ບັນດາແຂວງພາກກາງ ເປັນໃຈກາງອຸດສາຫະກໍາ-ການຄ້າ ແລະໂລຈິສຕິກຂອງປະເທດໃຫ້ປະກົດເປັນຈິງ

ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 3 ຕຸລາ 2022 ຢູ່ທີ່ໂຮງແຮມຣິເວີເຣຍ ເທສະບານເມືອງທ່າແຂກໂດຍການເປັນປະທານຮ່ວມຂອງທ່ານ ວັນໄຊ ພອງສະຫວັນເຈົ້າແຂວງຄໍາມ່ວນ, ທ່ານ ຈັນທະບູນ ລັດຕະນະວົງຫົວໜ້າຄະນະຜູ້ຊ່ວຍວຽກທ່ານນາຍົກລັດຖະມົນຕີ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກໍາແຫ່ງຊາດລາວ.

ໃນໂອກາດນີ້ຍັງໄດ້ຕ້ອນຮັບການເຂົ້າຮ່ວມຂອງທ່ານ ໂກບາຢາສິ ເຄນຈິ ເອກອັກຄະລັດຖະທູດຜູ້ມີອໍານາດເຕັມແຫ່ງປະເທດຢີ່ປຸ່ນ,ມີບັນດາຮອງລັດຖະມົນຕີທີ່ຕາງໜ້າໃຫ້ແກ່ກະຊວງທີ່ກ່ຽວຂ້ອງ,ຮອງເຈົ້າແຂວງອຸດົມໄຊ, ຮອງເຈົ້າແຂວງຫຼວງພະບາງ, ມີບັນດາຕາງໜ້າພະແນກການອ້ອມຂ້າງແຂວງ, ຕາງໜ້າແຂວງສະຫວັນນະເຂດ,ແຂວງບໍລິຄໍາໄຊ ,ຕາງໜ້າກຸ່ມຜູ້ປະກອບການທຸລະກິດຈາກສູນກາງ ແລະຈາກສາມແຂວງພາກກາງເຂົ້າຮ່ວມ.

