ສະເຫຼີມສະຫຼອງວັນຂົງຈືໂລກ ເພື່ອຮັດແໜ້ນສາຍສຳພັນ-ເຊື່ອມຕໍ່ຄວາມຝັນ

ສະຖາບັນຂົງຈື ມະຫາວິທະຍາໄລແຫ່ງຊາດ ໄດ້ຈັດພິທີສະເຫຼີມສະຫຼອງວັນຂົງຈືໂລກໃນຫົວຂໍ້ ຮັດແໜ້ນສາຍສຳພັນ-ເຊື່ອມຕໍ່ຄວາມຝັນ ຂຶ້ນໃນວັນທີ 19 ຕຸລາ 2022 ທີ່ສະຖາບັນຂົງຈື ມະຫາວິທະຍາໄລແຫ່ງຊາດ ໂດຍມີ ທ່ານ ສຸລິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະກິລາ, ທ່ານ ຈ່ຽງຈ້າຍຕົ່ງ ເອກະອັກຄະລັດຖະທູດຜູ້ມີອຳນາດເຕັມແຫ່ງ ສປ ຈີນ ປະຈຳ ສປປ ລາວ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

ໂອກາດນີ້, ທ່ານ ຫຼົວໝິງ ຜູ້ອຳນວຍການສະຖາບັນຂົງຈື ມະຫາວິທະຍາໄລແຫ່ງຊາດຝ່າຍຈີນ ໄດ້ກ່າວວ່າ: ການສະເຫຼີມສະຫຼອງ “ວັນສະຖາບັນຂົງຈື ແລະພິທີເປີດສົກຮຽນໃໝ່ຫຼັກສູດປະລິນຍາຕີຄູພາສາຈີນກໍຄືການສ້າງຕັ້ງສະຖາບັນຂົງຈືຢູ່ມະຫາວິທະຍາໄລແຫ່ງຊາດລາວຄົບຮອບ 12 ປີ ຊຶ່ງມີຄວາມໝາຍອັນເລິກເຊິ່ງ. ຕັ້ງແຕ່ປີ 2004 ທີ່ສະຖາບັນຂົງຈືແຫ່ງທຳອິດໄດ້ຮັບການສ້າງຕັ້ງຂຶ້ນຢູ່ນະຄອນໂຊນ ສ ເກົາຫຼີ ເປັນຕົ້ນມາປັດຈຸບັນມີສະຖາບັນຂົງຈື 550 ແຫ່ງ ແລະຫ້ອງຮຽນ 1.172 ຫ້ອງໄດ້ຮັບການສ້າງຕັ້ງຂຶ້ນຢູ່ໃນ 162 ປະເທດທົ່ວໂລກ (ເຂດແຄ້ວນ), ໂດຍທີ່ຮູ້ກັນທົ່ວໄປແລ້ວວ່າສະຖາບັນຂົງຈືແມ່ນອົງການຈັດຕັ້ງການສຶກສາທີ່ບໍ່ຫວັງຜົນກຳໄລ ທີ່ສ້າງຕັ້ງຂຶ້ນໃນຮູບແບບຝ່າຍຈີນຮ່ວມມືກັບຝ່າຍຕ່າງປະເທດໂດຍແນໃສ່ເຜີຍແຜ່ພາສາຈີນ ແລະຊຸກຍູ້ໃຫ້ປະຊາຊົນທົ່ວໂລກໄດ້ເຂົ້າເຖິງພາສາ-ວັດທະນະທໍາຈີນ, ສົ່ງເສີມການແລກປ່ຽນວັນນະຄະດີລະຫວ່າງຈີນກັບຕ່າງປະເທດ ແລະເພີ່ມພູນຄວາມເຂົ້າໃຈກັນລະຫວ່າງຊາດ.

