ປາຖະກະຖາມູນເຊື້ອ ວັນການທູດລາວ ຄົບຮອບ 77 ປີ

ໃນວັນ​ທີ 6 ຕຸລາທີ່ຜ່ານມາ ທີ່ກະຊວງການຕ່າງປະເທດໄດ້ຈັດພິທີ​ປາຖະກະຖາມູນເຊື້ອ​ວັນການ​ທູດລາວ ຄົບຮອບ 77 ປີ (12 ຕຸລາ 1945 – 12 ຕຸລາ 2022) ແລະ ພິທີຍ້ອງຍໍຂະບວນການແຂ່ງຂັນຮັກຊາດ, ພັດທະນາ ແລະການເຄື່ອນໄຫວວຽກງານການຕ່າງປະເທດ ປະຈໍາປີ 2016-2020 ຊຶ່ງໃຫ້​ກຽດ​ບັນຍາຍໂດຍ ​ທ່ານ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ ເລຂາຄະນະພັກກະຊວງ ຮອງນາຍົກລັດຖະມົນຕີ​ລັດຖະມົນຕີກະຊວງ​ການ​ຕ່າງປະ​ເທດ, ​ມີ​ບັນດາຄະນະ​ພັກ-ຄະນະນຳ​ກະຊວງ, ຄະນະກົມ ແລະບັນດາພະ​ນັກ​ງານ-ລັດຖະກອນທັງໝົດຂອງກະຊວງການຕ່າງປະເທດ​ເຂົ້າ​ຮ່ວມຢ່າງພ້ອມພຽງ.

ຈຸດປະສົງພິທີຄັ້ງນີ້ ແມ່ນເພື່ອລະນຶກເຖິງຜົນງານ ແລະຄຸນງາມຄວາມດີຂອງບັນພະບູລຸດຂອງພວກເຮົາກໍຄືຫວນຄືນປະຫວັດສາດ ຂອງຊາດລາວທີ່ປະຊາຊົນລາວເຮົາມີຄວາມເອກອ້າງທະນົງໃຈ ຕໍ່ມູນເຊື້ອຮັກຊາດ, ສາມັກຄີ ແລະ ອົງອາດກ້າຫານ, ເດັດດ່ຽວຕໍ່ສູ້ຕ້ານການຮຸກຮານ ຂອງພວກສັກດີນາລ່າເມືອງຂຶ້ນເພື່ອປົກປັກຮັກສາປິຕຸພູມອັນແສນຮັກ ແລະຫວງແຫນຂອງຕົນທັງເປັນການສະເຫຼີມສະຫຼອງ ແລະຍ້ອງຍໍຜົນງານການເຄື່ອນໄຫວວຽກງານການຕ່າງປະເທດກໍຄືການຈັດຕັ້ງປະຕິບັດນະໂຍບາຍການຕ່າງປະເທດຂອງລາວຕະຫຼອດໄລຍະ 77 ປີ ທີ່ຜ່ານມາ. ນອກຈາກນັ້ນ, ກໍເປັນໂອກາດອັນດີສຳລັບພະນັກງານກະຊວງການຕ່າງປະເທດໂດຍສະເພາະແມ່ນນັກການທູດໜຸ່ມນ້ອຍທີ່ຈະໄດ້ຮຽນຮູ້ ແລະ ກຳແໜ້ນນະໂຍບາຍການຕ່າງປະເທດຂອງລາວເຮົາ ແຕ່ລະໄລຍະ ເພື່ອນຳໃຊ້ເຂົ້າໃນການເຄື່ອນໄຫວວຽກງານການຕ່າງປະເທດໃຫ້ຄ່ອງແຄ້ວ ແລະສອດຄ່ອງກັບແນວທາງໃນການພັດທະນາເສດຖະກິດ-ສັງຄົມຂອງພັກ ແລະລັດກໍຄືເພື່ອຮັບປະກັນຄຸນນະພາບຂອງການປະຕິບັດໜ້າທີ່ການເມືອງການທູດຂອງຕົນທີ່ໄດ້ຮັບການມອບໝາຍໃຫ້ໄດ້ຮັບໝາກຜົນດີຍິ່ງຂຶ້ນ.

