ກະຊວງ ຕສ ເປີດຝຶກອົບຮົມວຽກງານກໍ່ສ້າງພັກ ຊຸດທີ IV

ກະຊວງເຕັກໂນໂລຊີ ແລະການສື່ສານ (ຕສ) ໄດ້ເປີດຝຶກອົບຮົມວຽກງານກໍ່ສ້າງພັກ ຊຸດທີ IV ໃຫ້ບັນດາເລຂາ, ຮອງເລຂາ, ຄະນະໜ່ວຍພັກ, ຄະນະພັກຮາກຖານ ແລະ ບັນດາກອງເລຂາບັນດາໜ່ວຍພັກ ຂຶ້ນເມື່ອວັນທີ 17 ຕຸລາ 2022 ທີ່ກະຊວງດັ່ງກ່າວໂດຍການເປັນປະທານຂອງ ທ່ານ ສັນຕິສຸກ ສິມມາລາວົງ ຮອງເລຂາຄະນະພັກ ຮອງລັດຖະມົນຕີກະຊວງ ຕສ, ມີຄະນະປະຈຳພັກ, ມີພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ສັນຕິສຸກ ສິມມາລາວົງ ກ່າວວ່າ: ວຽກງານກໍ່ສ້າງພັກເປັນວຽກງານທີ່ສຳຄັນ ແລະເປັນວຽກທີ່ຕ້ອງໄດ້ເອົາໃຈໃສ່ເຮັດຢ່າງຈິງຈັງຊຶ່ງຈະເຮັດໃຫ້ພວກເຮົາໄດ້ເຂົ້າໃຈກ່ຽວກັບບົດບາດການນຳພາຂອງພັກຊຶ່ງບັນດາທ່ານທີ່ເຂົ້າຮ່ວມຝຶກອົບຮົມໃນຄັ້ງນີ້ຈະຮັບຮູ້ ແລະເຂົ້າໃຈກ່ຽວກັບຄວາມໝາຍຂອງວຽກງານກໍ່ສ້າງພັກ, ບັນດາເນື້ອໃນ ແລະ ທິດທາງຂອງການນຳພາຂອງພັກຢ່າງເລິກຊຶ່ງ. ພັກເຮົາມີຄວາມຮັບຜິດຊອບຕໍ່ສັງຄົມ ແລະ ຕັດສິດຊາຕາກຳຂອງປະເທດຊາດ,ຮັບປະກັນໃຫ້ປະເທດຊາດຂະຫຍາຍຕົວກ້າວຂຶ້ນຕາມທິດທາງ ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມມີຄວາມປອງດອງ, ມີປະຊາທິປະໄຕ, ຍຸຕິທຳ, ສີວິໄລ. ແຕ່ຈະເຮັດໄດ້ ຫຼືບໍ່ນັ້ນບັນຫາທີ່ເປັນພື້ນຖານກ່ອນໝູ່ແມ່ນພວກເຮົາຕ້ອງໄດ້ຍົກສູງບົດບາດການນຳພາຂອງພັກໃຫ້ທຽບທັນກັບຄວາມຮຽກຮ້ອງຕ້ອງການຂອງການພັດທະນາ ແລະສົມຄູ່ກັບພາລະກຳປະຫວັດສາດໃນໄລຍະໃໝ່ດັ່ງທີ່ປະເທດຊາດພວກເຮົາພົບຢູ່ໃນປັດຈຸບັນ. ຢາກເຮັດໄດ້ແນວນັ້ນພວກເຮົາຕ້ອງໄດ້ເອົາໃຈໃສ່ຍົກສູງການນຳພາອຳນາດລັດຂຶ້ນຕື່ມ, ເສີມຂະຫຍາຍບົດບາດ ແລະຄວາມສາມາດໃນການຜັນຂະຫຍາຍແນວທາງຂອງພັກໃຫ້ເປັນນະໂຍບາຍ, ເປັນແຜນລະອຽດຂອງບັນດາກົມກອງຂອງພວກເຮົາ.

