ສປປ ລາວ ກຽມພັດທະນາພະລັງງານສະອາດ ຢູ່ສາມແຂວງພາກເໜືອ

ໃນວັນທີ 17 ຕຸລາ 2022, ທີ່ໂຮງແຮມແລນມາກ ນະຄອນຫລວງວຽງຈັນ, ໄດ້ລົງນາມໃນບົດບັນທຶກຄວາມເຂົ້າໃຈMOU ເພື່ອເກັບກໍາຂໍ້ມູນຂອບເຂດເນື້ອທີ່ ແລະສຶກສາຄວາມເປັນໄປໄດ້ໂຄງການພັດທະນາພະລັງງານສະອາດ ຄົບວົງຈອນ (ພະລັງງານລົມ, ພະລັງງານແສງ ແລະພະລັງງານອາຍນໍ້າ) ຂອງບໍລິສັດ CGN Energy International Holdings Co., Limited. ຢູ່ແຂວງຜົ້ງສາລີ, ຫຼວງນໍ້າທາ ແລະອຸດົມໄຊ, ລະຫວ່າງທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະການລົງທຶນ ແລະທ່ານ ຄ້າຍ ຫົວຫ່າງ ປະທານ ບໍລິສັດພະລັງງານເອດຣາ. ໂດຍມີທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ດາວວົງ ພອນແກ້ວ ລັດຖະມົນຕີວ່າການກະຊວງພະລັງງານ-ບໍ່ແຮ່ ແລະ ທ່ານ ຈຽງ ຈາຍ ຕົ້ງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈໍາລາວ, ເຈົ້າແຂວງຜົ້ງສາລີ, ຫຼວງນໍ້າທາ ແລະອຸດົມໄຊ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

ໂອກາດນີ້, ທ່ານ ຫຼີ ອີ້ ຫລຸນ ອຳນວຍການ ບໍລິສັດ ຊີຈີເອັນລາວ (ສປ ຈີນ) ກ່າວວ່າ: ປັດຈຸບັນບໍລິສັດພວກເຮົາໄດ້ພັດທະນາໂຄງການພະລັງງານສະອາດ ມີສາຂາ 5 ແຫ່ງ, ມູນຄ່າການລົງທຶນທັງໝົດ 900 ຕື້ຢວນ, ກໍາລັງການຜະລິດ 72 ລ້ານກິໂລວັດ ໃນ ສປ ຈີນ, ມີກໍາລັງຕິດຕັ້ງ 30 ລ້ານກວ່າກິໂລວັດ, ນອກນັ້ນແມ່ນຢູ່ຕ່າງປະເທດ ລ້ານກວ່າກິໂລວັດ ໃນປະເທດໃນອາຊີຕາເວັນອອກສຽງໃຕ້ ອີຢິບ ຝຣັ່ງ ບຣາຊິນ ແລະອື່ນໆ. ສໍາລັບການລົງນາມເທື່ອນີ້ແມ່ນປະຕິບັດຕາມຍຸດທະສາດພາຍໃຕ້ຄູ່ຮ່ວມຊະຕາກໍາດຽວກັນຂອງສອງປະເທດ ລາວ-ຈີນ ໃຫ້ປະສົບຜົນສຳເລັດເປັນຈິງ ໂດຍສະເພາະແມ່ນການເຊື່ອມໂຍງຕາຂ່າຍໄຟຟ້າລະຫວ່າງສອງປະເທດແມ່ນມີຄວາມສໍາຄັນຫລາຍເຊິ່ງຈະຊ່ວຍປ່ຽນແຜນການໃຫ້ເປັນການຈັດຕັງປະຕິບັດ ແລະປ່ຽນແນວຄິດໃຫ້ເປັນຮູບປະທໍາ.

ທ່ານ ນາງ ພອນວັນ ອຸທະວົງ ກ່າວວ່າ: ສຳລັບການເຊັນບົດບັນທຶກຄວາມເຂົ້າໃຈ (MOU) ໃນຄັ້ງນີ້ແມ່ນບາດກ້າວສຳຄັນເພື່ອໃຫ້ບໍລິສັດໄດ້ປະສານສົມທົບກັບຂະແໜງການກ່ຽວຂ້ອງສູນກາງ ແລະທ້ອງຖິ່ນຮ່ວມກັນກຳນົດຂອບເຂດພື້ນທີ່ ທີ່ມີຄວາມເປັນໄປໄດ້ເພື່ອຈະນຳໃຊ້ເຂົ້າໃນໂຄງການໃນໄລຍະ 6 ເດືອນ ເພື່ອຈະກ້າວເຂົ້າສູ່ບົດບັນທຶກຄວາມເຂົ້າໃຈ (MOU) ສະບັບສົມບູນໃນການສຶກສາຄວາມເປັນໄປໄດ້ໃນການພັດທະນາໂຄງການດັ່ງກ່າວຢູ່ໃນສາມແຂວງພາກເໜືອ, ຫວັງຢ່າງຍິ່ງວ່າ ໂຄງການນີ້ຈະສາມາດຈັດຕັ້ງປະຕິບັດເປັນຮູບປະທຳໃນຂັ້ນຕອນຕໍ່ໄປໂດຍໄວ.

แชร์