ທ່ານ ວັດທະນະໄຊ ລາດສະວົງສິງ ເປັນປະທານສະຫະພັນປັນຈັກສີລັດ-ວູຊູ ຊຸດໃໝ່ ພ້ອມຮ່ວມຊຽງຂວາງເກມ

ນະຄອນຫຼວງວຽງຈັນ (ນວ) ປະກາດແຕ່ງຕັ້ງຄະນະບໍລິຫານງານສະຫະພັນກິລາປັນຈັກສີລັດ-ວູຊູ ນະຄອນຫຼວງວຽງຈັນ ຊຸດໃໝ່ຢ່າງເປັນທາງການໂດຍແຕ່ງຕັ້ງທ່ານ ວັດທະນະໄຊ ລາດສະວົງສິງ ເຈົ້າຂອງສວນອາຫານມັງກອນທອງເປັນປະທານສະຫະພັນ ແລະ ທ່ານ ວັນໄຊ ອຸດົມຜົນ ເປັນຮອງຜູ້ອຳນວຍການສູນຝຶກກິລາແຫ່ງຊາດ ສະຖາບັນກິລາ-ກາຍະກຳເປັນຮອງປະທານສະຫະພັນເພື່ອກຽມຄວາມພ້ອມນຳພາທັບນັກກິລາ ນວ ທັງສອງປະເພດດັ່ງກ່າວກຽມຄວາມພ້ອມເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງຮັບກຽດເປັນເຈົ້າພາບໃນທ້າຍປີນີ້.


ພິທີຜ່ານຂໍ້ຕົກລົງຂອງທ່ານເຈົ້າຄອງ ນະຄອນຫຼວງວຽງຈັນ ວ່າດ້ວຍການແຕ່ງຕັ້ງຄະນະບໍລິຫານງານສະຫະພັນກິລາປັນຈັກສີລັດ-ວູຊູ ນະຄອນຫຼວງວຽງຈັນ ຊຸດໃໝ່ ໃນຄັ້ງນີ້ ໄດ້ມີຂຶ້ນເມື່ອວັນທີ 15 ຕຸລາຜ່ານມາ ທີ່ສະໂມສອນໂຮງຮຽນ ມສ ວຽງຈັນ, ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ພູວົງ ວົງຄຳຊາວ ຮອງເຈົ້າຄອງ ນະຄອນຫຼວງວຽງຈັນ, ທ່ານ ສີທົນ ດາວພະສິດ ຮອງຫົວໜ້າພະແນກສຶກສາທິ ແລະກິລາ ນະຄອນຫຼວງວຽງຈັນ ແລະທ່ານ ວັດທະນະໄຊ ລາດສະວົງສິງ ເຈົ້າຂອງສວນອາຫານມັງກອນທອງ ເປັນປະທານສະຫະພັນກິລາປັນຈັກສີລັດ-ວູຊູ ນວ ຄົນໃໝ່ ພ້ອມດ້ວຍຄະນະບໍລິຫານງານ ແລະພະນັກງານທີ່ກ່ຽວຂ້ອງ, ຄູຝຶກ ແລະນັກກິລາ ຕະຫຼອດຮອດສື່ມວນຊົນເຂົ້າຮ່ວມ.

ສຳລັບຂໍ້ຕົກລົງໃນຊຸດນີ້ປະກອບມີທັງໝົດ 8 ທ່ານ,ໃນນັ້ນໄດ້ມີການແຕ່ງຕັ້ງທ່ານ ວັດທະນະໄຊ ລາດສະວົງສິງ ເຈົ້າຂອງສວນອາຫານມັງກອນທອງ ເປັນປະທານສະຫະພັນ ແລະທ່ານ ວັນໄຊ ອຸດົມຜົນ ເປັນຮອງຜູ້ອຳນວຍການສູນຝຶກກິລາແຫ່ງຊາດສະຖາບັນກິລາ-ກາຍະກຳເປັນຮອງປະທານສະຫະພັນສ່ວນທ່ານ ຈາຕຸລົມ ເປັນເລຂາທິການ ແລະທ່ານ ເພັດສະໝອນ ໄຊຍະວົງ ເປັນຮອງເລຂາທິການ. ນອກນັ້ນ ກໍຍັງມີຄະນະອີກ4 ທ່ານ ສ່ວນພາລະບົດບາດຂອງຄະນະບໍລິຫານງານຊຸດໃໝ່ໃນຄັ້ງນີ້ ແມ່ນໄດ້ພ້ອມກັນຄົ້ນຄວ້າໂຄງປະກອບກົງຈັກການຈັດຕັ້ງ ແລະ ຈັດວາງອຸປະກອນໃຫ້ສອດຄ່ອງກັບລະບົບບໍລິຫານການບັນຊາ ແລະ ການຄຸ້ມຄອງຢູ່ໃນແຕ່ລະຂັ້ນ ພ້ອມທັງສະຫຼຸບ ແລະລາຍງານການເຄື່ອນໄຫວຂອງຄະນະໃຫ້ພະແນກສຶກສາທິການ ແລະ ກິລາ ແລະ ການນຳນະຄອນຫຼວງຊາບຢ່າງເປັນປົກກະຕິພ້ອມກັນຕັ້ງໜ້າເຂົ້າໃນການຄັດເລືອກ, ຝຶກແອບຝຶກຊ້ອມທົດສອບນັກກິລາ ເພື່ອກະກຽມເຂົ້າຮ່ວມແຂ່ງຂັນທັງລະດັບພາຍໃນ ແລະຕ່າງປະເທດ, ປຸກລະດົມຂົນຂວາຍເພື່ອຊອກຫາແຫຼ່ງທຶນເຂົ້າໃນການຊຸກຍູ້ ແລະເຄື່ອໄຫວວຽກງານກິລາ-ກາຍະກຳຂອງຄະນະ, ເປັນໃຈກາງສົມທົບກັບພະແນກສຶກສາທິການ ແລະກິລາ ນວ ໃນການຊຸກຍູ້ສົ່ງເສີມ ແລະ ຈັດຝຶກອົບຮົມການຫຼິ້ນກິລາປະເພດວູຊູ ແລະ ປັນຈັກສີລັດ ເພື່ອເສີມສ້າງບຸກຄະລາກອນ ແລະພັດທະນາທັກສະຂອງນັກກິລາປະເພດນີ້ໃນທົ່ວນະຄອນຫຼວງ ນອກນັ້ນກໍພ້ອມກັນຕິດຕາມກວດກາບັນດາສະໂມສອນຫົວໜ່ວຍ,ທີມກິລາຕ່າງໆໃຫ້ຖືກຕ້ອງຕາມກະຕິກາ ແລະກົດໝາຍວ່າດ້ວຍກິລາ-ກາຍະກຳ ແຫ່ງ ສປປ ລາວ ແລະເປັນເສນາທິການໂດຍກົງທາງດ້ານກິລາ ມວຍວູຊູ-ປັນຈັກສີລັດ ໃຫ້ແກ່ພະແນກສຶກສາທິການ ແລະກິລາ ນວ ຢ່າງມີໝາກຜົນສຳເລັດຕາມເປົ້າໝາຍທີ່ວາງໄວ້.