ທ່ານຮອງເລຂາພັກຍັງໄດ້ຮຽກຮ້ອງໃຫ້ບັນດາໜ່ວຍພັກ, ບັນດາຄະນະພັກຮາກຖານ, ບັນດາອົງການຈັດຕັ້ງມະຫາຊົນພ້ອມດວ້ຍບັນດາສະຫາຍສະມາຊິກພັກຈົ່ງສືບຕໍ່ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກກໍຄືມະຕິກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ II ຂອງອົງຄະນະພັກກະຊວງເຕັກໂນໂລຊີ ແລະການສື່ສານເຂົ້າໃນວຽກງານຕົວຈິງຂອງແຕ່ລະພາກສ່ວນໂດຍເລີ່ມຈາກວຽກງານການເມືອງ-ແນວຄິດ ເປັນກົກເພື່ອໃຫ້ສະມາຊິກພັກ-ພະນັກງານເຂົ້າໃຈ ແລະ ສະດວກໃນການຈັດຕັ້ງປະຕິບັດໂດຍສະເພາະແມ່ນວຽກງານທີ່ກ່ຽວຂ້ອງຂອງແຕ່ລະພາກສ່ວນກ່ຽວກັບການພັດທະນາພະນັກງານພາຍໃນກົມກອງໂດຍອີງໃສ່ບົດຮຽນໃນການຝຶກອົບຮົມວຽກງານກໍ່ສ້າງພັກໃນຄັ້ງນີ້ນຳໄປຊີ້ນໍາ-ນໍາພາ ແລະຈັດຕັ້ງປະຕິບັດຢູ່ພາຍໃນໜ່ວຍພັກ ໃຫ້ເກີດຜົນ ແລະມີຜົນສໍາເລັດເປັນກ້າວໆ.

ການຝຶກອົບຮົມຄັ້ງນີ້ແມ່ນຈະໄດ້ດຳເນີນເປັນ ເວລາ 4 ວັນຈຶ່ງຈະສຳເລັດ ຊຶ່ງມີນັກຝຶກອົບຮົມເຂົ້າຮ່ວມ 71 ທ່ານ ຍິງ 23 ທ່ານ ຊຶ່ງຜູ້ເຂົ້າຮ່ວມຈະໄດ້ຮັບຟັງການສະເໜີບົດຍົກສູງຄຸນນະພາບການຈັດຕັ້ງຮາກຖານພັກໃຫ້ປອດໃສ, ເຂັ້ມແຂງ, ໜັກແໜ້ນ, ການຕີລາຄາຄຸນນະພາບ, ແບ່ງປະເພດສະມາຊິກພັກ ແລະໜ່ວຍພັກ, ເພີ່ມທະວີການຄຸ້ມຄອງ ແລະ ລະບຽບການຍົກຍ້າຍຮ່ວມຊີວິດພັກ, ເນື້ອໃນພື້ນຖານກ່ຽວກັບວຽກງານປ້ອງກັນພັກ-ພະນັກງານ, ຂໍ້ຕົກລົງຂອງຄະນະເລຂາທິການສູນກາງພັກ ເລກທີ 02/ຄລສພ, ລົງວັນທີ 24/12/2010 ວ່າດ້ວຍວຽກງານປ້ອງກັນພັກໃນໄລຍະ ໃໝ່ ແລະ ສະເໜີ ແຈ້ງການແນະນຳການກໍ່ສ້າງມະຫາຊົນກ້າວໜ້າ ແລະຂັ້ນຕອນການປະກອບເອກະສານເພື່ອຂະຫຍາຍເຂົ້າເປັນສະມາຊິກພັກປະຊາຊົນ ປະຕິວັດລາວ ຢູ່ອົງຄະນະພັກກະຊວງ ຕສ.
(ຂ່າວ-ພາບ: ສຳນານ)

แชร์