ພາຍຫຼັງທີ່ໄດ້ສ້າງຕັ້ງຂຶ້ນ 12 ປີຜ່ານມາສະຖາບັນຂົງຈືຢູ່ມະຫາວິທະຍາໄລແຫ່ງຊາດລາວພາຍໃຕ້ຄວາມເອົາໃຈໃສ່ ແລະການສະໜັບສະໜູນຈາກລັດຖະບານຈີນ ແລະ ລາວ ໄດ້ຕັ້ງໜ້າຮອງຮັບເອົາຂໍ້ລິເລີ່ມ “ໜຶ່ງແລວທາງໜຶ່ງເສັ້ນທາງ” ແລະ ປະຕິບັດຕາມແຜນການເຄື່ອນໄຫວປະຊາຄົມຮ່ວມຊາຕາກຳຈີນ-ລາວ ໂດຍມີຈຸດປະສົງ ເພື່ອແລກປ່ຽນວັດທະນະທຳ ແລະເຮັດໃຫ້ປະຊາຊົນເຂົ້າໃຈຊຶ່ງກັນ ແລະກັນ ໂດຍຜ່ານພາສາຈີນ ໃນຮູບແບບທີ່ສາມາດນຳໃຊ້ທ່າແຮງຂອງຕົນເປັນຕົ້ນ: ຈັດການຮຽນ-ການສອນພາສາຈີນ ແລະກິດຈະກໍາການແລກປ່ຽນວັດທະນະທໍາຈີນ-ລາວ ເພື່ອສ້າງສະຖາບັນຂົງຈືໃຫ້ມີແນວຄວາມຄິດຄຸນຄ່າຮ່ວມກັນມີມາດຕະຖານການສິດສອນທີ່ຈະແຈ້ງ ແລະສາມາດສະໜອງການບໍລິການສິດສອນພາສາຈີນທີ່ມີຄຸນນະພາບ, ສະຖາບັນຂົງຈືພວກເຮົາໄດ້ມີບົດບາດສໍາຄັນໃນການສ້າງບຸກຄະລາກອນພາສາຈີນຄົນທ້ອງຖິ່ນ, ການແລກປ່ຽນວັດທະນະທຳຈີນ-ລາວ ກໍຄືການສົ່ງເສີມສາຍພົວພັນມິດຕະພາບຈີນ-ລາວໃຫ້ມີການພັດທະນາຈົນໄດ້ກາຍມາເປັນເວທີການສິດສອນພາສາຈີນ,ເວທີການແລກປ່ຽນວັນນະຄະດີ, ເວທີສຳພັນທະໄມຕີຈີນ-ລາວ ຊຶ່ງເປັນແບບຢ່າງອັນໜຶ່ງທາງດ້ານການແລກປ່ຽນວັດທະນະທຳລາວ-ຈີນ.

ທ່ານ ຄຳຮຸ່ງ ຈັນທະວົງ ຜູ້ອຳນວຍການສະຖາບັນຂົງຈື ມະຫາວິທະຍາໄລແຫ່ງຊາດຝ່າຍລາວ ໄດ້ເວົ້າວ່າ: ປັດຈຸບັນສະຖາບັນຂົງຈືມີຫ້ອງຮຽນຂົງຈືທີ່ຂຶ້ນກັບມີ 5 ແຫ່ງຄື: ຫ້ອງຮຽນຂົງຈື ມ.ສ ສາທິດ, ມ.ສ ວຽງຈັນ, ໂຮງຮຽນຊົນເຜົ່າກິນນອນວັງວຽງ, ສະຖາບັນການເມືອງ-ການປົກຄອງແຫ່ງຊາດ ແລະວິທະຍຸກະຈາຍສຽງແຫ່ງຊາດ ແລະປັດຈຸບັນຢູ່ສະຖາບັນຂົງຈືມີນັກສຶກສາທັງໝົດ 900 ກວ່າຄົນ ມີ 25 ຫ້ອງ. ແລະ ແຜນການຈັດຕັ້ງປະຕິບັດວຽກງານປະຈຳປີ 2022-2023 ແມ່ນຈະສືບຕໍ່ເປັນເສນາທິການໃຫ້ແກ່ມະຫາວິທະຍາໄລແຫ່ງຊາດ,ຍາດແຍ່ງການຮ່ວມມື ແລະຊ່ວຍເຫຼືອຈາກຄູ່ຮ່ວມມືກໍຄືມະຫາວິທະຍາໄລຊົນເຜົ່າກວາງຊີກໍຄືສູນຮ່ວມມືແລກປ່ຽນພາສາຈີນ-ພາສາຕ່າງປະເທດ ແຫ່ງຊາດຈີນ.

ໃນພີທີດັ່ງກ່າວຍັງໄດ້ມອບໃບຍ້ອງຍໍຂັ້ນມະຫາວິທະຍາໄລແຫ່ງຊາດ ມີຈຳນວນ 9 ຄົນ ແລະຂັ້ນກະຊວງໃຫ້ແກ່ພະນັກງານ ຄູ-ອາຈານ ແລະອາສາສະໝັກທັງລາວ-ຈີນ ແລະຍັງໄດ້ມີພິທີເຊັນສັນຍາສືບຕໍ່ມອບທຶນການສຶກສາທຸກຍາກຂອງທະນາຄານລາວ-ຈີນ ໃຫ້ແກ່ສະຖາບັນຂົງຈືຕື່ມອິກ.
ຂ່າວ: ບຸນຕອມ, ພາບ: ວັນເພັງ.

แชร์