ງານເທດສະການສະຕາດອັບລາວ ປີ 2022 ຈະຈັດຂື້ນໃນວັນທີ 16-18 ທັນວາ

ວັນທີ 14 ຕຸລາ 2022 ທີ່ນະຄອນຫຼວງວຽງຈັນ ກົມສົ່ງເສີມວິສາຫະກິດຂະໜາດນ້ອຍ ແລະກາງ (ກສວ), ກະຊວງອຸດສາຫະກໍາຮ່ວມກັບສະມາຄົມການຄ້າໄອຊີທີລາວ (LICA) ພາຍໃຕ້ການສະໜັບສະໜູນຂອງໂຄງການເຂົ້າເຖິງແຫຼ່ງທຶນຂອງ SME (MSME A2F-ESR) ຂອງທະນາຄານໂລກ ແລະໂຄງການ USAIDLao Business Environment Project (USAID-LBE) ໄດ້ຈັດພິທີຖະແຫຼງຂ່າວງານເທດສະການສະຕາດອັບລາວ ປະຈໍາປີ 2022 (Lao Startup Fest 2022) ໂດຍໃຫ້ກຽດເປັນປະທານຂອງທ່ານ ບຸນເພັງ ສີບຸນເຮືອງ ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະກາງ, ທ່ານ ທະນູສອນ ພົນອາມາດປະທານສະມາຄົມການຄ້າໄອຊີທີລາວ, ຜູ້ຕາງໜ້າຈາກທະນາຄານໂລກ ແລະທ່ານ Malvin Spence, COP, USAID-LBE, ມີບັນດາຜູ້ຕາງໜ້າຈາກອົງການຈັດຕັ້ງທັງພາກລັດ, ສະຖາບັນການສຶກສາຈາກພາກລັດ ແລະເອກະຊົນເຂົ້າຮ່ວມ.

ທ່ານ ບຸນເພັງ ສີບຸນເຮືອງ ກ່າວວ່າ: ການຈັດງານເທດສະການສະຕາດອັບລາວ Lao Startup Fest 2022 ເປັນກິດຈະກຳໜຶ່ງທີ່ສຳຄັນຊຶ່ງເປັນການຈັດຕັ້ງຜັນຂະຫຍາຍແຜນພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ 2021-2025 ທີ່ຖືກຮັບຮອງໂດຍທ່ານນາຍົກລັດຖະມົນຕີ ສະບັບເລກທີ 183/ນຍ, ລົງວັນທີ 17 ມິຖຸນາ 2022, ກົດໝາຍວ່າດ້ວຍການສົ່ງເສີມ SME (ສະບັບປັບປຸງ) ສະບັບເລກທີ 16/ສພຊ, ລົງວັນທີ 7 ກໍລະກົດ 2022 ແລະທັງເປັນການຜັນຂະຫຍາຍຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ນອກຈາກນັ້ນ, ກໍເປັນການສົ່ງເສີມທຸລະກິດສະຕາດອັບໃຫ້ສາມາດເຂົ້າເຖິງຕະຫຼາດທັງພາຍໃນ ແລະຕ່າງປະເທດ, ທັງເປັນການເຜີຍແຜ່ສ້າງຈິດສຳນຶກໃຫ້ແກ່ຜູ້ປະກອບກິດຈະການທຸລະກິດສະຕາດອັບກ່ຽວກັບກົດໝາຍ ແລະລະບຽບການທີ່ກ່ຽວຂ້ອງ.

ການຈັດງານດັ່ງກ່າວແມ່ນຈະໄດ້ຈັດຂື້ນໃນວັນທີ 16-18 ທັນວາ 2022 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ສຳລັບກິດຈະກຳພາຍໃນງານແມ່ນຈະມີການວາງສະແດງຜະລິດຕະພັນ ແລະ ການບໍລິການຂອງຜູ້ປະກອບກິດຈະການສະຕາດອັບລາວ, ເວທີເຜີຍແຜ່ນະໂຍບາຍຕ່າງໆຈາກພາກລັດ ແລະ ແລກປ່ຽນບົດຮຽນຈາກຜູ້ປະກອບກິດຈະການສະຕາດອັບຈາກພາຍໃນ ແລະ ຕ່າງປະເທດ ແລະ ການແຂ່ງຂັນສະຕາດອັບລາວ (Lao Startup Award).

แชร์