ກອງປະຊຸມ ຄົບຄະນະບໍລິຫານງານພັກກະຊວງການເງິນ ຄັ້ງທີ 4 ສະໄໝທີ III

ໃນລະຫວ່າງວັນທີ 06-07 ຕຸລາ 2022, ໄດ້ເປີດກອງປະຊຸມ ຄົບຄະນະບໍລິຫານງານພັກກະຊວງ ຄັ້ງທີ 4 ສະໄໝທີ III ຂອງອົງຄະນະພັກກະຊວງການເງິນ ໂດຍການເປັນປະທານຂອງສະຫາຍບຸນໂຈມ ອຸບົນປະເສີດ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການເງິນ, ມີຮອງເລຂາຄະນະບໍລິຫານງານພັກກະຊວງ, ຄະນະບໍລິຫານງານພັກກະຊວງການເງິນເຂົ້າຮ່ວມ.

ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໄດ້ມີຄຳເຫັນວ່າ: ເພື່ອປະຕິບັດຕາມກົດລະບຽບຂອງພັກ ປະຊາຊົນ ປະຕິວັດລາວ ແລະແຜນດໍາເນີນງານຂອງຄະນະບໍລິຫານງານພັກ ກະຊວງການເງິນສະໄໝທີ III, ກອງປະຊຸມໃນຄັ້ງນີ້ ໄດ້ຈັດຂຶ້ນໃນທ່າມກາງບັນຍາກາດທົ່ວພັກ-ລັດ, ສືບຕໍ່ຈັດຕັ້ງຜັນຂະຫຍາຍມະຕິຂອງກອງປະຊຸມໃຫ່ຍຄັ້ງທີ XI ຂອງພັກປະຊາຊົນ ປະຕິວັດລາວ ໂດຍສະເພາະທົ່ວຂະແໜງການເງິນສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ III ຂອງອົງຄະນະພັກກະຊວງການເງິນ ແລະບັນດາມະຕິກອງປະຊຸມຄົບຄະນະບໍລິຫານງານພັກແຕ່ລະຄັ້ງ. ພ້ອມນັ້ນ, ໄດ້ສຸມໃສ່ການຈັດຕັ້ງປະຕິບັດແຜນງົບປະມານ 09 ເດືອນ ແລະທິດທາງມາດຕະການໃນທ້າຍປີ 2022, ທັງນີ້ ເພື່ອເປັນການກະກຽມເນື້ອໃນ ໃຫ້ແກ່ກອງປະຊຸມຄົບຄະນະເປີດກ້ວາງ ທີ່ໃກ້ຈະມາເຖິງນີ້ ແລະເພື່ອພ້ອມກັນສະຫລຸບຄືນການນໍາພາ-ຊີ້ນໍາ ຂອງອົງຄະນະພັກກະຊວງ, ຕີລາຄາຄືນກ່ຽວກັບຄວາມຮັບຜິດຊອບຂອງຄະນະພັກທີ່ໄດ້ມີການແບ່ງງານ, ມອບໝາຍໃຫ້ລົງເລິກຊີ້ນໍາໃນແຕ່ລະຂົງເຂດ ໃຫ້ເຫັນໄດ້ຄວາມສໍາເລັດ ແລະບັນດາຂໍ້ຄົງຄ້າງ ທີ່ຍັງບໍ່ສາມາດແກ້ໄຂໄດ້ ທັງສືບຕໍ່ປະຕິບັດວຽກງານໃນຕໍ່ໜ້າໃຫ້ສໍາເລັດ. ລົງເລິກຕີລາຄາຄືນຢ່າງພາວະວິໄສໃນການຊີ້ນໍາ-ນໍາພາ, ສໍາຄັນແມ່ນແຜນດໍາເນີນງານຂອງອົງຄະນະພັກກະຊວງ, ການຕັດສິນໃຈແກ້ໄຂສະພາບການທີ່ສັງຄົມ, ສູນກາງພັກ, ລັດຖະບານ ແລະສະພາແຫ່ງຊາດ ໄດ້ມອບໃຫ້ແກ້ໄຂ, ພ້ອມກັນລົງເລິກຕີລາຄາອັນລວມ, ອັນສະເພາະ ແລະຄວາມຄືບໜ້າ ສິ່ງທີ່ຮຽກຮ້ອງໃຫ້ແກ້ໄຂເປັນຕົ້ນ: ແມ່ນການແກ້ໄຂປະກົດການຫຍໍ້ທໍ້ໃນຂົງເຂດລາຍຮັບ, ເລັ່ງການຂຸດຄົ້ນທ່າແຮງທີ່ບົ່ມຊ້ອນໃຫ້ມີຄວາມຄືບໜ້າ ແລະມີຜົນສໍາເລັດ, ການຫັນວຽກງານເປັນທັນສະໄໝ, ການອັດຊ່ອງຫວ່າງຕ້ານການຮົ່ວໄຫລຂອງລາຍຮັບງົບປະມານໃນແຕ່ລະຂົງເຂດ, ການສວຍໃຊ້ໜ້າທີ່ຊ່ອງຫວ່າງກົນໄກຕ່າງໆ ຕ້ອງມີມາດຕະການວິທີການ.

