ທ່ານ ຫງວຽນ ບ່າຮຸ່ງ ພ້ອມດ້ວຍຄະນະເຄື່ອນໄຫວຢ້ຽມຢາມ-ເຮັດວຽກຢູ່ແຂວງຜົ້ງສາລີ

ໃນວັນທີ 18 ຕຸລາ 2022 ທ່ານ ຫງວຽນ ບ່າຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ສປປ ລາວ ພ້ອມດ້ວຍຄະນະເຄື່ອນໄຫວຢ້ຽມຢາມ-ເຮັດວຽກຢູ່ແຂວງຜົ້ງສາລີ.ໂອກາດນີ້ທ່ານທູດພ້ອມດ້ວຍຄະນະໄດ້ເຂົ້າຢ້ຽມຂໍ່ານັບການນໍາແຂວງຜົ້ງສາລີຢູ່ທີ່ຫ້ອງຮັບແຂກຊັ້ນ 1 ຂອງສໍານັກງານປົກຄອງແຂວງພາຍໃຕ້ການຕ້ອນຮັບຂອງທ່ານ ຄຳເຫຼັກ ໃຈອີສານ ກຳມະການປະຈຳພັກແຂວງ, ຮອງເຈົ້າແຂວງຜົ້ງສາລີ, ພ້ອມດ້ວຍການນໍາຫຼັກແຫຼ່ງ ແລະ ພະແນກການທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ຄຳເຫຼັກ ໃຈອີສານ ກຳມະການປະຈຳພັກແຂວງ, ຮອງເຈົ້າແຂວງຜົ້ງສາລີໄດ້ລາຍງານໂດຍລວມກ່ຽວກັບໝາກຜົນແຫ່ງການສ້າງສາພັດທະນາຢູ່ແຂວງຜົ້ງສາລີໄລຍະຜ່ານໃຫ້ຊາບ. ແຂວງຜົ້ງສາລີ ມີເນື້ອທີ່ 16.315 ກິໂລຕາແມັດ, ຊຶ່ງກວມ 99% ແມ່ນເປັນທີ່ພູດອຍ; ມີຊາຍແດນຕິດກັບ 2 ປະເທດເພື່ອນມິດຍຸດທະສາດຄື: ຕິດກັບ ສສ ຫວຽດນາມ ຍາວ 385 ກິໂລແມັດ ແລະ ຕິດກັບ ສປ ຈີນ ຍາວ 365 ກິໂລແມັດ; ມີດ່ານສາກົນ 1 ແຫ່ງ, ມີດ່ານທ້ອງຖິ່ນ 2 ແຫ່ງ, ມີດ່ານປະເພນີ 4 ແຫ່ງ; ດ້ານການປົກຄອງທົ່ວແຂວງ ມີ 7 ເມືອງ, ມີ 513 ບ້ານ, ມີພົນລະເມືອງປະມານ 194.000 ກ່ວາຄົນ, ໃນນັ້ນຍິງ ກວມ 50%; ປະກອບມີ 15 ຊົນເຜົ່າ, 34 ແຊງ. ລວມຍອດຜະລິດຕະພັນພາຍໃນ (GDP) ປີ 2021 ບັນລຸ 2.074,85 ຕື້ກີບ, ທຽບໃສ່ປີ 2020 ເພີ່ມຂຶ້ນ 6,1%, ລວມຍອດຜະລິດຕະພັນພາຍໃນສະເລ່ຍຫົວຄົນບັນລຸ 1.123 ໂດລາ; ໂຄງປະກອບເສດຖະກິດຕາມຂະແໜງການກະສິກໍາ-ປ່າໄມ້ກວມ 52,36%; ອຸດສາຫະກຳຫັດຖະກຳກວມ 20,17% ແລະ ການບໍລິການກວມ 24,47%. ການລົງທຶນຂອງເອກະຊົນຕ່າງປະເທດ ມີທັງໝົດ 69 ໂຄງການ ມູນຄ່າການລົງທຶນ 374 ລ້ານໂດລາ, ໃນນີ້ ການລົງທຶນຂອງເອກະຊົນຫວຽດນາມ: ມີ 5 ໂຄງການ, ມີມູນຄ່າທັງໝົດ 3.161.309 ໂດລາ, ຊຶ່ງລວມມີໂຄງການກໍ່ສ້າງຕະຫຼາດເທດສະບານເມືອງຂວາ ໂດຍບໍລິສັດ ກວາງວີງ, ມູນຄ່າການລົງທຶນ 3,72 ລ້ານໂດລາ. ກ່ຽວກັບການພົວພັນຮ່ວມມືກັບ ສສ ຫວຽດນາມ ກໍໄດ້ສືບຕໍ່ພົວພັນຮ່ວມມື ກັບ ແຂວງດຽນບ່ຽນ, ແຂວງໄລ່ເຈົ່າ,ແຂວງເຊີນລາ, ທະຫານເຂດ 2; ນອກຈາກນັ້ນຍັງໄດ້ພົວພັນກັບແຂວງຟູເທາະ, ວີງຟຸກ, ທ້າຍຫງວຽນຜົ້ງສາລີໄດ້ຮັບການຊ່ວຍເຫຼືອການກໍ່ສ້າງໂຄງລ່າງດ້ານໂຮງຮຽນ ແລະ ການຊ່ວຍເຫຼືອເງິນສົດ, ອຸປະກອນປ້ອງກັນໂຄວິດຈາກແຂວງຕ່າງໆຂອງ ສສ ຫວຽດນາມ ເປັນມູນຄ່າຫຼາຍສົມຄວນ, ທັງໝົດນັ້ນໄດ້ປະກອບສ່ວນອັນສໍາຄັນຕໍ່ການສ້າງສາພັດທະນາແຂວງຜົ້ງສາລີ ກໍ່ຄືການແກ້ໄຂຄວາມທຸກຍາກຂອງປະຊາຊົນ; .ຄ່ຽງຄູ່ກັບໝາກຜົນທີ່ກ່າວມານັ້ນທ່ານຍັງໄດ້ຍົກໃຫ້ເຫັນຂໍ້ຫຍຸ້ງຍາກ ແລະ ສິ່ງທ້າທາຍ ຕໍ່ການສ້າງສາພັດທະນາ ໃນຫຼາຍດ້ານ .ຫຼັງຈາກນັ້ນ,ທ່ານ ຫງວຽນບ່າຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ສປປ ລາວ ກໍໄດ້ສະແດງຄວາມຂອບໃຈການນຳແຂວງຜົ້ງສາລີທີ່ໃຫ້ການຕ້ອນຮັບຢ່າງອົບອຸ່ນພ້ອມກັບລາຍງານຈຸດປະສົງຫຼັກຂອງການມາຄັ້ງນີ້, ແລ້ວທັງສອງຝ່າຍກໍໄດ້ແລກປ່ຽນຄວາມຄິດເຫັນຊຶ່ງກັນແລະກັນໂດຍເນັ້ນໃສ່ເສີມຂະຫຍາຍມູນເຊື້ອ ແລະເພີ່ມພູນຄຸນສ້າງສາຍພົວພັນມິດຕະພາບ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງຊາດ ລາວ - ຫວຽດນາມ ເວົ້າລວມ, ເວົ້າສະເພາະແຂວງຜົ້ງສາລີ ກັບ ສະຖານທູດ ແຫ່ງ ສສ ຫວຽດນາມ ປະຈໍາ ສປປ ລາວ ໃຫ້ນັບມື້ເຂົ້າສູ່ລວງເລິກ,ສືບຕໍ່ສະໜັບສະໜູນຊ່ວຍເຫຼືອ, ຊຶ່ງກັນ ແລະກັນປະສານສົມທົບພົວພັນດ້ານຕ່າງໆໃຫ້ມີຜົນສໍາເລັດທີ່ຍິ່ງໃຫຍ່ກວ່າເກົ່າ.

ພາຍຫຼັງທີ່ທ່ານ ຫງວຽນບ່າ ຮຸ່ງເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ສປປ ລາວ ພ້ອມດ້ວຍຄະນະເຂົ້າຢ້ຽມຂໍ່ານັບການນໍາແຂວງແລ້ວສືບຕໍ່ລົງຢ້ຽມຢາມໂຮງຮຽນມັດທະຍົມສົມບູນເທດສະບານເມືອງບຸນເໜືອຊຶ່ງເປັນໂຮງຮຽນທີ່ໄດ້ຮັບທືນຊ່ວຍເຫຼືອລ້າຈາກ ສສ ຫຼວຽດນາມ.
ພາບ-ຂ່າວ: ສິນນະກອນ ໂນລະສິນ, ບົວສະໄໝ ລີລາວົງ

แชร์