ປະຊາຊົນ 130 ຄອບຄົວ ບ້ານຫາດອຸດົມໄຊ ເມືອງສະໜາມໄຊ ໄດ້ຮັບເຄື່ອງຊ່ວຍເຫຼືອ

ແຫຼ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ໃນລະຫວ່າງວັນທີ 1-2 ຕຸລາ 2022 ອົງການກາແດງແຂວງອັດຕະປື, ພ້ອມທີມງານໄດ້ນຳເອົາເຄື່ອງນຸ່ງຫົ່ມ 1.300 ຜືນ, ໝີ່ໄວໆ 1.000 ຫໍ, ລວມມູນຄ່າ ເກືອບ 30 ລ້ານກີບ ໄປຊ່ວຍເຫຼືອເບື້ອງຕົ້ນໃຫ້ແກ່ຄອບຄົວທີ່ໄດ້ຮັບຜົນກະທົບຈາກພະຍຸໂນຣຸ ຢູ່ບ້ານຫາດອຸດົມໄຊ ເມືອງສະໜາມໄຊ ຈຳນວນ 130 ຄອບຄົວ ຊຶ່ງມອບໂດຍ ທ່ານ ບໍລິສຸດ ພົມມະໂຄດ ຫົວໜ້າຫ້ອງການອົງການກາແດງແຂວງອັດຕະປື ແລະກ່າວຮັບໂດຍຕາງໜ້າອຳນາດປົກຄອງບ້ານໂດຍມີຫົວໜ້າຫ້ອງການກາແດງເມືອງ ແລະປະຊາຊົນພາຍໃນບ້ານເຂົ້າຮ່ວມ.

ໂອກາດດັ່ງກ່າວນີ້, ຕາງໜ້າອໍານາດການປົກຄອງບ້ານກໍໄດ້ກ່າວສະແດງຄວາມຂອບອົກຂອບໃຈມາຍັງພັກ-ລັດ ກໍຄືອົງການກາແດງແຂວງທີ່ມີຄວາມເປັນຫ່ວງເປັນໃຍຕໍ່ຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ແລະພ້ອມຈະນໍາເອົາເຄື່ອງຊ່ວຍເຫລືອທີ່ໄດ້ຮັບຄັ້ງນີ້ມອບຕໍ່ໃຫ້ປະຊາຊົນພາຍໃນ 130 ຄອບຄົວຢ່າງ ທົ່ວເຖິງ.
ຂ່າວ: ຕ່າຍທອງ

• 04/10/2022