ຈຳໜ່າຍສິນຄ້າທັງພາຍໃນ ແລະຕ່າງປະເທດໃຫ້ປະຊາຊົນຊາວ ນວ ຕະຫຼອດຮອດແຂກຕ່າງປະເທດໄດ້ເຫັນ ແລະໄດ້ຊົມໃຊ້ສິນຄ້າພ້ອມທັງເປັນການແລກປ່ຽນບົດຮຽນປະສົບການຕ່າງໆຂອງບັນດາຫົວໜ່ວຍທຸລະກິດດ້ວຍກັນ ເຊິ່ງມີຄາດໝາຍເພື່ອຮັບປະກັນຄວາມສະຫງົບຄວາມປອດໄພທາງດ້ານການປ້ອງກັນການລະບາດຂອງພະຍາດໂຄວິດ-19ຄວາມເປັນລະບຽບຮຽບຮ້ອຍແລະສະອາດງາມຕາໃນຂອບເຂດການຈັດງານ ແລະບໍລິເວນໃກ້ຄຽງດຳເນີນບັນດາກິດຈະກຳໃນງານບຸນໃຫ້ຖືກຕ້ອງສອດຄ່ອງທາງດ້ານວັດທະນະທຳຮີດຄອງປະເພນີແລະມີບັນຍາກາດເບີກບານມ່ວນຊື່ນເປັນຜູ້ດຶງດູດໃຈຂອງຜູ້ນມາທ່ຽວຊົມສ້າງໂອກາດໃຫ້ບັນດາຜູ້ປະກອບການທຸລະກິດຈຳໜ່າຍສິນຄ້າໄດ້ມີໂອກາດນຳເອົາສິນຄ້າແລະຜະລິດຕະພັນທີ່ຄ້າງຈຳໜ່າຍໃນຊ່ວງການລະບາດພະຍາດໂຄວິດ-19 ອອກມາຈຳໜ່າຍໃຫ້ພໍ່ແມ່ປະຊາຊົນທີ່ເດີນທາງມາຮ່ວມງານບຸນໄດ້ມີໂອກາດເຂົ້າເຖິງໃນລາຄາທີ່ເໝາະສົມສາມາດຊື້ໄດ້ ແລະເຮັດໃຫ້ມີເງິນໝູນວຽນໃນການວາງສະແດງ ແລະຂາຍສິນຄ້າໃນໂອກາດງານບຸນນະມັດສະການພຣະທາດຫຼວງພາຍຫຼັງທີ່ບໍ່ໄດ້ຈັດງານບຸນໃຫຍ່ດັ່ງກ່າວມາເປັນເວລາ 2 ປີ.
ເພື່ອບໍ່ໃຫ້ມີການແອອັດ ຄະນະຮັບຜິດຊອບຈັດງານບຸນ ໄດ້ກໍານົດການຈັດງານຢູ່ສູນການຄ້າລາວ-ໄອເຕັກເລີ່ມແຕ່ວັນທີ 2-8 ພະຈິກ ມີຈຳນວນບູດໄວ້ຮອງຮັບ 488 ບູດ. ສໍາລັບ ທີ່ເດີ່ນທາດຫຼວງ ແລະເດີ່ນສະໜາມຫຼວງປະກອບມີການວາງສະແດງ, ການທ່ອງທ່ຽວນະວັດຕະກຳໃໝ່, ທາງລົດໄຟຄວາມໄວສູງ, ເຂດໂລຈິດສະຕິກ, ທາງດ່ວນ, ຮ້ານວາງສະແດງສິນຄ້າຈາກສສຫວຽດນາມ (ຮ່າໂນ້ຍໂຮ່ຈີ່ມິນຢ່າຈາງ), ສິນຄ້າໂອດ໋ອບ, ສິນຄ້າຄອບຄົວຕົວແບບ, ສິນຄ້າຜະລິດຕະພັນພາຍໃນ ແລະວາງສະແດງສິນຄ້າປະເທດທ່ອງທ່ຽວຄາດຄະເນລວມ 215 ຫ້ອງສິນຄ້າປະເພດ: ບໍລິສັດຂາເຂົ້າ-ຂາອອກເສື້ອຜ້າສິນຄ້າທົ່ວໄປແລະເຄື່ອງຫຼິ້ນຈຳນວນ 669 ຫ້ອງປະເພດອາຫານແລະເຄື່ອງດື່ມເຂົ້າຫຼາມປີ້ງໄກ່ຢູ່ເຂດຮອບນອກ 134 ຫ້ອງລວມທັງໝົດມີປະມານ 1.018 ຫ້ອງ.
ຈັດງານບຸນນະມັດສະການພຣະທາດຫຼວງປີນີ້ໄດ້ກຳນົດ 5 ວັນ ເຊິາງເລີ່ມແຕ່ວັນທີ 4-8 ພະຈິກ 2022 ລາຍລະອຽດມີຄື: ວັນທີ4 ພະຈິກເວລາ 16:30 ໂມງເປັນມື້ເລີ່ມງານບຸນປະເພນີວັນທີ 6 ພະຈິກເວລາ 16:00 ໂມງພິທີສູດປະລິຕະມຸງຄຸນທີ່ພຣະທາດຫຼວງວັນທີ 7 ພະຈິກເວລາ 13:30 ໂມງພິທີແຫ່ຜາສາດເຜິ້ງວັນທີ 8 ພະຈິກເວລາ 7:00 ໂມງພິທີໃສ່ບາດຖວາຍສັງກະທານເວລາ 13:00 ໂມງພິທີແຫ່ລູກຄີແລະການແຂ່ງຈັນກິລາພື້ນບ້ານຕີຄີເວລາ 19:00 ໂມງພິທີວຽນທຽນແລະຈູດທູບທຽນບັ້ງໄຟສັກກະລະບູຊາອົງພຣະທາດ.
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |