ສົ່ງເສີມການພັດທະນາວິຊາຊີບຄູ ຜ່ານສາລະຄະດີຄູຕົວແບບໃໝ່

ເມື່ອບໍ່ດົນມານີ້, ທີມງານໂທລະພາບ, ວິທະຍຸ ແລະ ໜັງສືພິມ ຈາກສູນໂຄສະນາຂ່າວສານການສຶກສາ ແລະກິລາ, ກະຊວງສຶກສາທິການ ແລະກິລາ ໄດ້ສ້າງວິດີໂອທີ 3 ຂອງສາລະຄະດີ ຄູຕົວແບບໃໝ່ໂດຍໄດ້ສຳພາດ ທ່ານ ອາຈານ ໂພທອງ ພົງສົງຄາມ ກ່ຽວກັບຄວາມສຳຄັນຂອງການສະໜັບສະໜູນການພັດທະນາວິຊາຊີບຄູຊຶ່ງເປັນໜຶ່ງໃນຄູຕົວແບບໃໝ່ ແລະເປັນຄູຝຶກຜູ້ດຸໝັ່ນຈາກແຂວງສາລະວັນ ທີ່ໄດ້ອຸທິດຕົນເພື່ອວຽກງານດັ່ງກ່າວ. ພ້ອມທັງເປັນຜູ້ໜຶ່ງທີ່ໄດ້ເຂົ້າຮ່ວມການເປັນຄູຝຶກຫລັກແຫລ່ງ ແລະເປັນຄູຝຶກຂັ້ນແຂວງເຊິ່ງໄດ້ຝຶກອົບຮົມຄູໃນຫລັກສູດໃໝ່ທັງຕິດຕາມ ແລະຊ່ວຍເຫຼືອຄູຕະຫຼອດໄລຍະຂອງສົກຮຽນ.

ໂອກາກນີ້, ອາຈານ ໂພທອງ ໄດ້ກ່າວວ່າ: ຂ້າພະເຈົ້າເຫັນວ່າສິ່ງທີ່ໜ້າປະທັບໃຈທີ່ສຸດໃນຫລັກສູດສະບັບປັບປຸງໃໝ່ນີ້ຊຶ່ງເປັນວິທີການສອນ ແລະການຮຽນຮູ້ແບບໃໝ່. ຫລັກສູດໃໝ່ນີ້ເຫັນວ່າແທດເໝາະກັບເດັກນ້ອຍທຸກຄົນຫລາຍຂຶ້ນ ແລະ ເດັກນ້ອຍທຸກຄົນມີໂອກາດເຂົ້າຮ່ວມໄດ້. ການຝຶກອົບຮົມ ແລະການຊ່ວຍເຫລືອຄູໃນໄລຍະຂອງພາກຮຽນ ແມ່ນມີຄວາມສຳຄັນຫຼາຍເພື່ອຮັບປະກັນການສິດສອນທີ່ດີ ແລະໝາກຜົນທີ່ເຫັນໄດ້ກໍແມ່ນຜົນການຮຽນຂອງນັກຮຽນທີ່ດີຂຶ້ນ. ພ້ອມນີ້, ຄູນິເທດມີບົດບາດເພື່ອສະໜັບສະໜູນຄູດ້ວຍການແນະນຳເຕັກນິກໃໝ່ ແລະຊ່ວຍເຂົາເຈົ້າແກ້ໄຂບັນຫາທີ່ໄດ້ພົບພໍ້ໃຫ້ທັນເວລາ.

ສຳລັບ ເຄື່ອງມືທີ່ຂ້າພະເຈົ້າໃຊ້ຫລາຍທີ່ສຸດໃນລະຫວ່າງການຢ້ຽມຢາມແມ່ນການສັງເກດໃນຫ້ອງຮຽນ, ການວາງແຜນການສອນ ແລະການສອນຮ່ວມກັນທັງນີ້ວິທີ ການສັງເກດການໃນຫ້ອງຮຽນຊ່ວຍໃຫ້ຮູ້ວ່າຈຸດໃດທີ່ຄູຕ້ອງການຊ່ວຍເຫຼືອເພີ່ມຕື່ມ. ເມື່ອຮູ້ບັນຫາ, ກໍ່ຈະສາມາດໃຫ້ຄຳແນະນຳໄດ້. ຂ້າພະເຈົ້າຍັງໄດ້ຊ່ວຍເຫຼືອຄູວາງແຜນບົດສອນຂອງຕົນ ແລະນຳເອົາແນວຄິດການຮຽນດ້ວຍການປະຕິບັດຕົວຈິງມານຳໃຊ້ໃນຫ້ອງຢ່າງມີປະສິດທິຜົນ.

