ເຈົ້າໜ້າທີ່ 8 ແຂວງພາກເໜືອ ເພີ່ມຄວາມຮູ້ກ່ຽວກັບການຕ້ານອາຊະຍາກຳຂ້າມຊາດ

ໃນລະຫວ່າງວັນທີ 12-13 ຕຸລາ 2022 ນີ້,ຢູ່ນະຄອນຫລວງພະບາງ,ແຂວງຫລວງພະບາງ,ກົມສົນທິສັນຍາ ແລະກົດໝາຍກະຊວງການຕ່າງປະເທດຈັດຝຶກອົບຮົມພາກພື້ນກ່ຽວກັບ ການສ້າງຄວາມເຂັ້ມແຂງໃຫ້ແກ່ກົນໄກການຮ່ວມມື ແລະພາກປະຕິບັດທີ່ດີໃນການຈັດຕັ້ງປະຕິບັດສົນທິສັນຍາພາກພື້ນ ແລະສາກົນ ວ່າດ້ວຍການຕ້ານອາຊະຍາກຳຂ້າມຊາດທີ່ມີການຈັດຕັ້ງແລະອະນຸສັນຍາທີ່ກ່ຽວຂ້ອງໃຫ້ແກ່ພະນັກງານ ແລະເຈົ້າໜ້າທີ່ທີ່ກ່ຽວຂ້ອງ 8 ແຂວງພາກເໜືອ ພາຍໃຕ້ການສະໜັບສະໜູນຈາກກອງທຶນພິເສດການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ.

ຊຸດຝຶກອົບຮົມດັ່ງກ່າວ, ມີວິທະຍາກອນຈາກສູນກາງທີ່ມາຈາກກະຊວງການຕ່າງປະເທດ, ກະຊວງປ້ອງກັນຄວາມສະຫງົບ, ອົງການໄອຍະການປະຊາຊົນສູງສຸດ, ຜູ້ຕາງໜ້າຈາກສາທາລະນະລັດສະຫະພາບມຽນມາ ແລະຣາຊະອານາຈັກໄທ ໃນຫົວຂໍ້ທີ່ພົວພັນກັບວຽກງານການຮ່ວມມືພາກພື້ນ ແລະສາກົນໃນການຕ້ານ ແລະ ສະກັດກັ້ນອາຊະຍາກຳຂ້າມຊາດທີ່ມີການຈັດຕັ້ງ.

ການຈັດຊຸດຝຶກອົບຮົມໃນຄັ້ງນີ້, ເພື່ອແລກປ່ຽນຄໍາຄິດເຫັນ, ບົດຮຽນ ແລະແລກປ່ຽນພາກປະຕິບັດທີ່ດີໃນການຈັດຕັ້ງປະຕິບັດສົນທິສັນຍາພາກພື້ນ ແລະ ສາກົນ ກ່ຽວກັບການຕ້ານອາຊະຍາກຳຂ້າມຊາດທີ່ມີການຈັດຕັ້ງ ລວມທັງການຊ່ວຍເຫລືອເຊິ່ງກັນ ແລະກັນທາງດ້ານກົດໝາຍໃນບັນຫາອາຍາລະຫວ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ ພ້ອມທັງເປັນຂໍ້ມູນໃນການຈັດຕັ້ງປະຕິບັດ ແລະ ການຮ່ວມມືລະຫວ່າງບັນດາປະເທດດັ່ງກ່າວໃນການຕ້ານອາຊະຍາກຳຂ້າມຊາດທີ່ມີການຈັດຕັ້ງ ລວມທັງການຊ່ວຍເຫລືອເຊິ່ງກັນ ແລະ ກັນທາງດ້ານກົດໝາຍໃນບັນຫາອາຍາໃນປັດຈຸບັນ ແລະ ອະນາຄົດ, ສ້າງຄວາມຮັບຮູ້, ຄວາມເຂົ້າໃຈ ແລະ ເສີມຂະຫຍາຍການຮ່ວມມືທີ່ດີກັບບັນດາປະເທດແມ່ນໍ້າຂອງ-ແມ່ ນໍ້າລ້ານຊ້າງພາຍໃຕ້ສົນທິສັນຍາທີ່ໄດ້ເປັນພາຄີຮ່ວມກັນ ແລະເປັນການຍົກລະດັບຄວາມຮູ້ຄວາມສາມາດໃຫ້ແກ່ເຈົ້າໜ້າທີ່ ກ່ຽວຂ້ອງຂອງ ສປປ ລາວ ໃນການຮ່ວມມືກັບປະເທດອ້ອມຂ້າງໃນວຽກງານການສະກັດກັ້ນ ແລະຕ້ານອາຊະຍາກຳຂ້າມຊາດທີ່ມີການຈັດຕັ້ງໃຫ້ມີປະສິດທິພາບ, ປະສິດທິຜົນ ແລະໄດ້ຮັບປະຜົນໂຫຍດຮ່ວມກັນ.
ຂ່າວ-ພາບ: ກຕທ

แชร์