ຢາເສບຕິດ ແມ່ນບັນຫາລວມຂອງວົງຄະນະຍາດສາກົນ ເປັນໄພຂົ່ມຂູ່ທີ່ຮ້າຍແຮງຕໍ່ມວນມະນຸດ

ໃນວັນທີ 6 ຕຸລາ 2022, ທີ່ນະຄອນຫລວງວຽງຈັນ, ທ່ານ ພົອ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບໄດ້ອ່ານສານເນື່ອງໃນໂອກາດ ວັນແຫ່ງຊາດຕ້ານຢາເສບຕິດ ຄົບຮອບ 21 ປີ (12/10/2001-12/10/2022) ໂດຍມີເນື້ອໃນບາງຕອນວ່າ: ຢາເສບຕິດແມ່ນບັນຫາລວມຂອງວົງຄະນະຍາດສາກົນເຊິ່ງເປັນໄພຂົ່ມຂູ່ທີ່ຮ້າຍແຮງຕໍ່ມວນມະນຸດ,ເປັນບໍ່ເກີດຂອງອາຊະຍາກໍາຕ່າງໆທີ່ກົດຫນ່ວງຖ່ວງດຶງການສ້າງສາພັດທະນາ ເສດຖະກິດ-ສັງຄົມຂອງຊາດ, ທັງຍັງສ້າງຄວາມເສຍຫາຍຢ່າງໃຫຍ່ຫລວງຕໍ່ບຸກຄົນ ແລະຄອບຄົວຜູ້ຕົກເປັນທາດຂອງຢາເສບຕິດ; ປັດຈຸບັນ, ການຄ້າຂາຍຢາເສບຕິດໄດ້ກາຍເປັນຂະບວນການຂ້າມຊາດທີ່ລັດຖະບານ ແລະປະຊາຊົນລາວກໍຄືບັນດາປະຊາຊາດໃນທົ່ວໂລກພ້ອມກັນຕ້ານ ແລະສະກັດກັ້ນຢ່າງແຂງແຮງ.

ເຖິງແມ່ນວ່າຫລາຍປະເທດໄດ້ເພີ່ມທະວີມາດຕະການ, ຄວາມພະຍາຍາມໃນການຄວບຄຸມ, ສະກັດກັ້ນ, ປາບປາມ ແລະແກ້ໄຂບັນຫາດັ່ງກ່າວຢ່າງຕໍ່ເນື່ອງປານໃດກໍ່ຕາມ, ແຕ່ການຜະລິດ, ການນໍາໃຊ້, ການຄ້າຂາຍ, ການລໍາລຽງຂົນສົ່ງຢາເສບຕິດຢູ່ໃນທົ່ວໂລກກໍຄືຢູ່ ສປປ ລາວ ກໍຍັງບໍ່ຫລຸດລົງ ແລະ ມີທ່າອ່ຽງເພີ່ມຂຶ້ນຢ່າງຫນ້າເປັນຫ່ວງ. ຍ້ອນເຫັນໄດ້ເຖິງໄພອັນຕະລາຍ ແລະຄວາມຈໍາເປັນຕົວຈິງ ໃນການແກ້ໄຂບັນຫາດັ່ງກ່າວໃຫ້ເດັດຂາດ, ໃນປີ 2021 ພັກ, ລັດຖະບານລາວຈຶ່ງໄດ້ຍົກລະດັບເອົາການຄວບຄຸມ, ສະກັດກັ້ນ, ຕ້ານ ແລະແກ້ໄຂບັນຫາຢາເສບຕິດເປັນວາລະແຫ່ງຊາດ; ພ້ອມທັງໄດ້ນໍາພາ, ຊີ້ນໍາການຈັດຕັ້ງຜັນຂະຫຍາຍວຽກງານດັ່ງກ່າວ ຢ່າງຈົດຈໍ່ຕະຫລອດມາ 01 ປີຜ່ານມາ; ໄດ້ເອົາໃຈໃສ່ສຶກສາອົບຮົມ ແລະ ສ້າງຄວາມຮັບຮູ້ທົ່ວສັງຄົມ ເປັນຕົ້ນ ຊາວຫນຸ່ມ-ເຍົາວະຊົນ ໄດ້ຮັບຮູ້, ເຂົ້າໃຈຢ່າງຖືກຕ້ອງ ກ່ຽວກັບພິດໄພ, ຜົນຮ້າຍ ແລະຄວາມເປັນອັນຕະລາຍຂອງຢາເສບຕິດໂດຍໄດ້ໂຄສະນາເຜີຍແຜ່ແນວທາງນະໂຍບາຍ, ກົດໝາຍ,ລະບຽບການ ແລະນິຕິກໍາທີ່ກ່ຽວຂ້ອງຂອງພັກ, ລັດກ່ຽວກັບບັນຫາຢາເສບຕິດຜ່ານສື່ຕ່າງໆເປັນປົກກະຕິ, ຕໍ່ເນື່ອງ ແລະກວ້າງຂວາງໂດຍສະເພາະແມ່ນເຜີຍແຜ່ເນື້ອໃນວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ(2021-2023) ແຕ່ສູນກາງລົງຮອດທ້ອງຖິ່ນ.

