ບຸນຊ່ວງເຮືອທ່າວັດຈັນປີນີ້ ຈະວາງກຳລັງຈະລາຈອນ 270 ສະຫາຍ ເພື່ອແກ້ໄຂລົດຕິດ

ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ກຽມພ້ອມກຳລັງຕໍາຫຼວດຈະລາຈອນ ທັງໝົດ 271 ສະຫາຍ ເຂົ້າຮ່ວມປ້ອງກັນຄວາມປອດໄພ, ຄວາມເປັນລະບຽບຮຽບຮ້ອຍໃນງານບຸນຊ່ວງເຮືອທີ່ທ່າວັດຈັນເນື່ອງໃນໂອກາດບຸນອອກພັນສາ ປະວໍລະນາ ປະຈໍາປີ 2022 ຈະຈັດຂຶ້ນລະຫວ່າງວັນທີ 8-11 ຕຸລາ 2022 ນີ້, ໂດຍສະເພາະກໍເພື່ອອໍານວຍຄວາມສະດວກແກ້ໄຂບັນຫາລົດຕິດຢູ່ຕາມເສັ້ນທາງເຂົ້າອອກຕ່າງໆ ເຮັດໃຫ້ສະພາບການສັນຈອນໃນງານບຸນດັ່ງກ່າວ ມີຄວາມສະດວກ-ສະບາຍ, ຮັບປະກັນບໍ່ໃຫ້ມີລົດຕິດອັ່ງອໍຫຼາຍຊົ່ວໂມງ.

ສໍາລັບກິດຈະກໍາປ້ອງກັນຄວາມປອດໄພໃນງານຄັ້ງນີ້ພະແນກຕໍາຫຼວດຈະລາຈອນ ນະຄອນຫຼວງວຽງຈັນຈະສຸມກໍາລັງລົງປະຕິບັດໜ້າທີ່ຢູ່ຕາມຈຸດ 3 ແຍກ ແລະ 4 ແຍກທັງໝົດ 53 ຈຸດ, ໃນນີ້ວົງໃນ 31 ຈຸດ ແລະ ວົງນອກ 22 ຈຸດ, ຕາມສາຍທາງຫຼັກທີ່ມວນຊົນຈະໃຊ້ເຂົ້າມາທ່ຽວຊົມພາຍໃນງານບູນເພື່ອອໍານວຍຄວາມສະດວກຮອບດ້ານໃຫ້ແກ່ຜູ້ໃຊ້ລົດ-ໃຊ້ຖະໜົນ.

ທ່ານ ພັອ ອຸບົນ ຈຸນລະມະນີ ຮອງຫົວໜ້າກອງບັນຊາການຫົວໜ້າຫ້ອງຕໍາຫຼວດ ປກສ ນະຄອນຫຼວງວຽງຈັນ ໄດ້ກ່າວວ່າ: ກໍາລັງຕໍາຫຼວດຈະລາຈອນນະຄອນຫຼວງວຽງຈັນ ທີ່ຈະລົງປະຕິບັດໜ້າທີ່ຕ້ອງເອົາໃຈໃສ່ຢ່າງເຂັ້ມງວດໃນການເຮັດໜ້າທີ່ປ້ອງກັນ, ທີ່ສໍາຄັນຕ້ອງເອົາໃຈໃສ່ຢ່າງຈິງຈັງໃນການລະບາຍການສັນຈອນຢູ່ຕາມເສັ້ນທາງຫຼັກ ຫຼືເສັ້ນທາງຕ່າງໆທີ່ມວນຊົນຈະນໍາໃຊ້ໃນການເຂົ້າ-ອອກງານບຸນ ຕິດພັນກັບ ການຈັດສັນລະບຽບຕາມເສັ້ນທາງ ແລະຈັດສັນສະຖານທີ່ຈອດລົດໃຫ້ແທດເໝາະກັບສະພາບຄວາມເປັນຈິງ.

ພ້ອມກັນນັ້ນກໍເພື່ອເນັ້ນໃສ່ໃນການເຮັດໜ້າທີ່ໂຄສະນາເຜີຍແຜ່ລະບຽບການສັນຈອນໃຫ້ບັນດາມວນຊົນທີ່ນໍາໃຊ້ລົດ-ໃຊ້ຖະໜົນມາທ່ຽວງານດັ່ງກ່າວຮັບຮູ້ ແລະເຂົ້າໃຈເຖິງໄພອັນຕະລາຍໃນການເກີດອຸບັດຕິເຫດ, ແນໃສ່ເຮັດໃຫ້ບັນຫາການເກີດອຸບັດຕິເຫດໃນໄລຍະງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນຫຼຸດໜ້ອຍຖອຍລົງ.

แชร์