5 ຂັ້ນຕອນຂອງການປູກໝາກນອຍທາງວິຊາການ

   ໝາກນອຍ(ໝາກລອຍ)ເປັນພືດຜັກຕະກຸນເຄືອສາມາດມາປຸງແຕ່ງອາຫານໄດ້ຫຼາກຫຼາຍລາຍການແລະເປັນພືດຜັກທີ່ມີສັບພະຄຸນຕໍ່ຮ່າງກາຍທີ່ສໍາຄັນສາມາດບໍລິໂພກໄດ້ທັງຍອດອ່ອນ,ດອກແລະໝາກ.

  ແຫຼ່ງຂໍ້ມູນຈາກສູນຄົ້ນຄວ້າກະສິກໍາໃຫ້ຮູ້ວ່າ:ການປູກໝາກນອຍຕາມເຕັກນິກທາງວິຊາການລວມ ມີ 5 ຂັ້ນຕອນຄື:ການກຽມດິນ,ການປູກ,ເຮັດຄ້າງ,ບົວລະບັດ ຮັກສາແລະການເກັບກ່ຽວສໍາລັບການກຽມດິນ:ໝາກນອຍເປັນພືດທີ່ມີລະບົບຮາກເລິກປານກາງຄວນຂຸດໄຖດິນເລິກປະມານ 20-25 ຊັງຕີແມັດ,ຕາກດິນໄວ້ປະມານ 5-7 ມື້, ໃສ່ຝຸ່ນຄອກ ຫຼື ຝຸ່ນໝັກທີ່ລະລາຍຕົວດີແລ້ວຄົນໃຫ້ເຂົ້າກັນກັບດິນໂດຍສະເພາະດິນຊາຍແລະດິນໜຽວຕ້ອງໃສ່ໃຫ້ຫຼາຍເພື່ອປັບສະພາບຂອງດິນໃຫ້ດີຂຶ້ນ ແລະເພີ່ມຄວາມອຸດົມສົມບູນ.ຖ້າດິນເປັນກົດຄວນ ໃສ່ປູນຂາວປັບສະພາບຄວາມເປັນ ກົດເປັນດ່າງໃຫ້ຢູ່ໃນລະດັບທີ່ເໝາະສົມພວນດິນໃຫ້ລະອຽດເພື່ອກຽມພ້ອມທີ່ຈະປູກໄດ້.

ສ່ວນການປູກ:ໄລຍະທີ່ເໝາະສົມຄືໄລຍະລະຫວ່າງຕົ້ນ 75 ຊັງ ຕີແມັດ,ໄລຍະລະຫວ່າງແຖວ 100 ຊັງຕີແມັດ.ການປູກແມ່ນໃຫ້ຢອດແກ່ນພັນລົງຂຸມໆລະ 4-5 ເມັດ, ຝັງເລິກລົງດິນປະມານ 2-4 ຊັງຕີແມັດ,ຈາກນັ້ນຖົມແກ່ນດ້ວຍດິນຜຸຍໆ ຫຼື ຝຸ່ນຄອກໜາປະມານ 1 ຊັງຕີແມັດ, ຫົດນ້ຳໃຫ້ຊຸ່ມຢ່າງສະໝໍ່າສະເໝີທຸກມື້ເມື່ອຕົ້ນງອກຂຶ້ນອາຍຸໄດ້ປະມານ 10-15 ມື້ ຫຼື ມີ ໃບແທ້ 2-4 ໃບໃຫ້ແຍກຕົ້ນທີ່ອ່ອນແອ ຫຼື ບໍ່ສົມບູນຖິ້ມໃຫ້ເຫຼືອໄວ້ປະ ມານ 3-4 ຕໍ່ຂຸມ.

