ເດືອນຕຸລາ ມີຜູ້ໃຊ້ບໍລິການຂີ່ລົດໄຟ ລາວ-ຈີນ 739 ລ້ານເທື່ອຄົນ

ພາຍຫຼັງໄດ້ເປີດນໍາໃຊ້ເສັ້ນທາງລົດໄຟ ລາວ-ຈີນ ປັດຈຸບັນກ້າວເຂົ້າເປັນ 10 ເດືອນກວ່າແລ້ວທີ່ແລ່ນໃຫ້ບໍລິການລູກຄ້າເຫັນໄດ້ຄວາມຕ້ອງການຜູ້ໂດຍສານ ແລະ ການຂົນສົ່ງສິນຄ້າ ໄດ້ມີບົດບາດຊ່ອງທາງນັບມື້ນັບເພີ່ມຂຶ້ນ ມາຮອດ ວັນທີ 3 ເດືອນຕຸລາ ປີ 2022 ທາງລົດໄຟ ລາວ-ຈີນ ໄດ້ມີໂຕເລກຜູ້ໃຊ້ບໍລິການທັງໝົດ 739 ລ້ານເທື່ອຄົນ ແລະ ການຂົນສົ່ງສິນຄ້າໄດ້ 851 ລ້ານໂຕນ.

ທ່ານ ອາຊານ ນັກແປພາສາຢູ່ພະແນກຈັດການໂຄງການກຸ່ມບໍລີສັດ ກໍ່ສ້າງທາງລົດໄຟຈີນ ໄລຍະສັນຍາທີ FJSGII ໄດ້ລາຍງານໃຫ້ຮູ້ວ່າ: ນັບແຕ່ໄດ້ເປີດນໍາໃຊ້ເສັ້ນທາງລົດໄຟ ລາວ-ຈີນ ມາຮອດວັນທີ 3 ເດືອນຕຸລາ ປີ 2022 ນີ້, ທາງລົດໄຟ ລາວ-ຈີນ ໄດ້ສະສົມໂຕເລກຜູ້ໂດຍສານທັງໝົດ 739 ລ້ານເທື່ອຄົນ ແລະການຂົນສົ່ງສິນຄ້າສະສົມໄດ້ 851 ລ້ານໂຕນ, ໃນນັ້ນມີສິນຄ້າຂ້າມແດນ 154 ລ້ານໂຕນ. ໃນເດືອນກັນຍາຜ່ານມານີ້ທາງລົດໄຟ ລາວ-ຈີນ ໄດ້ຂົນສົ່ງສິນຄ້າເຖິງ125 ລ້ານໂຕນ, ໄດ້ສ້າງສະຖິຕິການຂົນສົ່ງສິນຄ້າຫຼາຍທີ່ສຸດໃນເດືອນດຽວກັນ, ຕັ້ງແຕ່ເລີ່ມເປີດການຂົນສົ່ງຈຳນວນສິນຄ້າມີ 100 ກວ່າປະເພດໃນຕົ້ນປີ ແລະ ເພີ່ມຂຶ້ນມາເປັນ 1.200 ປະເພດ ແລະ ມີມູນຄ່າຂອງສິນຄ້າທັງໝົດແມ່ນຫຼາຍກວ່າ100 ຕື້ຢວນ.