ລັດຖະບານຍັງໄດ້ເອົາໃຈໃສ່ ແລະສ້າງເງື່ອນໄຂໃຫ້ບັນດາຄອບຄົວປະຊາຊົນຢູ່ເຂດພູດອຍຫ່າງໄກສອກຫລີກເຂດພາກເໜືອຫັນໄປປະກອບອາຊີບທີ່ໝັ້ນຄົງ ແລະຖືກກົດໝາຍ ແທນການປູກພືດທີ່ມີສານເສບຕິດ; ໄດ້ດໍາເນີນການບໍາບັດ, ຟື້ນຟູສຸຂະພາບຜູ້ຖືກເຄາະຮ້າຍຈາກຢາເສບຕິດ, ປັບປຸງ-ຂະຫຍາຍໂຮງໝໍຊຸມຊົນເພື່ອເປັນບ່ອນໃຫ້ຄໍາປຶກສາ, ປິ່ນປົວໃຫ້ເຂົາເຈົ້າກັບຄືນເປັນຄົນດີຂອງສັງຄົມ; ໄດ້ຕັ້ງໜ້າເຂົ້າຮ່ວມໃນວຽກງານ 03 ສ້າງທີ່ຕິດພັນກັບການສ້າງບ້ານໃຫ້ເປັນຫົວໜ່ວຍພັດທະນາ ໂດຍໄດ້ເອົາໃຈໃສ່ສ້າງບ້ານ, ສະຖາບັນການສຶກສາ, ກົມກອງ, ຫົວຫນ່ວຍການຜະລິດ, ການບໍລິການ ທັງພາກລັດ ແລະເອກະຊົນຢູ່ຕາມທ້ອງຖິ່ນຕ່າງໆ ໃຫ້ປອດຈາກຢາເສບຕິດ. ໃນປີນີ້, ເຈົ້າໜ້າທີ່ຕໍາຫລວດໄດ້ຮັບຄວາມຮ່ວມ ມືຈາກພາກສ່ວນທີ່ກ່ຽວຂ້ອງທັງພາຍໃນ ແລະຕ່າງປະເທດໄດ້ມ້າງຄະດີ, ຢຶດຢາເສບຕິດ, ຢຶດອາວຸດເສິກ, ຢຶດຊັບສິນ, ວັດຖຸມີຄ່າ, ສານເຄມີຕ່າງໆ ທີ່ນໍາມາຜະລິດເປັນຢາເສບຕິດ ແລະທີ່ສໍາຄັນ ແມ່ນສາມາດຈັບກຸມຜູ້ກະທໍາຜິດມາດໍາເນີນຄະດີຕາມລະບຽບກົດໝາຍ.

ສະຫາຍ ພົອ ວິໄລ ຫລ້າຄໍາຟອງ ຊີ້ໃຫ້ເຫັນຕື່ມວ່າ: ສໍາລັບຢູ່ ສປປ ລາວ, ການເສບ, ການຄ້າຂາຍ, ຂົນສົ່ງຢາເສບຕິດໄດ້ລະບາດ ແລະແຜ່ລາມຈາກຕົວເມືອງໄປສູ່ເຂດຊົນນະບົດ, ຈາກທົ່ງພຽງຂຶ້ນສູ່ພູດອຍຫ່າງໄກສອກຫລີກ; ປັດຈຸບັນ, ຢູ່ຫລາຍທ້ອງຖິ່ນ ໄດ້ມີຊາວຫນຸ່ມ-ເຍົາ ວະຊົນ, ນັກຮຽນ-ນັກສຶກສາ, ກໍາມະກອນຢູ່ຕາມໂຮງຈັກໂຮງງານ ແລະ ຊາວໄຮ່-ນາ ຈໍານວນບໍ່ຫນ້ອຍ ໄດ້ຕົກເປັນທາດຂອງຢາເສບຕິດ; ຈໍານວນຜູ້ໄດ້ຮັບເຄາະຮ້າຍສ່ວນຫນຶ່ງ ໄດ້ພາກັນສ້າງຄວາມສັບສົນວຸ້ນວາຍ, ກໍ່ໃຫ້ເກີດມີສິ່ງຫຍໍ້ທໍ້ຕ່າງໆ ພາຍໃນຄອບຄົວກໍຄືຢູ່ຊຸມຊົນ; ເກີດມີການຂີ້ລັກງັດແງະ, ປຸ້ນຈີ້, ຊີງຊັບ, ຄາດຕະກໍາ, ລັກພາຕົວ, ຄ້າໂສເພນີ, ລະເມີດກົດຈາລະຈອນພາໃຫ້ເກີດອຸປະຕິເຫດຕາມທ້ອງຖະໜົນຫລວງ, ກໍ່ອາລະວາດຜິດຖຽງຕີກັນ ແລະອື່ນໆ.

