ໄອແຄ ຮ່ວມວິທະຍາໄລປາກປ່າສັກ ກຽມສ້າງຄົນດ້ານວິຊາການແບບຢືນຢົງ

ວັນທີ 14 ຕຸລາ 2022 ທີ່ວິທະຍາໄລເຕັກນິກປາກປ່າສັກ ນະຄອນຫຼວງວຽງຈັນ ຈັດພິທີເຊັນສັນຍາວ່າດ້ວຍການຮ່ວມມືທາງດ້ານວິຊາການ ແລະຊັບພະຍາກອນມະນຸດແບບຢືນຢົງພ້ອມດ້ວຍສະໜອງທຶນການສຶກສາໃຫ້ກັບນັກຮຽນດ້ອຍໂອກາດລະຫວ່າງວິທະຍາໄລເຕັກນິກປາກປ່າສັກ ແລະບໍລິສັດ ໄອແຄ ບໍລິການ ຈຳກັດ ໂດຍລົງນາມໃນເອກະສານມີຂຶ້ນລະຫວ່າງທ່ານ ບຸນເພັງ ສົມຈັນມະນີ ຜູ້ອຳນວຍການວິທະຍາໄລເຕັກນິກປາກປ່າສັກກັບທ່ານ ນາງ ພຸດທະວົງ ສີວິໄລ ຜູ້ອຳນວຍການບໍລິສັດ ໄອແຄ ບໍລິການ ຈຳກັດມີທ່ານ ສາຍຄຳ ພັນທະວົງ ຮອງຫົວໜ້າກົມອາຊີວະສຶກສາກະຊວງສຶກສາທິການ ແລະກີລາ ພ້ອມພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພະຍານ.


ທ່ານ ນາງ ພຸດທະວົງ ສີວິໄລ ກ່າວວ່າ: ບໍລິສັດ ໄອແຄ ໄດ້ໃຫ້ຄວາມສຳຄັນທາງດ້ານການພັດທະນາຊັບພະຍາກອນມະນຸດເຊິ່ງຄຽງຄູ່ໄປກັບການໃຫ້ການສຶກສາວິຊາສະເພາະ ທີ່ສາມາດນຳໃຊ້ໃນການລ້ຽງຊີບພວກເຂົາແທ້ໆ ພວກເຮົາໃຫ້ຄວາມສຳຄັນຫຼາຍໃນການທີ່ຈະສ້າງຄົນໃຫ້ມີຄຸນນະພາບມີວິຊາອາຊີບ ແລະທີ່ສຳຄັນພວກເຂົາຕ້ອງມີລາຍຮັບທີ່ສາມາດກຸ້ມຕົວເອງ ແລະມີອາຊີບທີ່ໝັ້ນຄົງ ມີສະຫວັດດີການທີ່ເໝາະສົມກັບລາຍຮັບໃນການດຳລົງຊີວິດ ແລະພວກເຂົາຕ້ອງໄດ້ຮັບການຄຸ້ມຄອງໃນການຈ້າງງານບົນພື້ນຖານຂອງກົດໝາຍການໃຊ້ແຮງງານຂອງ ສປປ ລາວ ບໍ່ວ່າຈະເປັນການຄຸ້ມຄອງທາງຊັບສິນ ຊີວິດ ແລະຈິດໃຈຂອງບຸກຄົນດັ່ງກ່າວ.

ເນື່ອງຈາກການຈ້າງງານດ້ານບໍລິການຫຼຸດໜ້ອຍລົງຮ້ານອາຫານໂຮງແຮມມີການປິດຕົວລົງ ແລະບໍ່ສາມາດກັບມາໃຫ້ບໍລິການໄດ້ເນື່ອງຈາກການແຜ່ລະບາດພະຍາດໂຄວິດ-19 ສະພາບເສດຖະກິດອັດຕາເງິນມີການເໜັງຕິງເຮັດໃຫ້ມີຫຼາຍທຸລະກິດບໍ່ສາມາດຈ້າງງານໄດ້ເຕັມອັດຕາເນື່ອງຈາກຕ້ອງຄວບຄຸມຄ່າໃຊ້ຈ່າຍຍ້ອນປັນຫາດັ່ງກ່າວ ບໍລິສັດ ໄອແຄ ຈຶ່ງໄດ້ເຫັນບັນຫາຫຍໍ້ທໍ້ໃນການສຶກສາປາກົດການຫຍໍ້ທໍ້ໃນການຫາວຽກເຮັດງານທຳພວກເຮົາຈຶ່ງມີເປົ້າໝາຍໃນການສ້າງແຮງງານທຸກປະເພດເຊັ່ນ: ແຮງງານໄຮ້ສະພາບແມ່ຍິງ ແລະເດັກນ້ອຍອາຍຸ 16 ປີຂື້ນໄປ ນັກສຶກສາທີ່ກຳລັງສຶກສາຢູ່ນັກສຶກສາທີ່ຈົບໃໝ່ນັກສຶກສາທຸກຍາກ ຫຼືບຸກຄົນຫວ່າງງານທີ່ຖືກເລີກຈ້າງລວມເຖິງບັນດາແພດໝໍພະຍາບານຄູອະນຸບານທີ່ຕ້ອງການຫາລາຍໄດ້ເສີມພວກເຮົາກໍພ້ອມທີ່ຈະຈັດຫາງານບົນຄວາມເໝາະສົມຂອງແຕ່ລະສາຂາວິຊາລວມເຖິງຜູ້ທີ່ໃຊ້ແຮງງານບໍ່ມີວິຊາສະເພາະໃນການຫາວຽກເຮັດງານທຳຕາມຄົວເຮືອນ ເພື່ອຕອບສະໜອງຄວາມຕ້ອງການແຮງງານຕາມເຮືອນໃນຍຸກປັດຈຸບັນທີ່ຄົນເມືອງໃຫຍ່ໄດ້ພົບພໍ້ກໍຄືການບໍລິຫານເວລາໃນຂະນະທີ່ການໃຊ້ຊີວິດໃນເມືອງໃຫຍ່ມີຄວາມຫຍຸ້ງຫຍາກ ຄືການແຂ່ງຂັນກັບເວລາສະນັ້ນບໍລິສັດ ໄອແຄ ຈຶ່ງສ້າງຕັ້ງຂຶ້ນມາເພື່ອແກ້ບັນຫາດັ່ງກ່າວ ແລະເນື່ອງຈາກວ່າພວກເຮົາເປັນບໍລິສັດທີ່ສ້າງຕັ້ງມາບົນພື້ນຖານການຊ່ວຍເຫຼືອສັງຄົມຄຽງຄູ່ກັບການພັດທະນາປະເທດຊາດໄປນຳກັນບຸກຄົນຕ່າງໆທີ່ເຮົາເວົ້າມາພວກເຂົາສາມາດຫາລາຍໄດ້ເພີ່ມ ແລະ ສ້າງອາຊີບທີ່ໝັ້ນຄົງໃຫ້ກັບພວກເຂົາສ້າງຊີວິດການເປັນຢູ່ໃຫ້ພວກເຂົາແບບຢືນຍົງເພື່ອໃຫ້ເກີດປະໂຫຍດແກ່ຕົວບຸກຄົນຜູ້ໃຊ້ແຮງງານແກ່ສັງຄົມ ແລະແນ່ນອນກໍເພື່ອປະເທດຊາດຂອງພວກເຮົາ.

ຂ່າວ ບຸນນິກ

แชร์