ຈີນ ກຳລັງເດີນຕາມເສັ້ນທາງ ສູ່ການເປັນສັງຄົມນິຍົມທັນສະໃໝ່ຮອບດ້ານ

 ທ່ານຊຸນ ເຢ້ລີ (Sun Yeli) ໂຄສົກກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ໄດ້ຖະແຫລງຂ່າວຕໍ່ສື່ມວນຊົນຈີນ ແລະ ສື່ຕ່າງປະເທດໃນວັນທີ 15 ຕຸລາ 2022 ນີ້ ທີ່ນະຄອນຫລວງປັກກິ່ງວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ເປັນກອງປະຊຸມທີ່ສຳຄັນ ຊຶ່ງຈັດຂຶ້ນໃນໄລຍະທີ່ທົ່ວພັກ ແລະ ປະຊາຊົນຈີນ ທຸກຊົນເຜົ່າກຳລັງເດີນຕາມເສັ້ນທາງສາຍໃໝ່ ແຫ່ງການສ້າງ ສປ ຈີນ ໃຫ້ເປັນປະເທດສັງຄົມນິຍົມທັນສະໃໝ່ຮອບດ້ານ ແລະ ບັນລຸເປົ້າໝາຍຮ້ອຍປີອັນທີສອງ.

ກອງປະຊຸມໃຫຍ່ຄັ້ງທີ 20 ຂອງພັກກອມມູນິດຈີນ ຈະຍົກສູງຄຳຂວັນ ວ່າດ້ວຍສັງຄົມນິຍົມທີ່ມີສີສັນຂອງຈີນ, ລັດທິມາກ-ເລນິນ, ແນວຄິດເໝົາເຈີຕຸງ, ທິດສະດີ ເຕິ້ງສ່ຽວຜິງ, ທິດສະດີສາມຕົວແທນ ແລະ ທິດທາງການພັດທະນາທີ່ເປັນວິທະຍາສາດ ແລະ ຈັດຕັ້ງປະຕິບັດແນວຄິດ ສີ ຈິ້ນຜິງ ວ່າດ້ວຍສັງຄົມນິຍົມທີ່ມີສີສັນຂອງຈີນ ສຳລັບຍຸກສະໄໝໃໝ່. ນອກຈາກນີ້, ກອງປະຊຸມໃຫຍ່ຍັງຈະໄດ້ປະເມີນຢ່າງຮອບດ້ານ ວຽກງານໃນ 5ປີ ຜ່ານມາ ແລະ ຜົນສຳເລັດອັນຍິ່ງໃຫຍ່ທີ່ຍາດມາໄດ້, ພ້ອມທັງບົດຮຽນອັນມີຄຸນຄ່າທີ່ຖອດຖອນໄດ້ໃນໄລຍະ 7 ປີຜ່ານມາ ກໍຄື ນັບແຕ່ໄດ້ເລີ່ມຕົ້ນຍຸກສະໄໝໃໝ່ ທີ່ຄະນະບໍລິຫານງານສູນກາງພັກ ໂດຍມີ ສະຫາຍ ສີ ຈິ້ນຜິງ ເປັນໃຈກາງ ໄດ້ເຕົ້າໂຮມ ແລະ ນຳພາ ທົ່ວພັກ ແລະ ທົ່ວປະເທດຊາດຍົກສູງ ແລະ ພັດທະນາສັງຄົມນິຍົມທີ່ມີສີສັນຂອງຈີນ ພ້ອມດຽວນີ້ ກໍຈະໄດ້ວິເຄາະຢ່າງລະອຽດສະຖານະການພາຍໃນປະເທດ ແລະ ຕ່າງປະເທດ ແລະ ກຳແໜ້ນຄວາມຮຽກຮ້ອງຕ້ອງການອັນໃໝ່ ຂອງການພັດທະນາພາລະກິດຂອງພັກ ແລະ ປະເທດຊາດ ແລະ ຄວາມປາຖະໜາອັນໃໝ່ຂອງປະຊາຊົນ ຕໍ່ກັບການເດີນທາງຄັ້ງໃໝ່ໃນຍຸກສະໄໝໃໝ່. ບົນຈິດໃຈດັ່ງກ່າວນີ້ ກອງປະຊຸມຈະໄດ້ກຳນົດແຜນງານ ແລະ ນະໂຍບາຍທີ່ສຳຄັນ ລວມທັງສ້າງແຜນ ແລະ ກະກຽມໃຫ້ແກ່ພາລະກິດຂອງພັກ ແລະ ຂອງປະເທດຊາດ.

ໃນຕອນບ່າຍວັນດຽວກັນ, ກໍມີກອງປະຊຸມກະກຽມໃຫ້ແກ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ໂດຍມີການຮັບຮອງເອົາວາລະກອງປະຊຸມໃຫຍ່ ທີ່ໄດ້ກຳນົດຫົວຂໍ້ທີ່ສຳຄັນ ສຳລັບການຄົ້ນຄ້ວາປຶກສາຫາລືໃນໄລຍະດຳເນີນກອງປະຊຸມໃຫຍ່, ໃນນີ້ມີການຮັບຟັງ ແລະ ພິຈາລະນາຄົ້ນຄວ້າບົດລາຍງານຄະນະບໍລິຫານງານສູນກາງພັກກອມມູນິດຈີນ ຊຸດທີ 19, ການສຶກສາຄົ້ນຄວ້າບົດລາຍງານວຽກງານຂອງຄະນະກຳມາທິິການສູນກາງເພື່ອກວດກາລະບຽບວິໄນ, ການພິຈາລະນາ ແລະ ຮັບຮອງເອົາລັດ ຖະທຳມະນູນພັກ ສະບັບປັບປຸງ ແລະ ເລືອກຕັ້ງຄະນະບໍລິຫານງານສູນກາງພັກ ຊຸດທີ 20 ແລະ ຄະນະກຳມາທິການສູນກາງເພື່ອກວດກາລະບຽບວິໄນ ຊຸດທີ 20.

ຂ່າວ: ແສງທອງ ພະສະຫວັດ

แชร์