ທ​ຫລ ປະ​ກາດ​ນຳ​ໃຊ້​ທະ​ນະ​ບັດ​ໃບ 10 ແລະໃບ 20 ພັນ​ກີບ ​ຮູບ​ແບ​ບໃໝ່

ເມື່ອ​ວັນ​ທີ 14 ຕຸ​ລາ​ຜ່ານ​ມາທີ່​ທະ​ນາ​ຄານ​ແຫ່ງ ສ​ປ​ປ ລາວ (ທ​ຫລ) ໄດ້​ມີ​ພິ​ທີ​ຖະ​ແຫຼງ​ຂ່າວ​ກ່ຽວ​ກັບ​ການ​ນຳ​ເອົາ​ທະ​ນະ​ບັດ​ປະ​ເພດ​ໃບ 10 ພັນ​ກີບ ແລະ ​ໃບ 20 ພັນ​ກີບ ລຸ້ນ​ປີ 2020 (ຮູບ​ແບ​ບ​ປັບ​ປຸງ​ໃໝ່) ອອກ​ສູ່​ສັງ​ຄົມ​ເພື່ອ​ນຳ​ໃຊ້.

ທ່ານ​ ເພັດ​ສະ​ຖາ​ພອນ ແກ້ວ​ວົງ​ວິ​ຈິດ ຫົວ​ໜ້າ​ຫ້ອງ​ການ​ ທ​ຫລ ​ກ່າວ​ວ່າ: ໃນ​ເດືອນ​ຕຸ​ລາ 2022  ທ​ຫລ ຈະ​ໄດ້​ນຳ​ເອົາ​ທະ​ນະ​ບັດ​ປະ​ເພດ​ໃບ 10.000 ກີບ ແລະ 20.000 ກີບ ລຸ້ນ​ປີ 2020 (ຮູບ​ແບບ​ປັບ​ປຸງ​ໃໝ່) ​ອອກ​ສູ່​ຂອດ​ຈໍ​ລະ​ຈອນ​ເພື່ອ​ໃຫ້​ສັງ​ຄົມ​ໄດ້​ຊົມ​ໃຊ້, ນັບ​ແຕ່​ປີ 2003 ເປັນ​ຕົ້ນ​ມາ ທ​ຫລ ໄດ້​ນຳ​ເອົາ​ທະ​ນະ​ບັດ​ປະ​ເພດ​ໃບ 10 ພັນ​ກີບ ແລະ​ໃບ 20 ພັນ​ກີບ ລຸ້ນ​ປີ 2003 ອອກ​ສູ່​ຂອດ​ຈໍ​ລະ​ຈອນ​ໃຫ້​ສັງ​ຄົມ​ໄດ້​ຊົມ​ໃຊ້ຊຶ່ງ​ເປັນ​ໂຄງ​ປະ​ກອບ​ປະ​ເພດ​ໃບ​ທະ​ນະ​ບັດ​ທີ່​ມີ​ມູນ​ຄ່າ​ສູງ​ສຸດ​ໃນ​ເວ​ລານັ້ນ, ມາ​ຮອດ​ປະ​ຈຸ​ບັນ​ຖືກ​ນຳ​ໃຊ້​ໝູນ​ວຽນ​ໃນ​ສັງ​ຄົມ​ເປັນ​ເວ​ລາ 19 ປີ, ປະ​ກອບ​ກັບ​ການ​ຂະ​ຫຍາຍ​ຕົວ​ທາງ​ດ້ານ​ນະ​ວັດ​ຕະ​ກຳ​ເຕັກ​ໂນ​ໂລ​ຊີ​ໄລ​ຍະ​ໃໝ່, ບັນ​ດາ​ປະ​ເທດ​ໃນ​ພາກ​ພື້ນ ແລະ​ສາ​ກົນກໍ​ໄດ້​ມີ​ການ​ພັດ​ທະ​ນາ​ປັບ​ປຸງ​ທະ​ນະ​ບັດ​ຂອງ​ຕົນ​ເອງ​ໃຫ້​ມີ​ຄຸນ​ນະ​ພາບ ແລະ​ຕ້ານ​ການ​ປອມ​ແປງ​ໃຫ້​ມີ​ປະ​ສິດ​ທິ​ຜົນຫຼາຍ​ຂຶ້ນກວ່າ​ເກົ່າ.

