ບໍລິສັດ ພູເບ້ຍ ມາຍນິງ ໄດ້ຮັບລາງວັນດີເດັ່ນອາຊຽນ

ໂຄງການຕ້ານ HIV ແລະ Aids ດີເດັ່ນຂອງບໍລິສັດ ພູເບ້ຍ ມາຍນິງ ໄດ້ຮັບລາງວັນດີເດັ່ນອາຊຽນ ຄັ້ງທີ 4 ໃນການຈັດຕັ້ງປະຕິບັດການປ້ອງກັນ ແລະຄວບຄຸມການແຜ່ລະບາດຂອງພະຍາດ HIV/Aids ໃນສະຖານທີ່ເຮັດວຽກ (4th ASEAN Red Ribbon for Outstanding Workplace (ARROW) Awards) ໃນໂອກາດກອງປະຊຸມອາຊຽນ ຄັ້ງທີ 8 ກ່ຽວກັບການມີສ່ວນຮ່ວມຂອງພາກທຸລະກິດໃນການປ້ອງກັນ ແລະຄວບຄຸມການແຜ່ລະບາດຂອງພະຍາດ HIV/Aids ໃນສະຖານທີ່ເຮັດວຽກ (8th Meeting of the ASEAN Business Coalition on HIV and AIDS) ເຊິ່ງຈັດຂຶ້ນຢູ່ປະເທດສິງກະໂປ ວັນທີ 12-13 ຕຸລາ 2022.

ລາງວັນດີເດັ່ນຂອງສະມາຄົມປະຊາຊາດແຫ່ງອາຊີຕາເວັນອອກສ່ຽງໃຕ້ໃນການຈັດຕັ້ງປະຕິບັດການປ້ອງກັນ ແລະຄວບຄຸມການແຜ່ລະບາດຂອງພະຍາດ HIV/Aids ໃນສະຖານທີ່ເຮັດວຽກ ປະຈໍາປີ 2022 ຍ້ອງຍໍບັນດາບໍລິສັດຢູໃນຂົງເຂດອາຊີຕາເວັນອອກສ່ຽງໃຕ້ ທີ່ຈັດຕັ້ງປະຕິບັດແຜນລິເລີ່ມຕ່າງໆ ເພື່ອສ້າງສະພາບແວດລ້ອມໃນການເຮັດວຽກໃຫ້ມີຄວາມປອດໄພ ແລະ ດີຕໍ່ສຸຂະພາບ ຜ່ານການໂຄສະນາເຜີຍແຜ່ກ່ຽວກັບ HIV/Aids ຄວາມຮັບຜິດຊອບຂອງອົງກອນຕໍ່ສັງຄົມ ແລະແຜນງານປົກປ້ອງພະນັກງານ ນັບແຕ່ປີ 2016 ລາງວັນອາຊຽນ ARROW ໄດ້ຈັດຂຶ້ນທຸກໆ 2 ປີ ແລະປີນີ້ ເປັນຄັ້ງທໍາອິດທີ່ບັນດາບໍລິສັດໃນລາວໄດ້ຖືກເຊື້ອເຊີນໃຫ້ເຂົ້າຮ່ວມ.


ເດືອນສິງຫາ 2022 ຄະນະກໍາມະການຄັດເລືອກຜູ້ເຂົ້າຊີງລາງວັນຂອງລັດຖະບານລາວໄດ້ຄັດຈ້ອນບໍລິສັດ ພູເບ້ຍ ມາຍນິງ ແລະອີກ 2 ບໍລິສັດ ໂດຍລັດຖະບານລາວ ໄດ້ຄັດເລືອກບໍລິສັດ ພູເບ້ຍ ມາຍນິງ ໃຫ້ເປັນບໍລິສັດຕາງໜ້າປະເທດລາວເຂົ້າຊີງລາງວັນນີ້ ເຊິ່ງເປັນການຮັບຮູ້ເຖິງແຜນລິເລີ່ມປະຕິບັດທີ່ດີຂອງບໍລິສັດໃນການປ້ອງກັນພະຍາດ HIV ແລະ Aids ແນໃສ່ບັນດາພະນັກງານຜູ້ຮັບເໝົາ ແລະຊຸມຊົນຂອງບໍລິສັດໃນແຂວງໄຊສົມບູນແຜນງານຂອງບໍລິສັດອອກແບບມາເພື່ອເພີ່ມຄວາມຮູ້ ແລະປູກຈິດສໍານຶກກ່ຽວກັບການຕິດເຊື້ອທາງເພດສໍາພັນ ແລະການປ້ອງກັນພະຍາດ HIV ການປິ່ນປົວ ແລະການເບິ່ງແຍງຮັກສາ ຕໍ່ສູ້ກັບການລັງກຽດ ແລະການແບ່ງແຍກຂັບເຄື່ອນການໂຕ້ວາທີ ແລະສະໜອງການສະໜັບສະໜູນດ້ານການແພດໃຫ້ຄົນທີ່ຕິດເຊື້ອ HIV,

ທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍ ມາຍນິງ ກ່າວວ່າ: ບໍລິສັດ ຮູ້ສຶກເປັນກຽດທີ່ໄດ້ຮັບລາງວັນ ARROW ໃນນາມສະພາບໍລິຫານຂອງບໍລິສັດ ພູເບ້ຍ ມາຍນິງ ຕົນຂໍຂອບໃຈລັດຖະບານລາວ ທີ່ໄດ້ຄັດເລືອກບໍລິສັດເຂົ້າຊີງລາງວັນນີ້ ແລະ ຂໍຂອບໃຈອົງການປະຊາຄົມທຸລະກິດອາຊຽນຕ້ານ HIV ແລະ Aids ໃນການຮັບຮູ້ເຖິງຜົນງານຂອງບໍລິສັດການໄດ້ຮັບລາງວັນດັ່ງກ່າວສະແດງໃຫ້ເຫັນຄວາມພະຍາຍາມຂອງບໍລິສັດທີ່ປະຕິບັດສອດຄ່ອງກັບແນວທາງຂອງລັດຖະບານລາວ ແລະ ອົງການສາທາລະນະສຸກເພື່ອປ້ອງກັນການລະບາດຂອງພະຍາດ HIV ແລະ Aids ໃນເຂດດໍາເນີນງານຂອງບໍລິສັດ ແລະບັນດາຊຸມຊົນຕົນຂໍສະແດງຄວາມຂອບໃຈ ແລະ ຊົມເຊີຍພະນັກງານທຸກຄົນທີ່ໄດ້ປະກອບສ່ວນໃຫ້ແຜນງານດັ່ງກ່າວໂດຍສະເພາະທີມງານແພດປະຈໍາສະໜາມສໍາລັບວິທີທີ່ພົ້ນເດັ່ນເພື່ອຈັດຕັ້ງປະຕິບັດໂຄງການສຸຂະພາບ ແລະຄວາມປອດໄພ ເຊິ່ງປ້ອງກັນພະນັກງານ ແລະຊຸມຊົນຂອງບໍລິສັດ.

แชร์