ໂອກາດນີ້, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນກໍ່ໄດ້ກ່າວຕ້ອນຮັບ ແລະໄຂກອງປະຊຸມຢ່າງເປັນທາງການ. ເຊິ່ງໃນພິທີຈັນທະບູນ ລັດຕະນະວົງຫົວໜ້າຄະນະຜູ້ຊ່ວຍວຽກທ່ານນາຍົກລັດຖະມົນຕີ ແລະທ່ານ ໂກບາຢາສິ ເຄນຈິ ເອກອັກຄະລັດຖະທູດຜູ້ມີອໍານາດເຕັມແຫ່ງປະເທດຢີ່ປຸ່ນກໍ່ໄດ້ຜັດປ່ຽນກັນມີຄໍາເຫັນ . ຫຼັງຈາກນັ້ນແມ່ນເຂົ້າສູ່ວາລະຫົວຂໍ້ການແລກປ່ຽນບົດຮຽນ ແລະປະສົບການລະຫວ່າງພາກລັດ, ກຸ່ມຜູ້ປະກອບການທຸລະກິດທັງພາຍໃນ ແລະຕ່າງປະເທດທັງນີ້ເພື່ອຊອກໃຫ້ເຫັນອຸປະສັກທີ່ເປັນປັນຫາສິ່ງອຸດຕັນ ແລະ ກີດຂວາງການພັດທະນາເສດຖະກິດ - ສັງຄົມກໍ່ຄືການຂັບເຄື່ອນຍູ້ແຮງການພັດທະນາບັນດາແຂວງພາກກາງເປັນໃຈກາງອຸດສາຫະກໍາ-ການຄ້າ ແລະ ໂລຈິສຕິກຂອງປະເທດໃຫ້ປະກົດເປັນຈິງ. ຊຶ່ງການຈັດກອງປະຊຸມຄັ້ງແມ່ນມີຄວາມໝາຍສໍາຄັນທີ່ສຸດເພາະວ່າແຕ່ລະທ່ານທີ່ມີຄໍາເຫັນແມ່ນໄດ້ມີທັດສະນະ ແລະວິໄສທັດທີ່ຫຼາກຫຼາຍພ້ອມທັງນໍາເອົາຜົນປະໂຫຍດຕົວຈິງມາສູ່ 03 ແຂວງພາກກາງ ( ບໍລິຄໍາໄຊ, ຄໍາມ່ວນ, ສະຫວັນນະເຂດ ) ໃນການເຊື່ອໂຍງທາງດ້ານລະບົບຂົນສົ່ງໄປຫາບັນດາແຂວງໃນທົ່ວປະເທດຕາມແລວເສດຖະກິດຕາເວັນອອກ-ຕາເວັນຕົກກໍ່ຄືການເຊື່ອມໂຍງກັບບັນດາປະເທດໃນພາກພື້ນເອເຊຍຕາເວັນອອກສຽງໃຕ້ເປັນຕົ້ນ . ໃນນີ້ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະການຄ້າມີຄໍາເຫັນໃນຫົວຂໍ້ “ ການຫັນເປັນອຸດສາຫະກໍາເພື່ອທົດແທນການນໍາເຂົ້າ ແລະ ສົ່ງອອກຢູ່ບັນດາແຂວງພາກກາງ ”, ທ່ານ ລັນ ແສງອາພອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງມີຄໍາເຫັນໃນຫົວຂໍ້ “ ການພັດທະນາໂລຈິສຕິກຢູ່ບັນດາແຂວງພາກກາງ ”, ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ-ວັດທະນະທໍາ ແລະ ທ່ອງທ່ຽວມີຄໍາເຫັນໃນຫົວຂໍ້ “ ຍຸດທະສາດການເປີດກວ້າງວຽກງານພັດທະນາອຸດສາຫະກໍາການທ່ອງທ່ຽວຢູ່ ສປປ ລາວ ”, ທ່ານຮອງລັດຖະມົນຕີກະຊວງພະລັງງານ ແລະບໍ່ແຮ່ມີຄໍາເຫັນໃນຫົວຂໍ້ “ ຍຸດທະສາດຄວາມໝັ້ນຄົງທາງດ້ານພະລັງງານ ແລະການຫັນເປັນອຸດສາຫະກໍາຢູ່ບັນດາແຂວງພາກກາງ ”, ທ່ານ ປອ.ນິວົງ ຮອງລັດຖະມົນຕີກະຊວງກະສິກໍາ ແລະ ປ່າໄມ້ມີຄໍາເຫັນໃນຫົວຂໍ້ “ ການພັດທະນາກະສິກໍາເປັນສິນຄ້າ ແລະ ກໍານົດເຂດ zoning ຢູ່ບັນດາແຂວງພາກກາງ ” , ຕາງໜ້າກະຊວງເຕັກໂນໂລຊີ ແລະການສື່ສານມີຄໍາເຫັນໃນຫົວຂໍ້ “ ຍຸດທະສາດຫັນໄປສູ່ລັດຖະບານດີຈີຕອນ, ເສດຖະກິດດີຈີຕອນ, ສັງຄົມດີຈີຕອນ ”, ທ່ານ ປອ.ໄຊໂກສີ ຮັກສາການອະທິບໍດີມະຫາວິທະຍາໄລສະຫວັນນະເຂດມີຄໍາເຫັນໃນຫົວຂໍ້ “ ການສົ່ງເສີມ R&D ໃນການພັດທະນາອຸດສາຫະກໍາ-ການຄ້າ ແລະໂລຈິສຕິກຢູ່ບັນດາແຂວງພາກກາງ”, ທ່ານ ຈັນທອນ ສິດທິໄຊ ປະທານ ບໍລິສັດ PTL ໂຮນດິ່ງມີຄໍາເຫັນໃນຫົວຂໍ້ “ ໂຄງການລົງທຶນພັດທະນາອຸດສາຫະກໍາ-ການຄ້າ ແລະ ໂລຈິສຕິກ ຢູ່ບັນດາແຂວງພາກກາງ ”,ທ່ານ ໂຖງກົງເຫິງ ປະທານ ບໍລິສັດ ຊີໂນອາກກຣີ ໂປຼຕາສ ຈໍາກັດມີຄໍາເຫັນໃນຫົວຂໍ້ “ ໂຄງການລົງທຶນສ້າງເຂດອຸດສາຫະກໍາ ແລະ ຫັນເປັນຕົວເມືອງຢູ່ແຂວງຄໍາມ່ວນ ”, ຕາງໜ້າບໍລິສັດສະຫວັນໂລຈິສຕິກມີຄໍາເຫັນໃນຫົວຂໍ້ “ ບົດຮຽນການພັດທະນາອຸດສາຫະກໍາ-ການຄ້າ ແລະໂລຈິສຕິກຢູ່ແຂວງສະຫວັນນະເຂດ ” .