ໃນ​ພິທີ, ທ່ານ ສະເຫຼີມໄຊ ກົມມະສິດ ​ໄດ້​ຍົກ​ໃຫ້​ເຫັນ​ເຖິງປະຫວັດຄວາມເປັນມາ ແລະຄວາມໝາຍຄວາມສຳຄັນຂອງວັນການທູດລາວ (12 ຕຸລາ), ຕີລາຄາການຈັດຕັ້ງປະຕິບັດນະໂຍບາຍການຕ່າງປະເທດແຕ່ລະໄລຍະ ແລະຜົນສຳເລັດອັນໃຫຍ່ຫຼວງຂອງການເຄື່ອນໄຫວການຕ່າງປະເທດຂອງພັກ ແລະລັດໃນຕະຫຼອດໄລຍະ 77 ປີ; ລວມທັງຂໍ້ສະດວກ ແລະ ສິ່ງທ້າທາຍຂອງການເຄື່ອນໄຫວວຽກງານການທູດ; ພ້ອມທັງກຳນົດທິດທາງ ແລະ ແຜນການໃນຕໍ່ໜ້າ. ທ່ານຮອງນາຍົກລັດຖະມົນຕີ ຍັງໄດ້ຢໍ້າຄືນກ່ຽວກັບຄຸນສົມບັດຂອງນັກການທູດກໍຄືພະນັກງານການຕ່າງປະເທດໃນຍຸກໃໝ່ແມ່ນຕ້ອງມີແນວຄິດການເມືອງໜັກແໜ້ນ, ເຊື່ອໝັ້ນຕໍ່ແນວທາງນະໂຍບາຍຂອງພັກ ແລະລັດ; ມີຄວາມຮູ້ຄວາມສາມາດທາງດ້ານວິຊາສະເພາະອັນແນ່ນອນ ແລະມີຄຸນສົມບັດ ແລະບຸກຄະລິກກະພາບຂອງນັກການທູດທີ່ດີ. ພ້ອມທັງໄດ້ເນັ້ນຢໍ້າເຖິງຜົນງານທີ່ຍາດມາໄດ້ຕະຫຼອດໄລຍະ 77 ປີ ແມ່ນຍ້ອນແນວທາງອັນຖືກຕ້ອງສອດຄ່ອງຂອງພັກເຮົາ, ຍ້ອນການຊີ້ນຳນຳພາທີ່ໃກ້ຊິດໂດຍກົງ ຮອບດ້ານຂອງກົມການເມືອງສູນກາງພັກ ໃນແຕ່ລະຍຸກ, ແຕ່ລະສະໄໝ ແລະ ການຮ່ວມແຮງຮ່ວມໃຈກັນຈັດຕັ້ງປະຕິບັດຂອງຄະນະບໍລິຫານງານສູນກາງພັກ, ລັດຖະບານ, ສະພາແຫ່ງຊາດ, ການຈັດຕັ້ງພັກ-ລັດ ທັງຢູ່ສູນກາງ ແລະ ທ້ອງຖິ່ນ, ອົງການຈັດຕັ້ງມະຫາຊົນ ພ້ອມດ້ວຍຄວາມຮັບຜິດຊອບ ແລະ ການຮ່ວມແຮງຮ່ວມໃຈຂອງພະນັກງານ, ທະຫານ, ​ຕຳຫຼວດ ແຕ່ສູນກາງລົງຮອດທ້ອງຖິ່ນ ຕະຫຼອດຮອດນັກທຸລະກິດ, ພໍ່ແມ່ປະຊາຊົນລາວໃນທົ່ວປະເທດລວມທັງຄົນລາວຢູ່ຕ່າງປະເທດ. ຜ່ານການເຄື່ອນໄຫວການຕ່າງປະເທດ ແລະ ການທູດນັ້ນ ພວກເຮົາສາມາດຍາດແຍ່ງຄວາມເປັນໃຈ ແລະ ການສະໜັບສະໜູນຂອງເພື່ອນມິດສາກົນໄດ້ນັບມື້ນັບຫຼາຍຂຶ້ນ ເຮັດໃຫ້ ສປປ ລາວ ມີຖານະບົດບາດສູງເດັ່ນຂຶ້ນໃນເວທີພາກພື້ນ ແລະ ສາກົນ ອັນໄດ້ສ້າງ​​ເງື່ອນ​ໄຂ​ສະພາບ​ແວດ​ລ້ອມ​ພາຍ​ນອກ ​ທີ່​ເອື້ອ​ອໍານວຍໃຫ້​ແກ່​ພາລະກິດປົກປັກຮັກສາ ແລະ ການສ້າງສາ​ພັດທະນາ​ປະ​ເທດ​ຊາດ​ ໃຫ້​ນັບ​ມື້​ນັບ​ເຂັ້ມ​ແຂງ, ກ້າວ​ໄປ​ສູ່​ເປົ້າ​ໝາຍ​ໃນ​ການນໍາ​ເອົາ​ປະ​ເທດ​ຊາດ​ຫຼຸດ​ພົ້ນ​ອອກ​ຈາກ​ສະຖານະ​ພາບ​​ດ້ອຍ​ພັດທະນາ​ ໃນ​ປີ 2026 ແລະ ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDGs) ໃຫ້ບັນລຸໄດ້ໃນປີ 2030 ເພື່ອສ້າງ​ປະ​ເທດ ​ໃຫ້​ເປັນ​ປະ​ເທດ​ທີ່​ຮັ່ງມີ, ປະຊາຊົນ​ມີ​ຄວາມສຸກ, ສັງຄົມ​ມີ​ຄວາມ​ຍຸຕິ​ທໍາ, ປະຊາທິປະ​ໄຕ​ ປອງ​ດອງ ​ແລະສີວິ​ໄລ.​ ມາຮອດປັດຈຸບັນ ສປປ ລາວ ໄດ້ສ້າງຕັ້ງສາຍພົວພັນການທູດກັບ 148 ປະເທດ (ຈາກ 193 ປະເທດ) ທົ່ວໂລກ; ມີສຳນັກງານຕາງໜ້າການທູດຢູ່ຕ່າງປະເທດ 41 ແຫ່ງ (ໃນນີ້ ມີສະຖານເອກອັກຄະລັດຖະທູດ 27 ແຫ່ງ, ສຳນັກງານຜູ້ຕາງໜ້າຖາວອນ 3 ແຫ່ງ, ສະຖານກົງສູນໃຫຍ່ 10 ແຫ່ງ ແລະ ຫ້ອງການກົງສູນ 1 ແຫ່ງ), ກົງສູນກິດຕິມະສັກຂອງ ສປປ ລາວ ຢູ່ຕ່າງປະເທດ 19 ແຫ່ງ. ສະຖານທູດຕ່າງປະເທດ ທີ່ມີສຳນັກງານຢູ່ລາວ 28 ແຫ່ງ, ກົງສູນໃຫຍ່ 6 ແຫ່ງ, 18 ອົງການຈັດຕັ້ງສາກົນທີ່ຂຶ້ນກັບລັດຖະບານ ແລະມີກົງສູນກິດຕິມະສັກ 18 ປະເທດປະຈໍາຢູ່ລາວ.

ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ຊີ້ນໍາ ແລະໃຫ້ທິດເຍືອງທາງແກ່ພະນັກງານກະຊວງການຕ່າງປະເທດໂດຍໄດ້ເນັ້ນວ່າ ພະນັກງານກະຊວງການຕ່າງປະເທດ ຫຼື ນັກການທູດ ນອກຈາກມີທັດສະນະທາງດ້ານການເມືອງຖືກຕ້ອງແລ້ວ ຕ້ອງກໍາແໜ້ນແນວທາງນະໂຍບາຍການຕ່າງປະເທດຂອງພັກ-ລັດເຮົາ ຢ່າງເລິກເຊິ່ງ. ນອກຈາກນີ້, ຍັງໄດ້ຢໍ້າຕື່ມອີກວ່ານັກການທູດຕ້ອງເປັນຄົນທີ່ມີຄວາມຮູ້ກວ້າງຂວາງ, ມີຄວາມຊໍານິຊໍານານດ້ານການພົວພັນສາກົນ, ມີຄວາມຮູ້ດ້ານເສດຖະກິດ, ກົດໝາຍ, ພາສາຕ່າງປະເທດ, ມີຄວາມຮູ້ດ້ານວັດທະນະທໍາ, ສາສະໜາ,ເຕັກໂນໂລຢີ ແລະດ້ານອື່ນໆ. ໃນຂະນະດຽວກັນ, ນັກການທູດຕ້ອງເປັນນັກເຈລະຈາ ແລະ ນັກໂຄສະນາທີ່ມີຄວາມສາມາດ ແລະຄ່ອງແຄ້ວເພື່ອສາມາດຍາດແຍ່ງເອົາຜົນປະໂຫຍດມາໃຫ້ແກ່ປະເທດຊາດໃນສະພາບການຂອງໂລກປັດຈຸບັນ ທີ່ມີການຜັນແປຢ່າງໄວວາ ແລະສະຫຼັບສັບຊ້ອນຊຶ່ງມັນໄດ້ຮຽກຮ້ອງໃຫ້ພະນັກງານໃນຂົງເຂດວຽກງານຕ່າງປະເທດກໍຄືນັກການທູດຍິ່ງຕ້ອງມີຄວາມສະດຸ້ງໄວ, ມີຄວາມຮູ້ເຫຼົ່ານັ້ນຢ່າງເລິກເຊິ່ງ ແລະກວ້າງຂວາງເພື່ອສາມາດເປັນເສນາທິການທີ່ດີໃຫ້ແກ່ພັກ ແລະລັດຖະບານໃນຂົງເຂດວຽກງານການຕ່າງປະເທດແນໃສ່ບັນລຸສອງໜ້າທີ່ຍຸດທະສາດຂອງພັກ ແລະລັດຕາມລະດັບຄາດຫມາຍທີ່ວາງໄວ້ໄດ້ເປັນຢ່າງດີ.