ສະນັ້ນ,ຈຶ່ງສະເໜີມາຍັງກະຊວງ,ອົງການ ແລະທ້ອງຖິ່ນຂັ້ນຕ່າງໆ ຈົ່ງໄດ້ໃຫ້ຄວາມຮ່ວມມືໃຫ້ຖືເອົາວຽກງານຄວບຄຸມ, ສະກັດກັ້ນ ແລະຕ້ານຢາເສບຕິດເປັນພັນທະ, ເປັນໜ້າທີ່ຂອງທຸກພາກສ່ວນ, ນັບແຕ່ຂັ້ນສູນກາງ ລົງຮອດທ້ອງຖິ່ນ; ເພີ່ມທະວີຄວາມເອົາໃຈໃສ່ຕໍ່ວຽກງານໂຄສະນາ, ສຶກສາອົບຮົມ, ສ້າງຄວາມຮັບຮູ້ໃນທົ່ວສັງຄົມໃຫ້ກວ້າງຂວາງດ້ວຍຫລາຍຮູບການເພື່ອປູກຈິດສໍານຶກໃຫ້ປະຊາຊົນລາວທຸກຊັ້ນຄົນ ໂດຍສະເພາະ ແມ່ຍິງ, ຊາວໜຸ່ມ, ເຍົາວະຊົນ ເຫັນໄດ້ເຖິງຜິດໄພ, ຜົນຮ້າຍຂອງຢາເສບຕິດ, ຮັບຮູ້, ເຂົ້າໃຈລະບຽບກົດຫມາຍທີ່ພົວພັນກັບຢາເສບຕິດ; ປຸກລະດົມຂົນຂວາຍໃຫ້ເຂົາເຈົ້າເຂົ້າໃຈ, ຕື່ນຕົວ,ສະໝັກໃຈ ແລະມີສ່ວນຮ່ວມໃນວຽກງານ ສະກັດກັ້ນ ແລະ ແກ້ໄຂບັນຫາຢາເສບຕິດ; ເອົາໃຈໃສ່ປັບປຸງພື້ນຖານໂຄງລ່າງເພື່ອຟື້ນຟູຕໍ່ຜູ້ຖືກເຄາະຮ້າຍ, ວຽກງານບໍາບັດປິ່ນປົວ, ຟື້ນຟູສຸຂະພາບ ແລະ ຝຶກວິຊາ ຊີບ ເພື່ອໃຫ້ເຂົາເຈົ້າມີສຸຂະພາບແຂງແຮງດີຂຶ້ນເປັນປົກກະຕິ, ກັບຄືນສູ່ຄວາມອົບອຸ່ນຂອງຄອບຄົວ ແລະສັງຄົມ.

ໃນຂະນະທີ່ພາກລັດກໍຕ້ອງສຸມໃສ່ສ້າງ, ປັບປຸງກົດໝາຍ ແລະນິຕິກໍາໃຕ້ກົດໝາຍລວມທັງການສ້າງຄວາມເຂັ້ມແຂງກ່ຽວກັບວຽກງານຄວບຄຸມ, ສະກັດກັ້ນ ແລະຕ້ານຢາເສບຕິດໃຫ້ບຸກຄະລາກອນໃນຂະແຫນງການທີ່ກ່ຽວຂ້ອງ,ມີການຈັດສັນງົບປະມານທີ່ເຫມາະສົມ, ກົງຈັກຂັ້ນສູນກາງ ແລະທ້ອງຖິ່ນເພື່ອຮັບປະກັນໃຫ້ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໄດ້ຮັບການຈັດຕັ້ງປະຕິບັດຖືກທິດ, ມີປະສິດທິພາບ ແລະບັນລຸຄາດໝາຍທີ່ວາງໄວ້; ເອົາໃຈໃສ່ຕິດຕາມກວດກາ ແລະສຶກສາອົບຮົມປະຊາຊົນບໍ່ໃຫ້ລັກລອບປູກພືດທີ່ມີສານເສບຕິດ; ຊຸກຍູ້ສົ່ງເສີມ ແລະຊ່ວຍເຫລືອໃຫ້ເຂົາເຈົ້າໄດ້ມີເງື່ອນໄຂຫັນໄປປະກອບອາຊີບອື່ນທີ່ໝັ້ນຄົງແທນການປູກພືດທີ່ມີສານເສບຕິດທີ່ຜິດກົດໝາຍພ້ອມທັງໃຫ້ດໍາເນີນມາດຕະການດ້ານກົດໝາຍຢ່າງເຂັ້ມງວດຕໍ່ຜູ້ກະທໍາຜິດ.
ຂ່າວ: ສົມຫວັງ ພາບ ຂັນໄຊ

แชร์