ໂຄງການສ້ອມແປງແຫຼ່ງທ່ອງທ່ຽວ ນໍ້າຕົກຕາດຕອນພະເພັງ ແລະນໍ້າຕົກຕາດສົມພະມິດ ໄລຍະທຳອິດ ຄາດວ່າຈະໃຊ້ຕົ້ນທຶນ 500.000 ໂດລາ

ໃນວັນທີ 30 ກັນຍາ ທີ່ຜ່ານມາ, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ຜູ້ຊີ້ນຳວຽກງານເສດຖະກິດໄດ້ລົງຕິດຕາມຊຸກຍູ້ວຽກງານຢູ່ເຂດເສດຖະກິດໃໝ່ ສີທັນດອນ ເມືອງໂຂງ. ໂດຍສະເພາະຊຸກຍູ້ການສືບຕໍ່ພັດທະນາໂຄງການອຸທິຍານແຫຼ່ງທ່ອງທ່ຽວນໍ້າຕົກຕາດຄອນພະເພັງ ແລະ ນໍ້າຕົກຕາດສົມພະມິດໃຫ້ມີໃບໜ້າໃໝ່. ໂດຍມີທ່ານ ນາງ ຄຳພູ ລິດທິສັກ ເຈົ້າເມືອງໂຂງ, ທ່ານ ລີຊຽງ (LI XIANG) ປະທານ ບໍລິສັດ ຮ່ວມພັດທະນາສີທັນດອນ ຈຳກັດ, ມີຄະນະຄຸ້ມຄອງເຂດເສດຖະກິດພິເສດ, ພະແນກການທີ່ກ່ຽວຂ້ອງຂອງແຂວງຈໍາປາສັກເຂົ້າຮ່ວມ.

ໃນການລົງຕິດຕາມຄັ້ງນີ້, ກໍໄດ້ມີກອງປະຊຸມປຶກສາຫາລືຮ່ວມກັນລະຫວ່າງອົງການປົກຄອງແຂວງ ແລະ ເມືອງໂຂງກໍຄືພາກລັດກັບບໍລິສັດດັ່ງກ່າວ ແລະ ໄດ້ຮັບຟັງການລາຍງານຈາກ ຄະນະຄຸ້ມຄອງເຂດເສດຖະກິດພິເສດແຂວງຈໍາປາສັກ ກ່ຽວກັບຜົນການລົງສຳຫຼວດ ແລະເກັບກຳຂໍ້ມູນທາງດ້ານສິ່ງແວດລ້ອມ ແລະສັງຄົມໃນເນື້ອທີ່ດິນ 1.000 ເຮັກຕາ, ສໍາລັບວຽກການຊົດເຊີຍໂຄງການອຸທິຍານນໍ້າຕົກຕາດຄອນພະເພັງ ແລະອຸທິຍານນໍ້າຕົກຕາດສົມພະມິດ (ໃຫ້ຜູ້ສຳປະທານຜູ້ເກົ່າ) ໃນມູນຄ່າ 18 ຕື້ກວ່າກີບ ແລະການຈັດຕັ້ງປະຕິບັດໂຄງການພັດທະນາເສດຖະກິດໃໝ່ສີທັນດອນຊຶ່ງປະກອບມີບັນດາໜ້າວຽກຈຸດສຸມຕ່າງໆ ແຜນການພັດທະນາ 4 ໄລຍະໃນຕໍ່ໜ້າໂດຍສະເພາະໂຄງການອຸທິຍານນໍ້າຕົກຕາດຄອນພະເພັງ ແລະອຸທິຍານນໍ້າຕົກຕາດສົມພະມິດແນວທາງການປັບປຸງປົວແປງສິ່ງອຳນວຍຄວາມສະດວກ ໃນເຂດວັດທະນະທຳ, ເຂດຊົມວີວທາງທຳມະຊາດ ແລະພື້ນທີ່ສີຟ້າ ໃນຈຳນວນ 51 ເຮັກຕາ, ເພື່ອກຽມພ້ອມສຳລັບຕ້ອນຮັບນັກທ່ອງທ່ຽວໃນມື້ໜຶ່ງໃຫ້ຮອງຮັບໄດ້ຫຼາຍກວ່າ 5 ພັນຄົນ ແລະວາງແຜນການກໍ່ສ້າງສ້ອມແປງໄລຍະທຳອິດ ຄາດວ່າຈະໃຊ້ຕົ້ນທຶນການສ້ອມແປງ ປະມານ 500.000 ໂດລາ. ຈາກນັ້ນ, ທ່ານຮອງເຈົ້າແຂວງ ແລະ ຄະນະກໍໄດ້ລົງສຳຫຼວດພາກສະໜາມໃນບັນດາກິດຈະກຳຕ່າງໆທີ່ກ່າວມານັ້ນ ແລະ ກະກຽມເບິ່ງຈຸດທີ່ຈະວາງສີລາລືກໃນ 2 ໂຄງການກໍຄືໂຄງການໂຮງແຮມແຄນຄູ່ຊຶ່ງເປັນສິ່ງກໍ່ສ້າງທີ່ສຳຄັນມີຄວາມສູງ 238,98 ແມັດ ແລະໂຄງການສາງຄ່ຽນຖ່າຍສິນຄ້າທີ່ເຂດພັດທະນາເສດຖະກິດໃໝ່ສີທັນດອນໄດ້ເປີດ 2 ໂຄງການໃໝ່ຢ່າງເປັນທາງການເມື່ອບໍ່ດົນຜ່ານມານີ້.
ຂ່າວ-ພາບ: ທັດຊະນະ

แชร์