ຜົນກອງປະຊຸມຮ່ວມລະຫວ່າງ ຄະນະລັດຖະບານ ກັບ ຄະນະປະຈໍາສະພາແຫ່ງຊາດ

ກອງປະຊຸມຮ່ວມລະຫວ່າງ ຄະນະລັດຖະບານກັບຄະນະປະຈໍາສະພາແຫ່ງຊາດ ຄັ້ງທີ 2 ປະຈໍາປີ 2022 ໄດ້ດໍາເນີນ ພາຍໃຕ້ການເປັນປະທານຮ່ວມຂອງທ່ານ ພັນຄໍາ ວິພາວັນ ນາຍົກລັດຖະມົນຕີ ແລະທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໂດຍມີການເຂົ້າຮ່ວມຂອງທ່ານຮອງນາຍົກລັດຖະມົນຕີ, ຮອງປະທານສະພາແຫ່ງຊາດ, ສະມາຊິກລັດຖະບານ, ປະທານ, ຮອງປະທານກຳມາທິການສະພາແຫ່ງຊາດ ແລະຜູ້ຕາງໜ້າຈາກບັນດາກະຊວງ.

ກອງປະຊຸມຄັ້ງນີ້, ດໍາເນີນດ້ວຍຄວາມຮັບຜິດຊອບສູງ, ສາມາດບັນລຸຜົນສໍາເລັດໄດ້ຕາມຈຸດປະສົງ ແລະຄາດໝາຍທີ່ໄດ້ກໍານົດໄວ້ຊຶ່ງໃນກອງປະຊຸມບັນດາທ່ານສະມາຊິກລັດຖະ ບານ ແລະ ຄະນະປະຈຳສະພາແຫ່ງຊາດ, ບັນດາຜູ້ເຂົ້າຮ່ວມ ໄດ້ພ້ອມກັນປຶກສາຫາລື, ແລກປ່ຽນຄຳເຫັນ ແລະໄດ້ສ້າງຄວາມເປັນເອກະພາບສູງຕໍ່ 10 ຫົວຂໍ້ ທີ່ສໍາຄັນ ນອນຢູ່ໃນຄວາມຮັບຜິດຊອບຂອງລັດຖະບານທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 4ຂອງສະພາແຫ່ງຊາດຊຸດທີ IX; ກອງປະຊຸມໄດ້ຊີ້ນໍາ ແລະ ມອບໃຫ້ກະຊວງແຜນການ ແລະການລົງທຶນ,ກະຊວງການເງິນ, ທະນາຄານແຫ່ງສປປ ລາວ ແລະ ພາກສ່ວນກ່ຽວຂ້ອງ ຮີບຮ້ອນນຳເອົາຜົນກອງປະຊຸມຄັ້ງນີ້ໄປປັບປຸງບົດລາຍງານ, ພ້ອມທັງ ໃຫ້ກະຊວງກ່ຽວຂ້ອງ ແລະ ກຳມາທິການກ່ຽວຂ້ອງຂອງສະພາແຫ່ງຊາດສືບຕໍ່ເຮັດວຽກນຳກັນເພື່ອກ້າວໄປເຖິງສ້າງຄວາມເປັນເອກະພາບ ທາງດ້ານຕົວເລກຄາດໝາຍໃຫຍ່ໆ ມີບ່ອນອີງໜັກແໜ້ນ. ພ້ອມດຽວກັນນີ້, ລັດຖະບານ ຈະລົງເລິກຄົ້ນຄວ້າ ແລະກໍານົດມາດຕະການປະຕິບັດຕົວຈິງເພື່ອສູ້ຊົນບັນລຸຕົວເລກຄາດໝາຍດັ່ງກ່າວ.

ກອງປະຊຸມຄັ້ງນີ້, ໄດ້ຈັດຂຶ້ນກ່ອນຈະເປີດກອງປະຊຸມສະໄໝສາມັນຂອງສະພາແຫ່ງຊາດແຕ່ລະຄັ້ງໂດຍໄດ້ຜັດປ່ຽນກັນເປັນເຈົ້າພາບນັ້ນແມ່ນມີຄວາມສໍາຄັນ ແລະເປັນປະ ໂຫຍດຫລາຍ, ທັງເປັນກົນໄກເຮັດວຽກຮ່ວມກັນທີ່ມີປະສິດທິຜົນສູງ. ຜ່ານກອງປະຊຸມສາມາດເຮັດໃຫ້ລັດຖະບານ ແລະສະພາແຫ່ງຊາດມີຄວາມເຂົ້າໃຈ, ເປັນເອກະພາບກັນໃນບັນຫາສໍາຄັນຍິ່ງຂອງຊາດພ້ອມທັງເປັນການຮ່ວມກັນຄົ້ນຫາວິທີແກ້ໄຂທາງອອກທີ່ຖືກຕ້ອງທີ່ສຸດເພື່ອແກ້ໄຂບັນຫາທີ່ຕັ້ງຂຶ້ນເພື່ອນໍາເອົາຜົນປະໂຫຍດສູງສຸດມາສູ່ປະເທດຊາດ ແລະປະຊາຊົນ.
ຂ່າວ-ພາບ: ກົມປະຊາສໍາພັນ, ຫສນຍ

แชร์