ອຸປະທູດໄທ ປະຈຳ ລາວ ເຂົ້າຮ່ວມກອງປະຊຸມວິຊາການ ນານາຊາດ

ໃນວັນທີ 17 ຕຸລາ 2022 ທ່ານນາງ ຈິຣັດສະຍາ ພີຣານົນ ອຸປະທູດແຫ່ງ ຣາຊະອານາຈັກໄທ ປະຈຳ ລາວ, ທ່ານ ພົມມະແສງ ທິບພະວົງ ຮອງຫົວໜ້າຫ້ອງການກະຊວງສຶກສາທິການ ແລະ ກິລາ ແຫ່ງ ສປປ ລາວ, ພ້ອມດ້ວຍປະເທດສະມາຊິກອາຊຽນ ແລະ ຕີມໍ-ເລສເຕ ລວມ 11 ປະເທດ ໄດ້ເຂົ້າຮ່ວມກອງປະຊຸມວິຊາການນານາຊາດ ລາງວັນສົມເດັດເຈົ້າຟ້າມະຫາຈັກກຣີ ຄັ້ງທີ 4 ແບບທາງໄກ ທີ່ຈັດໂດຍມູນນິທິລາງວັນສົມເດັດເຈົ້າຟ້າມະຫາຈັກກຣີທີ່ປະເທດໄທໂດຍການເປັນປະທານ ຂອງສະເດັດສົມເດັດພະກະນິດຖາທິຣາດເຈົ້າ ກົມສົມເດັດພະເທບພະຣັດຣາດສຸດາສະຫຍາມບໍຣົມມະຣາດຊະກຸມາຣີ.

 

ກອງປະຊຸມວິຊາການ ນານາຊາດ ລາງວັນສົມເດັດເຈົ້າຟ້າມະຫາຈັກກຣີ ຄັ້ງທີ 4 ເພື່ອເຜີຍແຜ່ພະກຽດຕິຄຸນດ້ານການສຶກສາໃນສົມເດັດພະກະນິດຖາທິຣາດເຈົ້າກົມສົມເດັດພະເທບພະຣັດຣາດສຸດາສະຫຍາມບໍຣົມມະຣາດຊະກຸມາຣີ ແລະໄດ້ຮັບພະມະກະລຸນາທິຄຸນຊົງພະກະລຸນາໂປດເກົ້າສະເດັດພະຣາດຊະດຳເນີນຊົງ.

ໂອກາດດັ່ງກ່າວ, ສະເດັດສົມເດັດພະກະນິດຖາທິຣາດເຈົ້າກົມສົມເດັດພະເທບພະຣັດຣາດສຸດາສະຫຍາມບໍຣົມມະຣາດຊະກຸມາຣີ ພະຣາດຊະທານພະຮາດຊະດຳຣັດຊົງ ໄດ້ຮັບຟັງການລາຍງານກ່ຽວກັບ ຜົນງານຂອງຄູ ລາງວັນສົມເດັດເຈົ້າຟ້າມະຫາຈັກກຣີ ຮຸ່ນທີ 4 ປີ 2021 ຂອງປະເທດສະມາຊິກອາຊຽນ ແລະ ຕີມໍ-ເລສເຕ 11 ປະເທດໃນນັ້ນຄູຈາກ ສປປ ລາວ ທ່ານນາງ ແສງເພັດ ຄູນປະເສີດ ກໍໄດ້ຮັບຄູລາງວັນປະຈຳປີ 2021 ເຊັ່ນດຽວກັນ.

ມູນນິທິ ລາງວັນສົມເດັດເຈົ້າຟ້າມະຫາຈັກກຣີ ໄດ້ຮັບການອະນຸມັດຈາກສົມເດັດພະກະນິດ ຖາທິຣາດເຈົ້າ ກົມສົມເດັດພະເທບພະຣັດຣາດສຸດາ ສະຫຍາມບໍຣົມມະຣາດຊະກຸມາຣີ ໃນການຈັດຕັ້ງ ເພື່ອຄັດເລືອກຄູ ຜູ້ສ້າງການປ່ຽນແປງແກ່ຊີວິດລູກສິດ ແລະ ມີຄຸນງາມຄວາມດີຕໍ່ວົງການສຶກສາ ຈາກປະ ເທດໃນອາຊີຕາເວັນອອກສ່ຽງໃຕ້ ແລະ ຕີມໍ-ເລສເຕ ລວມ 11 ປະເທດ. ໂດຍດຳເນີນການຄັດເລືອກທຸກໆ 2 ປີ ເຊິ່ງຜ່ານມາ ຄູຈາກ ສປປປ ລາວ ກໍໄດ້ຮັບລາງວັນດັ່ງກ່າວເຊັ່ນ: ທ່ານນາງ ຄຳສ້ອຍ ວົງສຳພັນ ໂຮງຮຽນມັດທະຍົມສົມບູນວຽງຈັນ ປີ 2015, ທ່ານນາງ ຄູນວິໄລ ເກດກິຕິສັກ ໂຮງຮຽນປະຖົມສຶກສາທົ່ງກາງ, ນະຄອນຫລວງວຽງຈັນ ປີ 2017, ທ່ານ ໄພສະນິດ ປັນຍາສະຫວັດ ຄູໂຮງຮຽນມັດທະຍົມສືຶກສາສັນຕິພາບ,ແຂວງຫລວງພະບາງ ປີ 2019, ແລະທ່ານ ນາງ ແສງເພັດ ຄູນປະເສີດ ໂຮງຮຽນມັດທະຍົມສົມບູນ, ແຂວງອຸດົມໄຊ ປີ 2021.
ຂ່າວ-ພາບ: ສະຖານທູດໄທ ປະຈຳລາວ

แชร์