   ການເຮັດຄ້າງ: ເມື່ອຕົ້ນໝາກນອຍ ອາຍຸໄດ້ 15-20 ມື້ຄວນເຮັດຄ້າງ ຫຼື ຮ້ານເພື່ອຈະເຮັດໃຫ້ເຄືອໝາກບວບທາວຂຶ້ນໄປເກາະ,ການປູກແບບໃຫ້ເຄືອໝາກນອຍ ທາວໄປຕາມພື້ນດິນໂດຍບໍ່ເຮັດ ຄ້າງ ຫຼື ຮ້ານຈະເຮັດໃຫ້ໝາກນອຍງໍໂຄ້ງ,ມີຮູບຮ່່າງທີ່ບໍ່ງາມ,ບໍ່ເປັນທີ່ນິຍົມຂອງຜູ້ຊື້.ການເຮັດຄ້າງ ຫຼື ຮ້ານໃຫ້ໝາກນອຍມີ 2 ແບບຄື:1) ປັກໄມ້ຄ້າງຍາວ 2-3 ແມັດທຸກຂຸມແລ້ວໂຄ້ງປາຍເຂົ້າຫາກັນມັດຕິດກັນໄວ້ ແລ້ວໃຊ້ໄມ້ຄ້າງພາດຂວາງປະມານ 2-3 ໄລຍະທຸກໆໄລຍະ 0-50 ຊັງຕີແມັດ. 2) ເຮັດເປັນຄ້າງໂດຍໃຊ້ໄມ້ຄ້າງຜູກເປັນຮ້ານສູງປະມານ 1-2 ແມັດ ຫຼື ສູງພໍສົມຄວນທີ່ສະດວກໃນການເຮັດ.ນອກຈາກນີ້ຍັງໃຊ້ຄ້າງແບບທຳມະຊາດທີ່ມີຢູ່ແລ້ວເຊັ່ນ:ໄມ້ພຸ່ມນ້ອຍໆ,ຮົ້ວບ້ານແລະອື່ນໆຊຶ່ງເໝາະສຳລັບການປູກແບບສວນຄົວ.

   ການບົວລະບັດຮັກສາ:ຄວນໃຫ້ນ້ຳຢ່າງສະໝໍ່າສະເໝີບໍ່ຄວນໃຫ້ເຄືອໝານອຍຂາດນ້ຳໃນໄລຍະອອກດອກ ແລະເປັນໝາກເພາະຈະເຮັດໃຫ້ດອກຫຼົ່ນແລະໝາກບໍ່ຕິດລະບົບການໃຫ້ນ້ຳແບບປ່ອຍຕາມຮ່ອງຈະໃຫ້ຜົນດີແລະຫຼີກເວັ້ນການໃຫ້ນ້ຳແບບຝົນຝອຍເພາະຈະເຮັດໃຫ້ເກີດເຊື້ອໂລກທາງໃບ.ສ່ວນການໃສ່ຝຸ່ນໝາກນອຍເປັນພືດກິນໝາກຄວນ ໃຫ້ປຸຍທີ່ມີສັດສ່ວນຂອງທາດໄນໂຕຣເຈນ 1 ສ່ວນ, ຟົດສະຟາດ 1/2-2 ສ່ວນເຊັ່ນ: ປຸຍສູດ 13-13-21 ຫຼື ສູດອື່ນໆທີ່ໃກ້ຄຽງກັນໃນອັດຕາ 32-50 ກິໂລຕໍ່ໄລ່ແລະຄວນໃຫ້ປຸຍໄນໂຕຣເຈນເຊັ່ນ:ປຸຍຢູເຣຍ ຫຼື ແອນໂມເນຍໄນເຕສປະມານ 3-5 ກິໂລຕໍ່ໄລ່ເພື່ອຊ່ວຍເລ່ງການຈະເລີນເຕີບໂຕໃນໄລຍະທຳອິດ.ການໃສ່ປຸຍຄວນແບ່ງເປັນ 2 ຄັ້ງຄື:ໃສ່ຄັ້ງທຳອິດໃນຕອນປູກແບບຮອງພື້ນແລ້ວພວນ ດິນຖົມແລະໃສ່ຄັ້ງທີ່ສອງເມື່ອເຄືອໝາກນອຍມີອາຍຸປະມານ 20-30 ມື້ ໂດຍໃສ່ແບບໂຮຍອ້ອມຂ້າງແລ້ວພວນດິນຖົມການໃສ່ປຸຍໄນໂຕຣເຈນຄວນໃສ່ພຽງຄັ້ງດຽວແບບໂຮຍອ້ອມຂ້າງເມື່ອເຄືອໝາກນອຍມີອາຍຸປະມານ 7-10 ມື້.

  ສະເພາະການເກັບກ່ຽວ:ອາຍຸການເກັບກ່ຽວຂອງໝາກນອຍແມ່ນປະມານ 45-60 ມື້ ຫຼັງຈາກປົ່ງຍອດທຳອິດຄວນເກັບເອົາໝາກທີ່ຍັງອ່ອນເພາະເນື້ອຈະອ່ອນນຸ້ມໄດ້ຂະໜາດພໍດີງາມຊຶ່ງໝາກຈະມີຂະໜາດຍາວປະມານ 15-20 ຊັງຕີແມັດຄວນເກັບກ່ອນທີ່ໝາກຈະແກ່ບໍ່ຄວນປະໃຫ້ໝາກແກ່ຄາເຄືອເພາະຈະເຮັດໃຫ້ຜົນຜະລິດຕໍ່າລົງ.

แชร์