ການກໍ່ສ້າງປ້ອງກັນຕາຝັ່ງເຈື່ອນຈຸດແຄມຂອງຝາມໄຊ ເມືອງທ່າແຂກ ຈະສຳເລັດກ່ອນງານບຸນອອກພັນສານີ້

ໃນວັນທີ 5 ຕຸລາ 2022 ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ລົງຕິດຕາມການກໍ່ສ້າງປ້ອງກັນຕາຝັ່ງເຈື່ອນຈຸດແຄມແມ່ນໍ້າຂອງໃກ້ກັບຝາມໄຊ (ດ້ານຫຼັງພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງ) ຊຶ່ງມີຄວາມຍາວ 93 ແມັດ. ຊຶ່ງຕາຝັ່ງຈຸດດັ່ງກ່າວແມ່ນມີການຊຸດໂຕລົງໃນກ່ອນໜ້ານີ້ແລ້ວ ແລະຕົກມາໃນເດືອນ 6-7 ປີ 2022 ໄດ້ເກີດມີຝົນຕົກໜັກຢ່າງຕໍ່ເນື່ອງເຮັດໃຫ້ປະລິມານນໍ້າຂອງເພີ່ມຂຶ້ນຢ່າງໄວ ແລະໄດ້ເສາະເຈື່ອນຕາຝັ່ງໃນຈຸດນີ້ກວ້າງອອກຊຶ່ງໄດ້ກະທົບຮອດທາງເບຕົງ ເສັ້ນລຽບແຄມແມ່ນໍ້າຂອງເຮັດໃຫ້ຜູ້ຄົນທີ່ໃຊ້ເສັ້ນທາງດັ່ງກ່າວຕ້ອງໄດ້ເພີ່ມຄວາມລະມັດລະວັງໃນການສັນຈອນໄປມາ. ເພື່ອຕອບສະໜອງໃຫ້ແກ່ການກໍ່ສ້າງປ້ອງກັນຕາຝັ່ງເຈື່ອນຢູ່ຈຸດດັ່ງກ່າວ ບໍ່ໃຫ້ເສາະເຈື່ອນແຜ່ລາມອອກເປັນວົງກວ້າງ ພະແນກໂຍທາທິການ ແລະຂົນສົ່ງແຂວງຄໍາມ່ວນ ຈຶ່ງໄດ້ລາຍງານ ແລະສະເໜີຕໍ່ທ່ານເຈົ້າແຂວງຄໍາມ່ວນເພື່ອຂໍອະນຸຍາດກໍ່ສ້າງສຸກເສີນ. ຊຶ່ງການກໍ່ສ້າງໂຄງການດັ່ງກ່າວແມ່ນໄດ້ເລີ່ມຈັດຕັ້ງປະຕິບັດໃນວັນທີ 22 ກັນຍາ 2022 ໂດຍແມ່ນບໍລິສັດ ດີເອັມ ຈຳກັດຜູ້ດຽວ ເປັນຜູ້ຮັບເໝົາຊຶ່ງມີຄວາມຍາວທັງໝົດ 93 ແມັດ, ໃນມູນຄ່າການກໍ່ສ້າງທັງໝົດ 4,5 ຕື້ກວ່າກີບ. ຊຶ່ງການກໍ່ສ້າງດັ່ງກ່າວແມ່ນຈະໃຫ້ສຳເລັດກ່ອນການຈັດງານບຸນອອກພັນສາ ແລະຊ່ວງເຮືອປະຈຳປີ 2022 ນີ້.

แชร์