ເລີ່ມຈັດຕັ້ງປະຕິບັດໂຄງການເຊື່ອມສານດ້ານໂພສະນາການ ຢູ່ 2 ເມືອງຍົມມະລາດ ແລະໄຊບົວທອງ ແຂວງຄຳມ່ວນ

ພິທີເຊັນບົດບັນທຶກຄວາມເຂົ້າໃຈຂອງໂຄງການເຊື່ອມສານດ້ານໂພສະນາການ ຢູ່ 2 ເມືອງ ຍົມມະລາດ ແລະໄຊບົວທອງແຂວງຄຳມ່ວນ ຈັດຂຶ້ນໃນວັນທີ 18 ຕຸລາ 2022 ທີ່ຫ້ອງວ່າການແຂວງໂດຍການເປັນປະທານຂອງທ່ານ ປອ. ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ມີທ່ານ ດຣ. ແກ່ນຈັນ ທອງສະຫວັດ ຫົວໜ້າພະແນກສາທາລະນະສຸກແຂວງ, ທ່ານ ອາຊິດ ກູມາ Ashit Kumar ຮັກສາການແທນອໍານວຍການອົງການສຸພານິມິດສາກົນ ປະຈຳລາວ, ມີຕາງໜ້າຈາກກະຊວງການຕ່າງປະເທດ, ກະຊວງສາທາລະນະສຸກ, ມີພະແນກການຂັ້ນແຂວງ, ຫ້ອງການ ແລະຂະແໜງການທີ່ກ່ຽວຂ້ອງຂັ້ນເມືອງເຂົ້າຮ່ວມ.

ໂຄງການເຊື່ອມສານດ້ານໂພສະນາການ ຊຶ່ງໄດ້ຮັບການສະໜັບສະໜູນຈາກອົງການສຸພະນິມິດສາກົນ ປະຈຳລາວ, ມີເປົ້າໝາຍຢູ່ 2 ເມືອງຂອງແຂວງຄຳມ່ວນຄື: ເມືອງຍົມມະລາດ ແລະ ເມືອງໄຊບົວທອງ ໃນບ້ານເປົ້າໝາຍ ເມືອງລະ 13 ບ້ານ, ຊຶ່ງຈຸດປະສົງຫຼັກຂອງໂຄງການ ເພື່ອປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມ ຄັ້ງທີ 9 (2021-2025) ໂດຍເລັ່ງໃສ່ການປັບປຸງສຸຂະພາບແມ່ ແລະ ເດັກ ແລະ ການຢຸດຕິຄວາມອຶດຫິວ, ບັນລຸຄວາມໝັ້ນຄົງດ້ານສະບຽງອາຫານ ແລະ ປັບປຸງໂພສະນາການ ແລະສົ່ງເສີມກະສິກຳແບບຍືນຍົງ ແລະ ແຜນງານແຫ່ງຊາດດ້ານການປັບປຸງວຽກງານໂພສະນາການໃນຂົງເຂດວຽກງານຂອງກະຊວງສາທາລະນະສຸກເພື່ອສ້າງເງື່ອນໄຂຄວາມສະດວກໃຫ້ແກ່ຄົວເຮືອນໃນການເພີ່ມທະວີດ້ານໂພສະນາການ ຢູ່ໃນບັນດາບ້ານ ແລະເມືອງເປົ້າໝາຍຂອງໂຄງການ. ໂດຍມີ 4 ກິດຈະກຳຫຼັກຄື: 1 ປັບປຸງ ແລະສົ່ງເສີມວຽກງານສຸຂະພາບແມ່, ເດັກ ແລະໂພສະນາການ, 2 ປັບປຸງ ແລະສົ່ງເສີມວຽກງານການຜະລິດກະສິກຳ ເພື່ອປັບປຸງຊີວິດການເປັນຢູ່ຂອງປະຊາຊົນ, 3 ປັບປຸງ ແລະສົ່ງເສີມວຽກງານນໍ້າສະອາດ ແລະ ສຸຂະອະນາໄມ, 4 ສ້າງຄວາມເຂັ້ມແຂງໃນດ້ານການປະສານງານຂອງຫຼາຍຂະແໜງການເພື່ອສະໜັບສະໜູນການເບິ່ງແຍງດູແລເດັກກ່ອນໄວຮຽນ ແລະການສ້າງສຳພັນສາມັກຄີໃນຄອບຄົວ ແລະຊຸມຊົນ. ໄລຍະການຈັດຕັ້ງປະຕິບັດຂອງໂຄງການ 4 ປີ 2022-2025 (ເລີ່ມແຕ່ວັນເຊັນບົດບັນທຶກຄວາມເຂົ້າໃຈເປັນຕົ້ນໄປ) ມີມູນຄ່າລວມທັງໝົດ 983.209 ໂດລາສະຫະລັດ.ໃນນີ້ ເມືອງໄຊບົວທອງ 533.008 ໂດລາ ແລະເມືອງຍົມມະລາດ 450.201 ໂດລາສະຫະລັດ.

แชร์