ປກສ ແຂວງຄຳມ່ວນ ຈູດທຳລາຍຢາບ້າ 115.965 ເມັດ.

ໃນວັນທີ 14 ຕຸລາ 2022 ຢູ່ທີ່ສະໂມສອນກອງບັນຊາການ ປກສ ແຂວງຄຳມ່ວນ, ໄດ້ຈັດພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 21 ປີຄື: ( ວັນທີ 12 ຕຸລາ 2001-12 ຕຸລາ 2022) ເປັນກຽດເຂົ້າຮ່ວມມີທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງໆຄຳມ່ວນ, ທ່ານ ພັອ ຄຳສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງ, ມີຄະນະພັກ, ຄະນະບັນຊາ, ພະນັກງານຫຼັກແຫຼ່ງ,ພະແນກການອ້ອມຂ້າງແຂວງເຂົ້າຮ່ວມ.

ທ່ານ ພັທ ພູມາ ວັງມະລາດ ຮອງຫົວໜ້າຫ້ອງຕຳຫຼວດ ປກສ ແຂວງຄຳມ່ວນ, ໄດ້ຜ່ານບົດລາຍງານກ່ຽວກັບບັນຫາຢາເສບຕິດ. ແຂວງຄຳມ່ວນແມ່ນໄດ້ເອົາໃຈໃສ່ ຖືເປັນບັນຫາສຳຄັນກັບການປ້ອງກັນ, ຕ້ານ ແລະສະກັດກັ້ນຢາເສບຕິດ, ຜ່ານການເຄື່ອນໄຫວໜ້າທີ່ວຽກງານຜ່າມາ, ໄດ້ລົງໂຄສະນາເຜີຍແຜ່ຜົນຮ້າຍ ແລະກົດໝາຍຢາເສບຕິດໃຫ້ບັນດາໂຮງຮຽນ, ກຸ່ມສຶກສາອົບຮົມຜູ້ຕິດຢາເສບຕິດໄລຍະສັ້ນຂອງບັນດາເມືອງໃນທົ່ວແຂວງ ໄດ້ຈຳນວນ 11 ຄັ້ງ, ມີຜູ້ເຂົ້າຮ່ວມຮັບຟັງຈຳນວນ 3.357 ຄົນ, ຍິງ 1.194 ຄົນ. ສາມາດເກັບກຳຂໍ້ມູນຜູ້ທີ່ມາປິ່ນປົວ, ຟື້ນຟູສຸຂະພາບຜູ້ຕິດຢາເສບຕິດໄດ້ທັງໝົດ 72 ຄົນ, ປິ່ນປົວຫາຍດີ 47 ຄົນ, ຍັງປິ່ນປົວໃນປັດຈຸບັນ ຈຳນວນ 25 ຄົນ. ສາມາດມ້າງຄະດີໄດ້ 334 ລາຍ, ມີຜູ້ຖືກຫາທັງໝົດ 495 ຄົນ, ຍິງ 59 ຄົນ, ສາມາດຢຶດຂອງກາງປະເພດຢາບ້າ ຈຳນວນ 3.121.423 ເມັດ, ຢາໄອສ໌ 61,58 ກຣາມ, ຄັນຊາເເຫ້ງ 4.710 ກິໂລກຣາມ ແລະ ລົດໃຫຍ່ 24 ຄັນ. ຈາກນັ້ນທ່ານ ພັອ ຄຳສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງຄຳມ່ວນ, ໄດ້ຂຶ້ນຜ່ານຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 22/ຄລສພ, ລົງວັນທີ 10 ສິງຫາ 2012 ວ່າດ້ວຍການເພິ່ມທະວີການສະກັດກັ້ນ ແລະຕ້ານຢາເສບຕິດ.

ຕອນທ້າຍພິທີຍັງໄດ້ຮັບຟັງການໂອ້ລົມຈາກທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງໆຄຳມ່ວນທ່ານໄດ້ໃຫ້ຮູວ່າ: ຄະນະພັກ, ອໍານາດການປົກຄອງແຂວງຄຳມ່ວນ, ແມ່ນຮ່ວມກັບຄະນະກໍາມະການກວດກາ-ຄວບຄຸມຢາເສບຕິດ ແລະ ຂະແໜງການທີ່ກ່ຽວ ຂ້ອງພາຍໃນແຂວງໄດ້ຈັດພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 21 ປີ ແລະ ພິທີທໍາລາຍຢາເສບຕິດທີ່ສານຕັດສິນຢ່າງເດັດຂາດ. ທັງນີ້ກໍເພື່ອສະແດງເຖິງເຈດຈໍານົງ ແລະການຮ່ວມມືຂອງສັງຄົມທີ່ພ້ອມຈິດພ້ອມໃຈໃນການຕໍ່ຕ້ານກັບບັນຫາຢາເສບຕິດ ເຊິ່ງເປັນໄພຄຸກຄາມຕໍ່ການພັດທະນາເສດຖະກິດ, ຄວາມເປັນລະບຽບຮຽບຮ້ອຍຂອງສັງຄົມ ແລະຄວາມໝັ້ນຄົງຂອງຊາດ ໂດຍໃນໄລຍະຜ່ານມາພັກ-ລັດ ກໍໄດ້ເອົາໃຈໃສ່ສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດເປັນໜ້າທີ່ສໍາຄັນ ແລະ ໄດ້ນຳພາ-ຊີ້ນຳການຈັດຕັ້ງທີ່ກ່ຽວຂ້ອງປະຕິບັດວຽກງານຢ່າງຕັ້ງໜ້າ. ຕໍ່ກັບບັນຫາດັ່ງກ່າວ, ຫຼາຍພາກສ່ວນທີ່ກ່ຽວຂ້ອງກໍເອົາໃຈໃສ່ສຶກສາອົບຮົມທຸກຊັ້ນຄົນໃນສັງຄົມເປັນຕົ້ນແມ່ນຊາວໜຸ່ມ, ເຍົາວະຊົນຜູ້ທີ່ເປັນໜໍ່ແໜງຂອງຊາດໄດ້ຮັບຮູ້ ແລະເຂົ້າໃຈຢ່າງຖືກຕ້ອງກ່ຽວກັບຜົນຮ້າຍຂອງຢາເສບຕິດ.

ຈາກນັ້ນຄະນະປະທານ, ບັນດາແຂກທີ່ເຂົ້າຮ່ວມໃນພິທີ ແລະຄະນະຮັບຜິດຊອບກວດກາເຄື່ອງຂອງກາງກໍ່ໄດ້ນຳເອົາຢາເສບຕິດປະເພດຕ່າງໆ ທີ່ສານຕັດສິນອອກມາທຳລາຍ ປະກອບມີຢາບ້າ 115.965 ເມັດ, ນໍ້າໜັກ 11,06 ກິໂລກຼາມ, ຢາໄອສ໌ 9 ຖົງນ້ອຍ, ຄັນຊາແຫ່ງຈຳນວນ 31 ເປົາໃຫຍ່, ລວມນໍ້າໜັກ 1.257 ກິໂລກຼາມ.

แชร์