ເປີດຕະຫລາດນັດ ສືບສານຕຳນານບຸນອອກພັນສາ ໄຫລເຮືອໄຟປະຈຳປີ 2022

ພະແນກຖະແຫລງຂ່າວ,ວັດທະນະທຳ ແລະທ່ອງທ່ຽວ (ຖວທ) ນະຄອນຫລວງວຽງຈັນ ຮ່ວມກັບສູນການຄ້າວຽງຈັນເຊັນເຕີເປີດຕະຫລາດນັດສືບສານຕຳນານບຸນອອກພັນສາໄຫລເຮືອໄຟປະຈຳປີ 2022 ໃນລະຫວ່າງວັນທີ 6-10 ຕຸລາ 2022 ນີ້, ຢູ່ສູນການຄ້າວຽງຈັນເຊັນເຕີນະຄອນຫລວງວຽງຈັນ, ໃຫ້ກຽດເຂົ້າຮ່ວມເປີດງານດັ່ງກ່າວ, ມີ ທ່ານ ວັນສີ ກົວມົວ ຮອງລັດຖະມົນຕີກະຊວງ ຖວທ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມພິທີເປີດງານດັ່ງກ່າວ.

ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫລງຂ່າວ, ວັດທະນະທຳ ແລະທ່ອງທ່ຽວ ນະຄອນຫລວງວຽງຈັນ ໄດ້ໃຫ້ຮູ້ວ່າ: ການຈັດງານໃນຄັ້ງນີ້, ເປັນການອະນຸລັກຮັກສາວິຖີດຳລົງຊີວິດຂອງປະຊາຊົນລາວຕັ້ງແຕ່ບູຮານນະການໃຫ້ຄົນຮຸ່ນຫລັງໄດ້ສືບສານ,ຮຽນຮູ້ ແລະ ສ້າງຄວາມສຳນຶກ, ພາກພູມໃຈໃນຄວາມເປັນລາວ ຕິດພັນກັບງານບຸນປະເພ, ວັດທະນະທຳອັນດີງາມຂອງຊາດເຮົາທີ່ໄດ້ຍຶດຖືປະຕິບັດຢ່າງເປັນປົກກະຕິໃນແຕ່ລະປີ, ອີກດ້ານໜຶ່ງກໍ່ເປັນການຊຸກຍູ້ສົ່ງເສີມການທ່ອງທ່ຽວໃຫ້ມີຫລາກຫລາຍກິດຈະກຳ, ສ້າງບັນຍາກາດດ້ານການທ່ອງທ່ຽວໃຫ້ກັບຄືນສູ່ສະພາບໃໝ່ທີ່ດີຂຶ້ນພາຍຫລັງທີ່ລັດຖະບານໄດ້ມີນະໂຍບາຍເປີດຕ້ອນຮັບນັກທ່ອງທ່ຽວໃນຕົ້ນປີ2022 ແລະເປີດປະເທດຢ່າງເຕັມຮູບແບບນັບແຕ່ເດືອນພຶດສະພາ 2022 ເປັນຕົ້ນມາ.

ໂອກາດດຽວກັນ, ທ່ານ ນາງ ອໍລະໄທ ສັນຕິຄົງຄາຮອງປະທານສະພາບໍລິຫານບໍລິສັດສູນພັດທະນາເສດຖະກິດຄົບວົງຈອນ ໜອງຈັນ ຕອນເໜືອ ຈຳກັດ ກໍໄດ້ໃຫ້ຮູ້ວ່າ:ການຈັດງານໃນຄັ້ງນີ້,ນອກຈາກເປັນການອະນຸລັກຮັກສາວິຖີດຳລົງຊີວິດຂອງປະຊາຊົນລາວບັນດາເຜົ່າທີ່ມີມາແຕ່ບູຮານນະການຕິດພັນກັບການສົ່ງເສີມວັດທະນະທຳ, ຮີດຄອງປະເພນີອັນດີງາມຂອງລາວເຮົາໃຫ້ຄົງຢູ່ຕະຫລອດໄປ, ຍັງເປັນການດຶງດູດໃຫ້ປະຊາຊົນຊາວນະຄອນຫລວງວຽງຈັນກໍຄືນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ມີການໄປມາຫາສູ່, ຈັບຈ່າຍໃຊ້ສອຍແລະທ່ອງທ່ຽວເພື່ອຟື້ນຟູເສດຖະກິດ, ການທ່ອງທ່ຽວໃຫ້ກັບຄືນສູ່ບັນຍາກາດທີ່ດີຂຶ້ນພາຍຫລັງປະສົບກັບວິກິດການລະບາດຂອງພະຍາດໂຄວິດ-19 ໃນໄລຍະຜ່ານມາ.

แชร์