ຝຶກອົບຮົມຍົກລະດັບຄວາມຮູ້ກ່ຽວກັບສຸຂະພາບຈິດ

ໂຮງໝໍມະໂຫສົດໄດ້ຈັດກອງປະຊຸມຄັ້ງທີ II ໂຄງການຝຶກອົບຮົມຍົກລະດັບຄວາມຮູ້ກ່ຽວກັບສຸຂະພາບຈິດພາຍໃຕ້ການສະໜັບສະໜູນຂອງອົງການສະວິດລາວຮ໋ອສປີໂຕໂປຣເຈັກ (SWISS LOAS HOSPITAL PROJECT) ຂຶ້ນໃນລະຫວ່າງວັນທີ 17 - 21 ຕຸລາ 2022 ທີ່ໂຮງໝໍມະໂຫສົດ. ໂດຍການເປັນປະທານຮ່ວມເປີດຂອງ ທ່ານ ຊູຊາດ ວົງພະຈັນ ຜູ້ອໍານວຍການໂຮງໝໍມະໂຫສົດ; ທ່ານ ອີມີລິໂອ ໂບລ່າ (Dr.Emillio Bolla) ຕາງໜ້າອົງການສະວິດລາວຮ໋ອສປີໂຕໂປຣເຈັກ (SWISS LOAS HOSPITAL PROJECT) ພ້ອມດ້ວຍທີມງານອາຈານຊ່ຽວຊານສຸຂະພາບຈິດ ຈາກສະວິດເຊີແລນ, ມີຄະນະອຳນວຍການ, ວິທະຍາກອນ, ນັກສຳມະນາກອນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ຊູຊາດ ວົງພະຈັນ ໄດ້ກ່າວວ່າ: ການຝຶກອົບຮົມ ກ່ຽວກັບສຸຂະພາບຈິດໃຫ້ພະນັກງານແພດໝໍຂັ້ນສູນກາງຊຶ່ງປະກອບມີໂຮງໝໍມະໂຫສົດ, ໂຮງໝໍເສດຖາທິຣາດ, ໂຮງໝໍມິດຕະພາບ, ໂຮງໝໍເດັກ, ໂຮງໝໍແມ່ ແລະ ເດັກເກີດໃໝ່, ໂຮງໝໍ 103 ກອງທັບ ແລະ ໂຮງໝໍ 5 ເມສາ ແລະ ມີນັກສຶກສາແພດຊ່ຽວ ຊານສະເພາະທາງ (ພາຍໃນ, ພາຍນອກ, ເດັກ ແລະ ສຸກເສີນ-ວາງຢາສະຫຼົບ), ໃນການຝຶກອົບຮົມຄັ້ງນີ້ບັນດານັກສໍາມະນາກອນແມ່ນຈະໄດ້ຮຽນຮູ້ກ່ຽວກັບໂຣກຈິດ, ໂຣກປະສາດ, ໂດຍສະເພາະແມ່ນຢູ່ໃນໂຣກຈິດຂອງໄວເດັກ, ໄວໜຸ່ມ ແລະໄວຜູ້ໃຫຍ່ເນັ້ນໜັກໄປເຖິງພະຍາດໂຣກຊຶມເສົ້າ ແລະພະຍາດຈິດແບບອື່ນໆ ທີ່ຈະໄດ້ຮຽນຮູ້ລວມເຖິງບັນຫາຜູ້ຕິດສິ່ງເສບຕິດຕ່າງໆ. ວຽກງານການກວດກາ, ບົ່ງມະຕິ ແລະ ປິ່ນປົວສຸຂະພາບຈິດ ໃນປະເທດເຮົາປັດຈຸບັນແມ່ນຍັງບໍ່ທັນໄດ້ຮັບການເສີມຂະຫຍາຍໃຫ້ດີເທົ່າທີ່ຄວນຊຶ່ງສະແດງໃຫ້ເຫັນແພດຊ່ຽວຊານສະເພາະທາງຂອງຂະແໜງການດັ່ງກ່າວໃນແຕ່ລະໂຮງໝໍແມ່ນຍັງມີຈຳນວນຈຳກັດ.

ພະຍາດສຸຂະພາບຈິດແມ່ນຍັງເປັນບັນຫາໃນທົ່ວໂລກ ແລະລວມທັງປະເທດລາວຊຶ່ງມັນເກີດມາຈາກຫຼາຍສາເຫດເຊັ່ນ: ການໃຊ້ສານເສບຕິດ,ສະພາບເສດຖະກິດ-ສັງຄົມ ແລະຄອບຄົວທີ່ມີຄວາມກົດດັນ ແລະອື່ນໆ ເຮັດໃຫ້ເປັນຜົນກະທົບຕໍ່ເສດຖະກິດ-ສັງຄົມ ໃນປັດຈຸບັນ ແລະຮຽກຮ້ອງໃຫ້ໄດ້ຮັບການແກ້ໄຂ, ເພື່ອຊ່ວຍໃຫ້ຄົນເຈັບທີ່ເປັນພະຍາດດັ່ງກ່າວ ສາມາດດຳລົງຊີວິດຢູ່ໃນສັງຄົມ ແລະ ຫຼຸດຜ່ອນການສ້າງບັນຫາຕ່າງໆໃຫ້ສັງຄົມ. ໃນໂອກາດນີ້ທ່ານກໍໄດ້ຮຽກຮ້ອງໃຫ້ນັກສຳມະນາກອນທັງໝົດຈົ່ງໄດ້ປະຕິບັດລະບຽບ, ປະຕິບັດໂມງເວລາໃຫ້ໄດ້ດີ ແລະ ໃຫ້ຕັ້ງໜ້າພັດທະນາຂີດຄວາມສາມາດໃນການຍາດແຍ່ງເອົາບົດຮຽນນໍາຄູ-ອາຈານ ເພື່ອໄປນໍາໃຊ້ໃນໜ້າທີ່ວຽກງານໃຫ້ປະກົດຜົນເປັນຈິງ ແລະສາມາດຖ່າຍທອດໃຫ້ເພື່ອນຮ່ວມງານດ້ວຍກັນ. ໃຫ້ຮັບປະກັນວ່າຜູ້ເຂົ້າຮ່ວມ ແລະຜູ້ຮັບການຖ່າຍທອດກໍໄດ້ຄວາມຮູ້ອັນໃໝ່ໄປດ້ວຍ, ເຮັດແນວນີ້ຈຶ່ງຮັບປະກັນວ່າເມື່ອສຳເລັດການຝຶກອົບຮົມໄປແລ້ວບັນດານັກສໍາມະນາກອນຈຶ່ງຈະສາມາດນຳເອົາບົດຮຽນທີ່ໄດ້ຮັບໄປຈັດຕັ້ງປະຕິບັດຢ່າງມີຫົວຄິດປະດິດສ້າງ ແລະໄດ້ຮັບໝາກຜົນສູງ.
ຂ່າວ-ພາບ: ຍຸພິນທອງ

แชร์