ແລກປ່ຽນບົດຮຽນການຈັດຕັ້ງປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ

ໃນວັນທີ 18-21 ຕຸລາ 2022 ທີ່ນະຄອນຫຼວງວຽງຈັນ, ກົມເສດຖະກິດ ກະຊວງການຕ່າງປະເທດ ໄດ້ເປັນເຈົ້າພາບຈັດກອງປະຊຸມສຳມະນາສາກົນ ໃນຫົວຂໍ້: “ ການແລກປ່ຽນບົດຮຽນໃນການຈັດຕັ້ງປະຕິບັດຂໍ້ລິເລີ່ມ ໜື່ງແລວ ໜຶ່ງເສັ້ນທາງ ຂອງບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງ” ໃນຮູບແບບຊຶ່ງໜ້າ ແລະທາງໄກ, ໂດຍການເປັນປະທານຂອງ ທ່ານ ກິ່ງໂພແກ້ວ ພົມມະຫາໄຊ ຫົວໜ້າກົມເສດຖະກິດ ກະຊວງການຕ່າງປະເທດ. ກອງປະຊຸມຄັ້ງນີ້ ມີຜູ້ຕາງ ໜ້າຈາກພາກລັດ ແລະ ພາກທຸລະກິດຂອງປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ຄື: ສປປ ລາວ, ສປ ຈີນ, ກຳປຸເຈຍ, ມຽນມາ, ໄທ ແລະ ສສ ຫວຽດນາມ ເຂົ້າຮ່ວມ. ກອງປະຊຸມສໍາມະນາດັ່ງກ່າວແມ່ນໄດ້ຮັບການສະໜັບສະໜູນຈາກກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ.

ຈຸດປະສົງແມ່ນເພື່ອແລກປ່ຽນບົດຮຽນ ແລະປະສົບການກ່ຽວກັບການຈັດຕັ້ງປະຕິບັດວຽກງານການຮ່ວມມືພາຍໃຕ້ຂໍ້ລິເລີ່ມໜຶ່ງແລວໜຶ່ງເສັ້ນທາງຂອງບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ໃນໄລຍະຜ່ານມາລວມທັງແລກປ່ຽນຄໍາຄິດຄໍາເຫັນໃນການຮ່ວມມືກັນໃນອະນາຄົດ. ຜູ້ເຂົ້າຮ່ວມໄດ້ມີການແລກປ່ຽນຄໍາຄິດຄໍາເຫັນ, ຂໍ້ມູນຂ່າວສານກ່ຽວກັບທ່າແຮງບົ່ມຊ້ອນ ແລະວຽກງານຈຸດສຸມໃນການພັດທະນາເສດຖະກິດ-ສັງຄົມ ຂອງປະເທດຕົນໂດຍສະເພາະວຽກງານການເຊື່ອມໂຍງ-ເຊື່ອມຈອດດ້ານພື້ນຖານໂຄງລ່າງ, ດ້ານເສດຖະກິດ, ການຄ້າ, ການລົງທຶນ ແລະການເຊື່ອມຈອດລະຫວ່າງປະຊາຊົນກັບປະຊາຊົນໃນບັນດາປະເທດລຸ່ມແມ່ນໍ້າຂອງ ຕາມແລວເສດຖະກິດຈີນ-ອິນໂດຊາຍນາ ຊຶ່ງເປັນໜຶ່ງໃນ 6 ແລວເສດຖະກິດສຳຄັນຂອງການຮ່ວມມື ໜຶ່ງແລວ ໜຶ່ງເສັ້ນທາງ.

ກອງປະຊຸມສໍາມະນາຄັ້ງນີ້ໄດ້ດໍາເນີນໄປດ້ວຍບັນຍາກາດທີ່ດີມີການແລກປ່ຽນບົດຮຽນ, ປະສົບການ ແລະ ຄໍາຄິດເຫັນຢ່າງກົງໄປກົງມາກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກລວມທັງບັນດາຂໍ້ສະເໜີແນະໃນການຈັດຕັ້ງປະຕິບັດວຽກງານການຮ່ວມມືດັ່ງກ່າວໃນຕໍ່ໜ້າແນໃສ່ຂົນຂວາຍກຳລັງແຮງ ແລະຍາດແຍ່ງເອົາຜົນປະໂຫຍດດ້ານຕ່າງໆ ໂດຍສະເພາະການພັດທະນາດ້ານເສດຖະກິດ-ສັງຄົມ, ຄວາມຮູ້ດ້ານເຕັກນິກວິທະຍາສາດ ແລະ ການພັດທະນາພື້ນຖານໂຄງລ່າງເພື່ອຍາດແຍ່ງຜົນປະໂຫຍດຕົວຈິງມາສູ່ປະຊາຊົນ ຂອງປະເທດແມ່ນໍ້າຂອງກໍຄືໃນພາກພື້ນ ແລະສາກົນ. ນອກຈາກນັ້ນ,ບັນດາຜູ້ເຂົ້າຮ່ວມກອງປະຊຸມສຳມະນາຈາກບັນດາປະເທດແມ່ນໍ້າຂອງຍັງໄດ້ໄປທັດສະນະສຶກສາ ແລະຢ້ຽມຊົມສະຖານທີ່ຕ່າງໆໃນການອຳນວຍຄວາມສະດວກດ້ານການຄ້າ, ການລົງທຶນ ແລະການເຊື່ອມຈອດໂລຈິສຕິກ ຂອງ ສປປ ລາວ ເຊັ່ນ: ເຂດພັດທະນາກວມລວມໄຊເສດຖາ, ເຂດໂລຈິສຕິກນະຄອນຫຼວງວຽງຈັນ ແລະອື່ນໆ.
ຂ່າວ: ກະຊວງການຕ່າງປະເທດ

แชร์