ນາຍົກລັດຖະມົນຕີ ກູບາ ແລະຄະນະຢ້ຽມຢາມເຂດພັດທະນາກວມລວມໄຊເສດຖາ

ໃນວັນທີ 3 ຕຸລາ 2022 ຊຶ່ງເປັນມື້ທີ່ 2 ຂອງການເດີນທາງມາຢ້ຽມຢາມສາທາລະນະລັດປະຊາທິປະໄຕປະຊາຊົນລາວຢ່າງເປັນທາງການຂອງສະຫາຍ ມານູເອັນ ມາເຣໂຣ ກຣູຊ໌ ນາຍົກລັດຖະມົນຕີ ແຫ່ງ ສາທາລະນະລັດ ກູບາ ແລະຄະນະ, ໃນລະຫວ່າງວັນທີ 2-4 ຕຸລານີ້, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີທີ່ມີມາແຕ່ດົນນານລະຫວ່າງສອງພັກ, ສອງລັດ ແລະປະຊາຊົນສອງຊາດ ລາວ-ກູບາ ຖານອ້າຍນ້ອງຮ່ວມອຸດົມການອັນດຽວກັນໃຫ້ນັບມື້ເຂັ້ມແຂງ ແລະ ແຕກດອກອອກຜົນຍິ່ງໆຂຶ້ນໃນຊຸມປີຕໍ່ຫນ້າ.

ສະຫາຍ ມານູເອັນ ມາເຣໂຣ ກຣູຊ໌ ແລະຄະນະໄດ້ເຄື່ອນໄຫວຢ້ຽມຢາມເຂດພັດທະນາກວມລວມລວມໄຊເສດຖາໂດຍທ່ານໄດ້ຮັບຟັງການລາຍງານໂດຍຫຍໍ້ກ່ຽວກັບກັບປະຫວັດຄວາມເປັນມາ,ການຈັດຕັ້ງປະຕິບັດວຽກງານດ້ານຕ່າງໆ ລວມເຖີງສະພາບການລົງທືນຢູ່ພາຍໃນເຂດພັດທະນາກວມລວມໄຊເສດຖາຈາກທ່ານ ສະຖາບັນດີດ ອີນສີຊຽງໃຫມ່ ຮອງລັດຖະມົນຕີກະຊວງແຜນການ ເເລະ ການລົງທືນໂດຍທ່ານໃຫ້ຮູ້ວ່າ: ສະເພາະເຂດພັດທະນາກວມລວມໄຊເຊດຖາຈຸດປະສົງຕົ້ນຕໍແມ່ນເພື່ອພັດທະນາແບບກວມລວມຄົບວົງຈອນທີ່ປະກອບດ້ວຍເຂດອຸດສາຫະກໍາທັນສະໄໝ, ເຂດການຄ້າ-ການບໍລິການ ແລະການຂົນສົ່ງ LOGISTIC.

ຮອງລັດຖະມົນຕີກະຊວງ ແຜນການເເລະການລົງທືນໃຫ້ຮູ້ອີກວ່າ: ປັດຈຸບັນເຂດພັດທະນາກວມລວມໄຊເຊດຖາມີບໍລິສັດເຂົ້າມາລົງທຶນ ຈໍານວນ 103 ບໍລິສັດ, ມີທຶນຈົດທະບຽນ 418 ລ້ານໂດລາສະຫະລັດ, ແຜນການລົງທຶນ 2,1 ຕື້ໂດລາສະຫະລັດ ມີແຮງງານພາຍໃນເຂດ ທັງໝົດ 5,112 ຄົນ, ແຮງງານລາວ 3,948 ຄົນ, ແຮງງານຕ່າງປະເທດ 1,164 ຄົນ. ມີມູນການລົງທຶນຕົວຈິງພາຍໃນເຂດ 2,1 ຕື້ໂດລາສະຫະລັດ ໄດ້ມີບໍລິສັດທີ່ມີຊື່ສຽງເຂົ້າມາລົງທຶນເປັນຈໍານວນຫຼາຍເຊັ່ນ: ບໍລິສັດ ໂຮຢາລາວ ຈຳກັດ ຈາກປະເທດຢີປຸ່ນເຂົ້າມາຕັ້ງໂຮງງານຜະລິດເລນແວ່ນຕາ ແລະແຜນຣາດດິດເພື່ອສົ່ງອອກ. ບໍລິສັດ ຜະລິດຢາ ໂກເດັນວິດສະດອມ (ລາວ) ຈໍາກັດ ກໍ່ແມ່ນບໍລິສັດໜຶ່ງທີ່ມີຊື່ສຽງ ແລະ ໄດ້ຮັບການຍອມຮັບຈາກສາກົນ, ຊຶ່ງເປັນບໍລິສັດຈາກ ສປ ຈີນ ເຂົ້າມາຕັ້ງໂຮງງານເພື່ອວິໃຈ, ພັດທະນາ, ຜະລິດ, ຈຳໜ່າຍຜະລິດຕະພັນຢາ ແລະຜະລິດຕະພັນເສີມສຸກຂະພາບທີ່ກຳລັງດຳເນີນການກໍ່ສ້າງ, ບໍລິສັດ ເປໂຕ ເຄມີລາວ ຈຳກັດ ເປັນໂຮງງານກັ່ນນໍ້າມັນ ແລະ ຜະລິດນໍ້າມັນເຄື່ອງ ເພື່ອສະໜອງໃຫ້ແກ່ພາຍໃນ ແລະຕ່າງປະເທດ, ບໍລິສັດ ຄວາມຫວັງໃໝ່ ຈຳກັດ ຜະລິດຫົວອາຫານສັດ ເພື່ອຈຳໝ່າຍທັງພາຍໃນ ແລະສົ່ງອອກຕ່າງປະເທດ, ບໍລິສັດ ຕັດຫຍິບເປເຕີ ຈໍາກັດ ເປັນໂຮງງານຕັດຕັດຫຍິບເຄື່ອງນຸ່ງຫົ່ມຊຶ່ງມາຮອດ ເດືອນກັນຍາ 2022 ເຂດພັດທະນາກວມລວມໄຊເຊດຖາ ສາມາດປະຕິບັດພັນທະເຂົ້າງົບປະມານຂອງລັດໄດ້ທັງໝົດ 179 ຕື້ກີບ.

ຫຼັງທີ່ສະຫາຍ ມານູເອັນ ມາເຣໂຣ ກຣູຊ໌ ນາຍົກລັດຖະມົນຕີ ແຫ່ງ ສາທາລະນະລັດ ກູບາ ແລະຄະນະໄດ້ຮັບຟັງການລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານຕ່າງໆຂອງເຂດພັດທະນາກວມລວມໄຊເສດຖາຈາກຮອງລັດຖະມົນຕີກະຊວງແຜນການເເລະການລົງທືນເເລ້ວໄດ້ສືບໄປຢ້ຽມຢາມໂຮງການຜະລິດຢາທີ່ຕັ້ງຢູ່ເຂດພັດທະນາກວມລວມໄຊເສດຖາຫລັງຈາກນັ້ນໄດ້ສືບຕໍ່ໄປເຄື່ອນໄຫວຢ້ຽມຢາມໂຮງຮຽນມັດທະຍົມສົມບູນມີດຕະພາບລາວ-ກູບາ ຢູ່ບ້ານດົງບັງ ເມືອງໄຊທານີ ຕື່ມອີກ.
ຂ່າວ: ເດດອາລຸນ ແກ້ວວິໄລ

แชร์