ໂອກາດນີ້, ທ່ານ ອາຊານ ໃຫ້ຮູ້ຕື່ມວ່າ: ພາຍຫຼັງເປີດເສັ້ນທາງລົດໄຟ ລາວ-ຈີນ ໄດ້ມີນັກທ່ອງທ່ຽວຈາກທັງພາຍໃນ ແລະຕ່າງປະເທດເດີນທາງຜ່ານທາງລົດໄຟ ເຂົ້າມາທ່ຽວນະຄອນ-ຫຼວງພະບາງຢ່າງຫຼວງຫຼາຍ, ເຮັດໃຫ້ຊາວບ້ານໄດ້ມີລາຍຮັບຈາກການເລີ່ມເຮັດທຸລະກິດຂອງຕົນເອງເປັນຕົ້ນແມ່ນຮ້ານຂາຍເຄື່ອງຍ່ອຍ, ຮ້ານອາຫານ ເພື່ອໄວ້ຄອຍບໍລິການຜູ້ໂດຍສານຢູ່ໃກ້ກັບສະຖານີ ແລະສາມາດສ້າງລາຍຮັບເພີ່ມຂຶ້ນຫຼາຍກວ່າແຕ່ກ່ອນ. ພ້ອມນີ້ ທ່ານ ອາຊານ ຍັງໄດ້ເຂົ້າຮ່ວມການກໍ່ສ້າງທາງລົດໄຟລາວ-ຈີນ ສະຖານີວຽງຈັນ, ສະຖານີຫຼວງພະບາງ, ສະຖານີວັງວຽງ ແລະ 12 ສະຖານີໃນຖານະທີ່ເປັນຄົນລາວທ້ອງຖິ່ນ ແລະເປັນຜູ້ເຂົ້າຮ່ວມກໍ່ສ້າງທາງລົດໄຟລາວ-ຈີນ ຮູ້ສຶກພາກພູມໃຈຫຼາຍທີ່ເຫັນວ່າບ້ານເກີດເມືອງນອນກໍຄືປະເທດລາວນັບມື້ນັບມີການພັດທະນາດີຂຶ້ນເທື່ອລະກ້າວ.

ພາຍຫຼັງເປີດເສັ້ນທາງລົດໄຟລາວ-ຈີນ, ພາກສ່ວນທາງລົດໄຟໄດ້ສົມທົບກັບອົງການປ້ອງກັນ ແລະຄວບຄຸມການແຜ່ລະບາດພະຍາດໂຄວິດ-19, ວິເຄາະຮູບ ແລະການເດີນທາງຂອງຜູ້ໂດຍສານໃນການເດີນທາງ, ຈັດສັນການເດີນທາງໃຫ້ຖືກຕ້ອງ, ເພີ່ມທະວີການສະໜອງສິນຄ້າຂົນສົ່ງຜູ້ໂດຍສານ, ຮັບປະກັນຄວາມປອດໄພການເດີນທາງຂອງຜູ້ໂດຍສານ, ຕອບສະໜອງຄວາມຕ້ອງການເດີນທາງຂອງປະຊາຊົນແຕ່ລະເສັ້ນສາຍໃຫ້ພຽງພໍ. ພ້ອມກັນນັ້ນ, ພາກສ່ວນທາງລົດໄຟຍັງໄດ້ຄົ້ນຄວ້າຮູບແບບໃໝ່ “ເສັ້ນທາງດ່ວນລ້ານຊ້າງ”, ອີຄອມເມີດຂ້າມແດນ, “ທາງລົດໄຟລາວ-ຈີນ, ທາງລົດໄຟຈີນ-ເອີຣົບ” ການຂົນສົ່ງທາງລົດໄຟຮູບແບບໃໝ່ລະຫວ່າງປະເທດ, ຄ່ອຍໆເສີມຂະຫຍາຍການຂົນສົ່ງສິນຄ້າທາງລົດໄຟລາວ-ຈີນຜ່ານຊາຍແດນ, ເຮັດໃຫ້ມີວິສາຫະກິດຫຼາຍກວ່າເກົ່າໄດ້ຮັບກາລະໂອກາດ ແລະ ໄດ້ຮັບຜົນປະໂຫຍດທີ່ນຳໃຊ້ທາງລົດໄຟລາວ-ຈີນ ເພື່ອຊຸກຍູ້ພັດທະນາເສດຖະກິດ-ສັງຄົມ ຂອງ ສປປ ລາວ ໃຫ້ມີບົດບາດຂະຫຍາຍຕົວໃນພາກພື້ນ ແລະສາກົນ, ເຮັດໃຫ້ປະເທດຊາດຫຼຸດພົ້ນອອກຈາກປະເທດທີ່ດ້ອຍພັດທະນາໃນອະນາຄົດ.

ໂດຍ: ສີສຸວັນ

แชร์