ສສຂ ເຊກອງ ລົງເຜີຍແຜ່ຜົນກອງປະຊຸມສະພາ

  ໃນລະຫວ່າງວັນທີ 30-31 ມີນາ ຜ່ານມາ ທ່ານ ໜູເພັດ ຈັນທະມາດ ຮອງເລຂາພັກເມືອງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ ດາກຈຶງ, ພ້ອມດ້ວຍທ່ານ ຄໍາເບື້ອງ ເລຫວຽດມ່ວງ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງດາກຈຶງ ແລະຄະນະໄດ້ເຄື່ອນໄຫວເຜີຍແຜ່ ກ່ຽວກັບຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ແລະຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາປະ ຊາຊົນແຂວງເຊກອງຊຸດທີ I ຢູ່ເມືອງດາກຈຶງໂດຍລວມມີ 3 ຈຸດຄື: ບ້ານດາກໂຈມ, ບ້ານມັງຫາ ແລະ ບ້ານດາກສຽງເອ ຊຶ່ງມີຄະນະພັກ-ອົງການປົກຄອງບ້ານ ແລະ ປະຊາຊົນຮ່ວມຮັບຟັງ.

  ໃນໂອກາດດັ່ງກ່າວ ທ່ານ ໜູເພັດ ຈັນທະມາດ ແລະທ່ານ ຄໍາເບື້ອງ ເລຫວຽດມ່ວງ ໄດ້ຜັດປ່ຽນກັນຂຶ້ນເຜີຍແຜ່ຜົນສໍາເລັດຂອງກອງປະຊຸມຊຶ່ງທ່ານໄດ້ຍົກໃຫ້ ເຫັນຄາດໝາຍຂອງລັດຖະບານໃນປີ 2019 ເປັນຕົ້ນແມ່ນຄາດໝາຍເສດຖະ ກິດມະຫາພາກ ລວມຍອດຜະລິດຕະພັນ ພາຍໃນຂະຫຍາຍຕົວເພີ່ມຂຶ້ນ 6,7% ຂຶ້ນໄປ,ສະເລ່ຍລາຍຮັບຕໍ່ຫົວຄົນໃຫ້ໄດ້ປະມານ 2.726 ໂດລາ, GNI ໃຫ້ໄດ້ປະມານ 2.317 ໂດລາ,ດ້ານໂຄງປະກອບເສດຖະກິດ,ດ້ານງົບປະມານ, ດ້ານ ເງິນຕາ, ດ້ານການດຸ່ນດ່ຽງແຮງງານ, ຄາດໝາຍແຫຼ່ງທຶນ ເພື່ອການພັດທະນາ, ຄາດໝາຍດ້ານວັດທະນະທໍາ-ສັງຄົມ, ຂະແໜງວຖະແຫຼງຂ່າວ, ວັດທະນະທໍາ ແລະທ່ອງທ່ຽວ, ຄາດໝາຍດ້ານຊັບພະຍາກອນທໍາມະຊາດ ແລະສິ່ງແວດລ້ອມ,ວຽກງານອົງການກວດສອບແຫ່ງລັດ ແລະ ອົງການກວດກາລັດຖະ ບານ, ວຽກ ງານສານປະຊາຊົນສູງສຸດ, ອົງການ ໄອຍະການປະຊາຊົນສູງສຸດ ແລະກະຊວງຍຸຕິທໍາ, ວຽກງານສະພາແຫ່ງຊາດໄດ້ພິຈາລະນາ ແລະ ຮັບຮອງເອົາກົດໝາຍຈໍານວນ 8 ສະບັບຄື: ປະມວນກົດໝາຍແພ່ງ, ກົດໝາຍວ່າດ້ວຍທະນາຄານທຸ ລະກິດ, ກົດໝາຍວ່າດ້ວຍຄວາມປອດໄພຈາກລັງສີ, ກົດໝາຍວ່າດ້ວຍລາຍເຊັນເອເລັກໂຕຣນິກ,ກົດໝາຍວ່າດ້ວຍການລົດໄຟ,ກົດໝາຍວ່າດ້ວຍການປະກັນສຸຂະພາບ,ກົດໝາຍວ່າດ້ວຍຄົນພິການ ແລະກົດໝາຍວ່າດ້ວຍສໍານັກງານຜູ້ຕາງໜ້າ ສປປ ລາວ ປະຈໍາຢູ່ຕ່າງປະເທດ.