ທ່ານ ໂພທອງ ໄດ້ກ່າວຕື່ມວ່າ: ກຸ່ມວັອດແອັບແມ່ນສຳຄັນຫລາຍສຳລັບການຕິດຕາມຫລັງການໄປຢ້ຽມຢາມໂຮງຮຽນ ແລະສຳລັບໂຮງຮຽນທີ່ຢູ່ຫ່າງໄກສອກຫລີກທີ່ຍາກໃນການເດີນທາງໄປຢ້ຽມຢາມໄດ້ເລື້ອຍໆ. ຄູສາມາດສົ່ງຄໍາຖາມຂອງເຂົາໄປຍັງກຸ່ມ ແລະຂ້າພະເຈົ້າກໍສາມາດໃຫ້ຄໍາແນະນໍາຕາມປະສົບການຂອງຕົນ ຫຼື ອາດແນະນໍາໃຫ້ເບິ່ງໜຶ່ງໃນວິດີໂອສຳລັບການພັດທະນາຄູທີ່ມີທາງຊ່ອງຢູທູບ. ມາຮອດປັດຈຸບັນນີ້ພວກເຮົາໄດ້ສ້າງບົດຮຽນທັງໝົດ 8 ບົດແລ້ວ. ຊຸດອຸປະກອນຊ່ວຍເຫຼືອຄູແມ່ນໄດ້ຖືກນຳໃຊ້ໂດຍຄູນິເທດ ດຍສະເພາະແມ່ນຄູຝຶກຂັ້ນແຂວງ. ອຸປະກອນຊ່ວຍເຫຼືອຄູແມ່ນເອກະສານແຍກອິດສະຫລະການຝຶກອົບຮົມແມ່ນກ່ຽວກັບການແກ້ໄຂບັນຫາທີ່ຄູປະຈຳການມັກຈະພົບພໍ້ ເຊັ່ນ ການບໍລິຫານຫ້ອງຮຽນ, ການເຮັດກິດຈະກຳເປັນຄູ່ ຫລືເປັນກຸ່ມ. ຊຸດອຸປະກອນຊ່ວຍເຫລືອຄູແມ່ນປະກອບມີຮູບພາບຂອງຫ້ອງຮຽນໃນລາວເພື່ອຊ່ວຍໃຫ້ຄູຝຶກ, ຄູຝຶກຫຼັກແຫຼ່ງ ແລະຄູປະຈໍາການສາມາດຈິນຕະນາການການສອນໃນສະພາບແວດລ້ອມຕົວຈິງ.

ໂຄງການສາລະຄະດີຄູຕົວແບບໃໝ່ໄດ້ຮັບການສະໜັບສະໜູນຈາກລັດຖະບານອົດສະຕຣາລີໂດຍຜ່ານແຜນງານບີຄວາ ງມີຈຸດປະສົງເພື່ອສົ່ງເສີມ ແລະຊຸກຍູ້ໃຫ້ມີການຖອດຖອນບົດຮຽນຂອງການປະຕິບັດການສອນທີ່ດີທີ່ສຸດເພື່ອຊຸກຍູ້ການຈັດຕັ້ງປະຕິບັດຫລັກສູດໃໝ່ໃຫ້ປະສົບຜົນສຳເລັດ ແລະສະແດງໃຫ້ເຫັນຕົວຢ່າງທີ່ດີຂອງການຮຽນ-ການສອນຂັ້ນປະຖົມທີ່ເໝາະສົມສຳລັບເດັກທຸກຄົນ.

• 19/10/2022