ຈຳປາສັກ ມອບໃຫ້ບໍລິສັດຮ່ວມພັດທະນາສີທັນດອນ ພັດທະນາແຫລ່ງທ່ອງທ່ຽວ 2 ແຫ່ງ

ວັນທີ 11 ຕຸລາ 2022 ນີ້, ທ່ານ ພົນເອກ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ມະໄລທອງ ກົມມະສິດລັດຖະມົນຕີກະຊວງອຸດສະຫະກຳ ແລະການຄ້າໄດ້ເຂົ້າຮ່ວມເປັນສັກຂີພິຍານໃນພິທີມອບ-ຮັບແຫລ່ງທ່ອງທ່ຽວອຸທິຍານນໍ້າຕົກຕາດ ຄອນພະເພັງ ແລະອຸທິຍານນໍ້າຕົກຕາດ ສົມພະມິດ ລະຫວ່າງທ່ານ ວິໄລວົງ ບຸດດາຄຳ ເຈົ້າແຂວງຈໍາປາສັກ ກັບ ທ່ານ ລີຊຽງ (LI XIANG) ປະທານບໍລິສັດຮ່ວມພັດທະນາສີທັນດອນ ຈຳກັດ ເພື່ອໃຫ້ບໍລິສັດດັ່ງກ່າວເປັນຜູ້ພັດທະນາ.

ໃນພິທີ, ຜູ້ຕາງໜ້າບໍລິສັດຮ່ວມພັດທະນາສີທັນດອນ ຈຳກັດ ໄດ້ລາຍງານກ່ຽວກັບໜ້າວຽກຕ່າງໆທີ່ຈະຕ້ອງໄດ້ສືບຕໍ່ປະຕິບັດພາຍຫລັງທີ່ໄດ້ເຂົ້າພັດທະນາໃນ 2 ແຫລ່ງທ່ອງທ່ຽວດັ່ງກ່າວກໍຄືໜ້າວຽກຈຸດສຸມທີ່ໄດ້ກຳນົດເປັນ 4 ໄລຍະຄື: ໂຄງການອຸທິຍານນໍ້າຕົກຕາດຄອນພະເພັງ ແລະອຸທິຍານນໍ້າຕົກຕາດສົມພະມິດແມ່ນຈະໄດ້ມີການປັບປຸງສິ່ງອຳນວຍຄວາມສະດວກຕ່າງໆທີ່ເປ່ເພກັບມານຳໃຊ້ໄດ້ເປັນປົກກະຕິ; ເນື້ອທີ່ 51 ເຮັກຕາ ກຳນົດເປັນບ່ອນຈອດລົດສຳລັບແຂກຮ້ານອາຫານ,ໂຮງແຮມ ແລະສິ່ງອຳນວຍຄວາມສະດວກຄົບຊຸດຄາດຄະເນຈະນຳໃຊ້ທຶນ ທັງໝົດ 500.000 ໂດລາສະຫະລັດ, ສາມາດຮັບນັກທ່ອງທ່ຽວໄດ້ 5.000 ຄົນຕໍ່ມື້;ໄດ້ສຳເລັດການບຸກເບີກເນື້ອທີ່ 125 ເຮັກຕາ ເພື່ອສ້າງເປັນສວນສະໜຸກ, ຫໍພິພິທະພັນ, ຫໍວິທະຍາສາດ ແລະ ເຮືອນພັກ ຊຶ່ງໂຄງການເຫລົ່ານີ້ແມ່ນຢູ່ໃນຂັ້ນຕອນຫານັກລົງທຶນ.

ພ້ອມກັນນີ້,ຍັງຈະໄດ້ຈະໄດ້ຍົກລະດັບໃຫ້ພະນັກງານທີ່ຮັບເຂົ້າມາເຮັດວຽກກັບໂຄງການເປັນຕົ້ນຝຶກທັກສະ ແລະສອນພາສາຕ່າງປະເທດເຮັດໃຫ້ສາມາດສື່ສານໄດ້ເປັນພາສາອັງກິດ ແລະພາສາຈີນ, ສ້າງໃຫ້ເປັນນັກຮັບຕ້ອນທີ່ດີ, ແມ່ບ້ານທີ່ດີ ແລະນັກປະສົມເຄື່ອງດື່ມທີ່ຊໍານານເພື່ອໃຫ້ແຂກກໍຄືນັກທ່ອງທ່ຽວເພິ່ງພໍໃຈ ແລະປະທັບໃຈກັບການບໍລິການ.
ຂ່າວ-ພາບ: ພຸດທະສິນ

แชร์