  ທາງດ້ານຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງເຊກອງຊຸດທີ I ໄດ້ພິຈາລະນາ ແລະຮັບຮອງເອົາບັນດາຄາດໝາຍສູ້ຊົນ ຂອງອົງການບໍລິຫານລັດຄື: ສູ້ຊົນເຮັດໃຫ້ເສດຖະກິດຂະຫຍາຍຕົວ 8% ຂຶ້ນໄປ, ລວມຍອດ GDP ສະເລ່ຍໃສ່ຫົວຄົນເທົ່າກັບ 14 ລ້ານກີບຕໍ່ຄົນຕໍ່ປີ; ຄາ ດໝາຍການເກັບລາຍຮັບເຂົ້າງົບປະມານ,ການຄຸ້ມຄອງລາຍຈ່າຍ;ສູ້ຊົນຜະລິດເຂົ້າໃຫ້ໄດ້ 50,9 ພັນໂຕນ,ກາເຟ 40,9 ພັນໂຕນ,ພືດສະບຽງອາຫານ 44 ,6 ພັນໂຕນ, ພືດເປັນສິນຄ້າ 1,57 ແສນໂຕນ; ສູ້ຊົນເຮັດໃຫ້ມູນຄ່າການສົ່ງອອກບັນລຸ 10,89 ລ້ານໂດລາ; ຄາດ ໝາຍແຫຼ່ງທຶນເພື່ອການພັດທະນາ; ດ້ານການພັດທະນາຊົນນະບົດ ແລະລຶບລ້າງຄວາມທຸກຍາກຕິດພັນກັບວຽກງານ 3 ສ້າງສູ້ຊົນສ້າງບ້ານພັດທະນາໃຫ້ໄດ້ຕື່ມອີກ 21 ບ້ານ,ຄອບຄົວພັດທະນາ 3,5 ພັນຄອບຄົວ.

 ນອກຈາກການລົງເຜີຍແຜ່ຜົນສໍາເລັດກອງປະຊຸມແລ້ວຍັງເປັນການລົງຮາກຖານຕິດຕາມກວດກາການປະຕິບັດແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດ, ຄາດໝາຍສູ້ຊົນຂອງຂະແໜງການ, ປະຕິບັດລັດຖະທໍາມະນູນ, ກົດໝາຍ, ການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍຢູ່ຂັ້ນຮາກ ຖານ ລວມທັງການຮັບຟັງຄໍາຄິດ, ຄໍາເຫັນ ແລະ ຄໍາສະເໜີບັນຫາຕ່າງໆຂອງປະຊາຊົນເພື່ອນໍາໄປຄົ້ນຄວ້າປຶກສາຫາລືກັບພາກສ່ວນກ່ຽວຂ້ອງຊອກຫາວິທີແກ້ໄຂໃຫ້ໃນຕໍ່ໜ້າ.

  ໃນການລົງເຄື່ອນໄຫວແຕ່ລະຈຸດບັນດາທ່ານ ສສຂ ກໍໄດ້ມອບມີ່ໄວໆ, ນໍ້າປາ ແລະເຄື່ອງນຸ່ງຫົ່ມຈໍານວນໜຶ່ງໃຫ້ອໍານາດການປົກຄອງບ້ານເພື່ອນໍາໄປແຈກຢາຍໃຫ້ປະຊາຊົນຜູ້ທຸກຍາກຕາມຄວາມເໝາະສົມ.

ຂ່າວ: ສັນຍາ   

แชร์