ສ່ວນຂົງເຂດລາຍຈ່າຍ ຕ້ອງຮັບປະກັນໄດ້ລາຍຈ່າຍເງິນເດືອນ, ເງິນບໍລິຫານທີ່ເປັນບຸລິມະສິດ ແລະການຊໍາລະໜີ້ຕ່າງປະເທດ, ມີຄວາມໂປ່ງໃສໃນການປະຕິບັດວຽກງານ ແລະ ປະຕິບັດມາດຕະການປະຢັດຕ້ານການຟຸມເຟືອຍ. ພ້ອມນັ້ນ, ສະຫາຍເລຂາຄະນະບໍລິຫານງານພັກກະຊວງ ຍັງໄດ້ຮຽກຮ້ອງໃຫ້ມີການກວດກາພາຍໃນ, ມີສະຕິລະວັງຕົວການຮົ່ວໄຫລຄວາມລັບທາງລັດຖະການໃຫ້ເບິ່ງຢ່າງພາວະວິໄສ ໃນການແກ້ໄຂບັນຫາ ແລະ ໃຫ້ມີການແກ້ໄຂສະພາບແນວຄິດພະນັກງານ, ປັງປຸງກົງຈັກການຈັດຕັ້ງໃຫ້ມີຄວາມສອດຄ່ອງຂຶ້ນກວ່າເກົ່າ ແລະດໍາເນີນການແກ້ໄຂໂດຍສະເພາະກົງຈັກການຊີ້ນໍາ-ນໍາພາ ໃຫ້ມີປະສິດທິພາບ.

ໃນກອງປະຊຸມ ໄດ້ມີການຜ່ານບົດສະຫລຸບຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກກະຊວງການເງິນ ແລະບົດສະຫລຸບຕີລາຄາການຈັດຕັ້ງປະຕິບັດແຜນງົບ ປະມານ 09 ເດືອນ, ທິດທາງ 03 ເດືອນທ້າຍ ປີ 2022 ແລະທິດທາງແຜນການ ປີ 2023, ຟັງການເຜີຍແຜ່, ເຊື່ອມຊຶມວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ, ວຽກງານສາມສ້າງ ແລະວຽກງານຂະບວນການແຂ່ງຂັນຮັກຊາດ ແລະພັດທະນາ.

ພ້ອມນັ້ນ, ສະຫາຍ ຮອງເລຂາຄະນະບໍລິຫານງານພັກກະຊວງ ແລະຄະນະບໍລິຫານງານພັກກະຊວງການເງິນໄດ້ພ້ອມກັນປະກອບຄໍາຄິດຄໍາເຫັນຕໍ່ບັນດາເອກະສານທີ່ສໍາຄັນໃຫ້ສອດຄ່ອງກັບສະພາບຄວາມເປັນນຈິງຂອງຂະແໜງການເງິນທີ່ຢູ່ໃນແຕ່ລະຂົງເຂດ ແລະພ້ອມກັນນໍາພາ-ຊີ້ນໍາເສີມຂະຫຍາຍຫົວຄິດປະດິດສ້າງເຮັດໃຫ້ຂະແໜງການເງິນມີການຫັນປ່ຽນໃໝ່ທີ່ດີຂຶ້ນກວ່າເກົ່າ.

แชร์