ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດຜູ້ນຳຍິງອາຊຽນ ຄັ້ງທີ 2

ວັນທີ 12 ຕຸລາ 2022 ນີ້, ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ ໄດ້ນຳພາຄະນະຜູ້ແທນເຂົ້າຮ່ວມກອງປະຊຸມສຸດຍອດຜູ້ນຳຍິງອາຊຽນຄັ້ງທີ 2 ພາຍໃຕ້ຫົວຂໍ້: “ການສ້າງອະນາຄົດແບບຍືນຍົງ, ກວມລວມ ແລະເຂັ້ມແຂງ: ການສົ່ງເສີມຜູ້ປະກອບການຍິງໃນອາຊຽນ” (ແບບທາງໄກ), ພາຍໃຕ້ການເປັນປະທານຂອງສົມເດັດອັກຄະມະຫາເສນາບໍດີເຕໂຈຮຸນ ເຊນນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍ, ປະທານອາຊຽນປີ 2022 ໂດຍມີບັນດາຜູ້ນໍາອາຊຽນ, ລັດຖະມົນຕີ, ຕາງໜ້າຜູ້ນຳຍິງອາຊຽນ, ເລຂາທິການໃຫຍ່ອາຊຽນ ແລະແຂກຖືກເຊີນເຂົ້າຮ່ວມ. ສຳລັບຕາງໜ້າຜູ້ນຳແມ່ຍິງລາວ ແມ່ນທ່ານ ນາງ ອິນລາວັນແກ້ວບຸນພັນປະທານຄະນະບໍລິຫານງານສູນກາງສະຫະພັນແມ່ຍິງລາວເຂົ້າຮ່ວມ.

ໃນກອງປະຊຸມຄັ້ງນີ້, ບັນດາຜູ້ນໍາອາຊຽນໄດ້ຕີລາຄາສູງບົດບາດຂອງແມ່ຍິງກໍຄືບັນດາຜູ້ປະກອບການແມ່ຍິງທີ່ໄດ້ປະກອບສ່ວນອັນສໍາຄັນເຂົ້າໃນຂະບວນການຟື້ນຟູເສດຖະກິດ-ສັງຄົມຢູ່ໃນພາກພື້ນອາຊຽນພາຍຫລັງການແພ່ລະບາດຂອງພະຍາດໂຄວິດ-19 ຊຶ່ງແມ່ຍິງໄດ້ມີສ່ວນຮ່ວມໃນຂະບວນການລວມຂອງອາຊຽນກໍຄືການພັດທະນາແບບຍືນຍົງຢູ່ໃນພາກພື້ນ.

ກອງປະຊຸມໄດ້ເຫັນດີສືບຕໍ່ການເຊື່ອມສານບົດບາດຍິງ-ຊາຍເຂົ້າໃນວຽກງານ ແລະກິດຈະກຳຕ່າງໆຂອງອາຊຽນລວມທັງການຈັດຕັ້ງປະຕິບັດວິໄສທັດປະຊາຄົມອາຊຽນ ຫລັງປີ 2025 ແລະ ແຜນຟື້ນຟູຮອບດ້ານຂອງອາຊຽນແນໃສ່ສົ່ງເສີມການສ້າງຄວາມເຂັ້ມແຂງຮອບດ້ານໃຫ້ກັບແມ່ຍິງໃນແຕ່ລະຂົງເຂດໂດຍການສ້າງເງື່ອນໄຂແລະ ກາລະໂອກາດ ໃຫ້ແມ່ຍິງໄດ້ເຂົ້າເຖິງການສຶກສາ,ສົ່ງເສີມການມີວຽກເຮັດງານທຳ,ການເຂົ້າເຖິງແຫລ່ງທຶນ ແລະ ແຫລ່ງຂໍ້ມູນຂ່າວສານ ເພື່ອສົ່ງເສີມທ່າແຮງໃຫ້ຜູ້ປະກອບການແມ່ຍິງຈາກວິສາຫະກິດຂະໜາດນ້ອຍໃຫ້ກາຍເປັນວິສາຫະກິດຂະໜາດໃຫຍ່ໃນຂົງເຂດທີ່ກວ້າງຂຶ້ນ.ດັ່ງນັ້ນ,ການສ້າງຄວາມຍືນຍົງ,ກວມລວມ ແລະ ເຂັ້ມແຂງ ໃນອະນາຄົດໃຫ້ກັບຜູ້ປະກອບການຍິງໄດ້ຮຽກຮ້ອງໃຫ້ທຸກພາກສ່ວນ ແລະຂະແໜງການຕ້ອງໄດ້ມີສ່ວນຮ່ວມນໍາກັນ.

ພ້ອມນີ້, ທ່ານນາຍົກລັດຖະມົນຕີ ພັນຄໍາ ວິພາວັນ ໄດ້ຢໍ້າວ່າ ການເລັ່ງລັດຈັດຕັ້ງປະຕິບັດແຜນງານຍຸດທະສາດວ່າດ້ວຍ ການເຊື່ອມສານບົດບາດຍິງ-ຊາຍໃນອາຊຽນ ຈະເປັນການສ້າງເງື່ອນໄຂ ແລະອໍານວຍຄວາມສະດວກໃນການສ້າງຄວາມເຂັ້ມແຂງໃຫ້ແກ່ແມ່ຍິງໃນທຸກຂົງເຂດວຽກງານໂດຍສະເພາະການສົ່ງເສີມຜູ້ປະກອບການແມ່ຍິງ. ພ້ອມທັງ, ໄດ້ກ່າວວ່າໃນທິດທາງຕໍ່ໜ້າ,ເພື່ອເຮັດໃຫ້ບັນດາກົນໄກ, ແຜນງານ ແລະແຜນການຕ່າງໆຂອງອາຊຽນໄດ້ຮັບການຈັດຕັ້ງເປັນຮູບປະທໍາ,ອາຊຽນຄວນສຸມໃສ່ສ້າງທຸກເງື່ອນໄຂໃນການອໍານວຍຄວາມສະດວກໃຫ້ແກ່ບັນດາຜູ້ປະກອບການແມ່ຍິງໃຫ້ໄດ້ມີໂອກາດພັດທະນາຕົນເອງໃນດ້ານຕ່າງໆ ໄປຕາມແຕ່ລະຍຸກສະໄໝຂອງການພັດທະນາເພື່ອເຮັດໃຫ້ບັນລຸເປົ້າໝາຍການສ້າງຄວາມເຂັ້ມແຂງໃຫ້ກັບແມ່ຍິງກໍຄືຜູ້ປະກອບການຍິງໃນອາຊຽນ.
ຂ່າວ-ພາບ: ກຕທ

แชร์