ນອກຈາກນີ້, ຍັງໄດ້ຖືເອົາໂອກາດສະເຫຼີມສະຫຼອງວັນການທູດລາວ ຄົບຮອບ 77 ປີ ຈັດພິທີຍ້ອງຍໍຂະບວນການແຂ່ງຂັນຮັກຊາດ, ພັດທະນາ ແລະການເຄື່ອນໄຫວຕ່າງປະເທດ ປະຈໍາປີ 2016-2022, ເພື່ອຮັບຮູ້ ແລະຊົມເຊີຍຜູ້ທີ່ມີຜົນງານດີເດັ່ນປະກອບສ່ວນດ້ານເຫື່ອແຮງ ແລະສະຕິປັນຍາເຂົ້າໃນຂະບວນການແຂ່ງຂັນຮັກຊາດ, ພັດທະນາ ແລະການເຄື່ອນໄຫວຕ່າງປະເທດ ໃນໄລຍະ 5 ປີ ຊຶ່ງປະກອບມີຫຼຽນໄຊແຮງງານຊັ້ນ I ຈໍານວນ 41 ທ່ານ ແລະ 20 ກົມ, ຫຼຽນໄຊແຮງງານ ຊັ້ນ II ຈໍານວນ 102 ທ່ານ, ຫຼຽນໄຊແຮງງານ ຊັ້ນ III ຈໍານວນ 188 ທ່ານ ແລະ 19 ກົມ, ຫຼຽນກາແຮງງານ ຈໍານວນ 249 ທ່ານ ແລະມອບໃບຍ້ອງຍໍລັດຖະບານ ຈໍານວນ 130 ທ່ານ ແລະ 19 ກົມ. ໃນໂອກາດດຽວກັນນີ້, ຄະນະນຳກະຊວງ ແລະບັນດາຄະນະກົມໄດ້ພ້ອມກັນຈັບມືເພື່ອເປີດຂະບວນການແຂ່ງຂັນຮັກຊາດ, ພັດທະນາ ແລະການເຄື່ອນໄຫວວຽກງານຕ່າງປະເທດສຳລັບ 5 ປີຕໍ່ຫນ້າ (2021-2025).

​ຂ່າວ-ພາບ: ກະ​ຊວງ​ການ​ຕ່າງ​ປະ​ເທດ

แชร์