ສະ​ນັ້ນ ມາ​ຮອດ​ປີ 2018 ທ​ຫລ ໄດ້​ຄົ້ນ​ຄວ້າ​ປັບ​ປຸງ​ທະ​ນະ​ບັດ​ປະ​ເພດ​ໃບ 10 ພັນ​ກີບ ແລະ ​ໃບ20 ພັນ​ກີບ ຈາກ​ລຸ້ນປີ 2003 ມາ​ເປັນ​ລຸ້ນ​ປີ 2020 (ຮູບ​ແບບ​ປັບ​ປຸງ​ໃໝ່) ເພື່ອ​ສະ​ເໜີ​ລັດ​ຖະ​ບານ​ຮອງ​ຮັບ ແລະ ​ເຫັນ​ດີ​ອະ​ນຸ​ຍາດ​ໃຫ້​ຈັດ​ພິມ​ໃນ​ປີ 2020, ຈຸດ​ປະ​ສົງ​ຂອງ​ການ​ນຳ​ໃຊ້​ທະ​ນະ​ບັດ​ໃບ10 ພັນ​ກີບ ແລະ​ໃບ 20 ພັນ​ກີບ ອອກ​ສູ່​ສັງ​ຄົມ​ໄດ້​ນຳ​ໃຊ້​ໃນ​ຄັ້ງ​ນີ້ແມ່ນ​ເພື່ອ​ຍົກ​ສູງ​ຄຸນ​ນະ​ພາບ ແລະ​ມາດ​ຕະ​ຖານ​ຂອງ​ໃບ​ທະ​ນະ​ບັດ​ໃຫ້​ສູງ​ຂຶ້ນ​ທຽບ​ເທົ່າ​ກັບ​ທະ​ນະ​ບັດ​ຂອງ​ບັນ​ດາ​ປະ​ເທດ​ອ້ອມ​ຂ້າງ​ໃນ​ພາກ​ພື້ນ ພ້ອມ​ທັງ​ຍົກ​ລະ​ດັບ​ເຕັກ​ນິກ​ຕ້ານ​ການ​ປອມ​ແປງ​ໃຫ້​ທັນ​ສະ​ໄໝຫຼາຍ​ຂຶ້ນກວ່າ​ເກົ່າ, ມີ​ຄວາມ​ໂດດ​ເດັ່ນ​ສວຍງາມ​ສາ​ມາດ​ຈຳ​ແນກ​ປະ​ເພດ​ໃບ​ທະ​ນະ​ບັດ​ໄດ້​ງ່າຍ, ສ້າງ​ຄວາມ​ເຊື່ອ​ໝັ້ນໃຫ້​ສັງ​ຄົມ​ໃນ​ການ​ພົກ​ພາ ແລະ​ຖື​ຄອງ​ເງິນ​ກີບຊຶ່ງ​ເປັນ​ສະ​ກຸນ​ເງິນ​ຕາ​ຂອງ​ຊາດ​ໃຫ້ຫຼາຍ​ຂຶ້ນ.

ລັກ​ສະ​ນະ​ໂດຍ​ລວມເປັນ​ທະ​ນະ​ບັດ​ບໍ່​ມີ​ຂອບມີ​ຂະ​ໜາດ​ລວງ​ຍາວຫຼຸດ​ລື່ນ​ກັນ 3 ມມ ​ຄື: ປະ​ເພດ​ໃບ 10.000 ກີບ ມີ​ລວງ​ຍາວ 153 ມມ ແລະ​ລວງກວ້າງ 72ມມ ແລະ​ປະ​ເພດ​ໃບ 20.000 ກີບ ມີ​ລ​ວງ​ຍາວ 156 ມມ ແລະ​ກວ້າງ 72 ມມ, ໂທນ​ສີ​ຂອງ​ໃບ​ທະ​ນະ​ບັດ​ທັງ​ສອງ​ປະ​ເພດ​ຍັງ​ຄ້າຍ​ຄື​ກັບ​ໂທນ​ສີ​ທະ​ນະ​ບັດ​ປະ​ເພດ​ໃບ 10 ພັນ​ກີບ ແລະ​ໃບ20ພັນ​ກີບ ລຸ້ນ​ປີ 2003 ທີ່​ນຳ​ໃຊ້​ໃນ​ປະ​ຈຸ​ບັນ.

ສຳ​ລັບ​ທະ​ນະ​ບັດ​ປະ​ເພດ​ໃບ 10.000 ກີ​ບ ແລະ 20.000 ກີບ ລຸ້ນ​ປີ 2003 ທີ່​ນຳ​ໃຊ້​ໃນ​ຂອດ​ຈໍ​ລະ​ຈອນ​ປະ​ຈຸ​ບັນ​ຍັງ​ສາ​ມາດ​ນຳ​ໃຊ້​ໝູນ​ວຽນ​ເຂົ້າ​ໃນ​ການ​ຊຳ​ລະ​ສະ​ສາງ​ຊື້​ສິນ​ຄ້າ ແລະ​ບໍ​ລິ​ການ​ໄດ້​ຕາມ​ປົກ​ກະ​ຕິຈະ​ບໍ່​ມີ​ການ​ຍົກ​ເລີກ​ການ​ນຳ​ໃຊ້​ແຕ່​ຢ່າງ​ໃດ, ການ​ນຳ​ເອົາ​ທະ​ນະ​ບັດ​ປະ​ເພດ​ໃບ 10 ພັນ​ກີບ ແລະ 20 ພັນ​ກີບ ລຸ້ນ 2020 (ຮູບ​ແບບ​ປັບ​ປຸງ​ໃໝ່) ອອກ​ໃຫ້​ສັງ​ຄົມ​ໄດ້​ນຳ​ໃຊ້​ຈະ​ເລີ່ມ​ຈັດ​ຕັ້ງ​ປະ​ຕິ​ບັດ​ນັບ​ແຕ່​ເດືອນ​ຕຸ​ລາ 2022 ເປັນ​ຕົ້ນ​ໄປ.

 

แชร์