ເຈົ້າແຂວງບໍລິຄຳໄຊ ຕ້ອນຮັບຮອງຫົວໜ້າ ຄອສພ

ໃນວັນທີ 5 ຕຸລາ 2022 ທີ່ຫ້ອງຮັບຮອງຂອງແຂວງ, ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ໄດ້ເປັນກຽດຕ້ອນຮັບທ່ານ ນາງ ວິລະວອນ ພັນທະວົງ ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ພ້ອມຄະນະເນື່ອງໃນໂອກາດທີ່ທ່ານມາເຄື່ອນໄຫວວຽກງານຢູ່ແຂວງບໍລິຄຳໄຊໂດຍສະເພາະແມ່ນການຊຸກຍູ້, ຕິດຕາມການເກັບກຳສະພາບແນວຄິດ, ຫາງສຽງສັງຄົມ, ການຜັນຂະຫຍາຍບັນດານິຕິກຳຂັ້ນເທິງ ແລະຂອງແຂວງໂດຍສະເພາະແມ່ນການຜັນຂະຫຍາຍມະຕິທີ 11 ຂອງພັກ, ການຜັນຂະຫຍາຍ 2 ວາລະແຫ່ງຊາດຢູ່ແຂວງ, ເມືອງ ແລະບັນດາເພື່ອນຮ່ວມງານພະແນກການ, ຂະແໜງການເມືອງຂອງແຂວງໄລຍະຜ່ານມາ.

ໂອກາດດັ່ງກ່າວນີ້, ທ່ານເຈົ້າແຂວງຕາງໜ້າໃຫ້ຄະນະບໍລິຫານງານພັກແຂວງ, ສະພາປະຊາຊົນແຂວງໄດ້ລາຍງານສະພາບໂດຍລວມໃນການເຕີບໃຫຍ່ຂະຫຍາຍຕົວທາງດ້ານເສດຖະກິດ-ສັງຄົມຂອງແຂວງຕະຫຼອດໄລຍະຜ່ານມາ ປັດຈຸບັນແຂວງບໍລິຄຳໄຊ ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 11 ຂອງພັກກໍຄືແຜນພັດທະນາເສດຖະກິດ-ສັງຄົມ 5 ປີຂອງລັດຖະບານຕິດພັນກັບການຜັນຂະຫຍາຍມະຕິກອງປະຊຸມໃຫຍ່ຄັ້ງທີ 7 ຂອງແຂວງ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 5 ຂອງແຂວງເຂົ້າສູ່ລວງເລິກ ແລະເປັນຂະບວນຟົດຟື້ນ. ຄຽງຄູ່ກັນນັ້ນກໍໄດ້ຈັດຕັ້ງຜັນຂະຫຍາຍ 2 ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດສືບຕໍ່ຈັດຕັ້ງຜັນຂະຫຍາຍຍຸດທະສາດຈຸດສຸມຂອງແຂວງເປັນຕົ້ນແມ່ນການແກ້ໄຂບັນຫາ 4 ເຖື່ອນຄື: ຄົນເຖື່ອນ, ອາວຸດເຖື່ອນ, ສິນຄ້າເຖື່ອນ ແລະລົດເຖື່ອນ, 9 ຫົວຂໍ້ສໍາມະນາວິທະຍາສາດຂອງແຂວງຜ່ານການຈັດເຫັນວ່າມີຜົນສໍາເລັດຫຼາຍດ້ານມາຮອດປະຈຸບັນແຂວງບໍລິຄຳໄຊ ໂດຍລວມເຫັນວ່າຍັງສືບຕໍ່ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ປອດໄພ ແລະເປັນລະບຽບຮຽບຮ້ອຍໂດຍພື້ນຖານ, ເສດຖະກິດເຖິງວ່າໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ແລະບັນຫາເສດຖະກິດ-ການເງິນ ໂດຍລວມເຫັນວ່າມີການຂະຫຍາຍຕົວບັນດາຂະແໜງການໄດ້ມີການປັບປຸງມີຄວາມເຕີບໃຫຍ່ເຂັ້ມແຂງຊີວິດການເປັນຢູ່ຂອງພະນັກງານ-ນັກຮົບຕະຫຼອດຮອດພໍ່ແມ່ປະຊາຊົນບັນດາເຜົ່າທາງດ້ານວັດຖຸ, ຈິດໃຈນັບມື້ນັບດີຂຶ້ນ, ມີຄວາມເຊື່ອໝັ້ນຕໍ່ການນຳພາຂອງພັກ-ລັດ ຄວາມທຸກຍາກຕີຖອຍລົງເທື່ອລະກ້າວ, ຄະນະໂຄສະນາອົບຮົມແຂວງໄດ້ເປັນເຈົ້າການປະກອບສ່ວນເອົາໃຈໃສ່ຜັນຂະຫຍາຍມະຕິຂອງຂັ້ນເທິງໄດ້ເປັນຢ່າງດີມີຜົນສຳເລັດຫຼາຍວຽກງານທີ່ປິ່ນອ້ອມ.

ໂອກາດທີ່ທ່ານ ນາງ ວິລະວອນ ພັນທະວົງ ມາເຄື່ອນໄຫວຽກງານຢູ່ແຂວງບໍລິຄຳໄຊໃນຄັ້ງນີ້ຍັງໄດ້ນຳເອົາປຶ້ມວາລະສານໂຄສະນາອົບຮົມສູນກາງພັກ ແລະປຶ້ມບົດເລື່ອງມອບໃຫ້ທ່ານເຈົ້າແຂວງບໍລິຄຳໄຊຕື່ມອີກ.
ຂ່າວ-ພາບ: ສາຍສະໝອນ

แชร์