ສໍາລັບໃນພາກບ່າຍທ່ານ ພວງປະຣີສັກ ປະວົງວຽງຄໍາ ປະທານ ກຸ່ມບໍລິສັດ AIF ແມ່ນໄດ້ມີຄໍາເຫັນໃນຫົວຂໍ້ “ ການຫັນເປັນອຸດສາຫະກໍາກະເສດ ແລະຄວາມໝັ້ນຄົງດ້ານສະບຽງອາຫານຂອງບັນດາແຂວງພາກກາງ ” , ຕາງໜ້າບໍລິສັດ CP ລາວຈໍາກັດມີຄໍາເຫັນໃນຫົວຂໍ້ “ ການຖ່າຍທອດເຕັກໂນໂລຊີ ແລະຫັນເປັນດີຈີຕອນໃນການພັດທະນາອຸດສາຫະກໍາອາຫານຢູ່ ສປປ ລາວ ” .

ນອກຈາກນັ້ນຍັງມີການເສວະນາໃນ 02 ຫົວຂໍ້ຄື : ການພັດທະນາຂະແໜງຂົນສົ່ງ ແລະໂລຈິສຕິກຢູ່ບັນດາແຂວງພາກກາງເຊິ່ງທ່ານ ອຸເດດ ສຸວັນນະວົງປະທານສະພາການຄ້າ ແລະອຸດສາຫະກໍາແຫ່ງຊາດລາວກໍ່ໄດ້ນໍາສະເໜີໃນຫົວຂໍ້ “ ການສົ່ງເສີມ ແລະຄຸ້ມຄອງທຸລະກິດໂລຈິສຕິກພາຍໃນປະເທດໃນການເຊື່ອມຈອດ - ເຊື່ອມໂຍງ ” . ສໍາລັບການເສວະນາຫົວຂໍ້ທີ 02 ຄືການສົ່ງເສີມການຄ້າຊາຍແດນແລວເສດຖະກິດຕາເວັນອອກ-ຕາເວັນຕົກຢູ່ບັນດາແຂວງພາກກາງເຊິ່ງທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສາຫະກໍານະຄອນຫຼວງວຽງຈັນກໍ່ໄດ້ນໍາສະເໜີໃນຫົວຂໍ້ “ ບົດຮຽນຂອງນະຄອນຫຼວງວຽງຈັນໃນການພັດທະນາອຸດສາຫະກໍາ -ການຄ້າ ແລະ ໂລຈິສຕິກ ” .

ໃນກອງປະຊຸມຍັງໄດ້ມີການປະກອບຄໍາເຫັນລວມຈາກບັນດາແຂວງທີ່ຖືກເຊີນເຊັ່ນ : ແຂວງອຸດົມໄຊ ແຂວງຫຼວງພະບາງ, ແຂວງສະຫວັນນະເຂດ,ແຂວງບໍລິຄໍາໄຊ, ຕາງໜ້າສະພາປະຊາຊົນແຂວງຄໍາມ່ວນ ແລະຕາງໜ້າກຸ່ມຜູ້ປະກອບການທຸລະກິດພາຍໃນແຂວງຄໍາມ່ວນຈໍານວນໜຶ່ງ.

ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນໃນນາມຄະນະປະທານຮ່ວມກອງປະຊຸມກໍ່ໄດ້ຮຽກຮ້ອງມາຍັງທຸກພາກສ່ວນນັບທັງພາກລັດ-ເອກະຊົນ, ຜູ້ປະກອຍການທຸລະກິດຈົ່ງໄດ້ເປັນເຈົ້າການຮ່ວມກັນໃນການຂັບເຄື່ອນເສດຖະກິດຂອງ 03 ແຂວງພາກກາງໂດຍສະເພາະແມ່ນການສຸມໃສ່ພັດທະນາທາງດ້ານພື້ນຖານໂຄງລ່າງຖະໜົນຫົນທາງ, ດ້ານການຂົນສົ່ງ, ການພັດທະນາດ້ານການບໍລິການທ່ອງທ່ຽວ , ການຄ້າ,ການດຶງດູດການລົງທຶນຈາກເອກະຊົນພາຍໃນ ແລະຕ່າງປະເທດ, ການພັດທະນາຊັບພະຍາກອນມະນຸດ ແລະອື່ນໆໃຫ້ເປັນຮູບປະທໍາຄືການເຮັດແທ້ທໍາຈິງເພື່ອນໍາເອົາຜົນປະໂຫຍດຕົວຈິງມາສູ່ປະເທດຊາດ, ເຮັດໃຫ້ຜູ້ປະກອບການພາຍໃນ ແລະເສດຖະກິດພາຍໃນມີຄວາມເຂັ້ມແຂງ.

แชร์