ທ່ານ ວັດທະນະໄຊ ລາດສະວົງສິງ ກໍຍັງໄດ້ກ່າວສະແດງຄວາມຂອບໃຈເປັນຢ່າງສູງມາຍັງຄະນະນຳ ນະຄອນຫຼວງ ກໍຄືເຈົ້າຄອງ-ຮອງເຈົ້າຄອງ ທີ່ໄດ້ໃຫ້ຄວາມໄວ້ເນື້ອເຊື່ອໃຈໃຫ້ຕົນເອງ ພ້ອມຄະນະຮັບພາລະໜ້າທີ່ບົດບາດໃໝ່ຢ່າງສົມກຽດສະນັ້ນເພື່ອເຮັດໃຫ້ຄະນະພັກ-ຄະນະນຳ ນະຄອນຫຼວງກໍຄືພໍ່ແມ່ປະຊາຊົນຊາວນະຄອນຫຼວງ ບໍ່ຜິດຫວັງ ພວກເຮົາຄະນະບໍລິຫານງານຊຸດໃໝ່ຈະພ້ອມກັນເພີ່ມທະວີຄວາມເອົາໃຈໃສ່ຢ່າງຕັ້ງໜ້າປະກອບສ່ວນນຳພາທັບນັກກິລານະຄອນຫຼວງ ທັງສອງປະເພດກິລາດັ່ງກ່າວເຄື່ອນໄຫວເກັບຕົວຝຶກແອບຝຶກຊ້ອມ ແລະທົດສອບຄວາມສາມາດຢ່າງຕໍ່ເນື່ອງເພື່ອເຂົ້າຮ່ວມສ້າງຜົນງານຍາດໄດ້ຫຼຽນຄຳຕາມເປົ້າໝາຍທີ່ວາງໄວ້.

ຂະນະທີ່ ທ່ານ ວັນໄຊ ອຸດົມຜົນ ກໍໄດ້ກ່າວສະແດງຄວາມພາກພູມໃຈ ແລະເປັນກຽດຢ່າງສູງທີ່ໄດ້ຮັບໜ້າທີ່ໃໝ່ສະນັ້ນເພື່ອເຮັດໃຫ້ການເຂົ້າຮ່ວມຊຽງຂວາງເກມ ເປັນໄປຕາມເປົ້າໝາຍທີ່ວາງໄວ້ທາງສະຫະພັນຂອງພວກເຮົາຈຶ່ງໄດ້ວາງແຜນການເຂົ້າຮ່ວມແຂ່ງຂັນໃນງານດັ່ງກ່າວຢ່າງຮອບດ້ານໂດຍສະເພາະສາມາດຄັດເລືອກເອົານັກກິລາທັງ 2 ປະເພດເປັນຕົ້ນປັນຈັກຊີລັດ ຄັດເລືອກໄດ້ 9 ຄົນ, ຍິງ 3 ຄົນ ໂດຍຄາດໝາຍບໍ່ໃຫ້ຫຼຸດ 2 ຫຼຽນຄໍາ ສ່ວນກິລາ ວູຊູ ສາມາດຄັດເລືອກໄດ້ປະເພດຕໍ່ສູ້ໄດ້ 6 ຮຸ່ນຊາຍທັງໝົດຄາດໝາຍບໍ່ໃຫ້ຫຼຸດ 2 ຫຼຽນຄໍາເຊັ່ນກັນ.

แชร์