ກຽມພົບກັບ ບຸນມະໂຫລານສົ່ງເສີມການອ່ານ ຄັ້ງທີ 3 ປະຈຳປີ 2022

ບຸນມະໂຫລານສົ່ງເສີ່ມການອ່ານຄັ້ງທີ 3 Book fesfival 2022 ຊຶ່ງຈະໄດ້ຈັດຂື້ນໃນລະຫວ່າງວັນທີ 9-13 ພະຈິກ 2022 ຢູ່ທີ່ສູນການຄ້າສາກົນ VTC ນະຄອນຫຼວງວຽງຈັນ ໃນຫົວຂໍ້ “ຮູ້ຮັກພາສາລາວ”. ເປັນການສືບເນື່ອມາຈາກຜົນສຳເລັດຂອງການຈັດງານບຸນມະໂຫລານສົ່ງເສີມການອ່ານໃນປີ 2019 ທີ່ສູນການຄ້າສາກົນ WTC ພາຍໃຕ້ຄຳຂວັນ “ສ້າງການອ່ານໃຫ້ເປັນວັດທະນະທຳນຳຄວາມຮູ້ຄວາມກ້າວໜ້າຢ່າງຍຶນຍົງ” ຊຶ່ງມີຜູ້ເຂົ້າຮ່ວມງານຫຼາຍກວ່າ 65 ພັນຄົນ ດ້ວຍກິດຈະກຳຫລາຍກວ່າ 10 ລາຍການ ແລະຄັ້ງທີ 2 ຈັດຂຶ້ນທີ່ສູນການຄ້າວຽງຈັນເຊັນເຕີ ເຊິ່ງເປັນການສ້າງປະສົບການໃໝ່ໃຫ້ແກ່ນັກຮຽນ-ນັກສຶກສາ ທີ່ມີຄວາມສົນໃຈໃນການອ່ານ.

ເນື່ອງຈາກມີການລະບາດຂອງພະຍາດໂຄວິດ-19 ໃນປີ 2021, ງານບຸນມະໂຫລານສົ່ງເສີ່ມການອ່ານຈຶ່ງໄດ້ຖືກເລື່ອນອອກໄປ ແລະໃນປີ 2022 ນີ້ ບຸນມະໂຫລານສົ່ງເສີມການອ່ານຈຶ່ງໄດ້ກັບມາອີກຄັ້ງພາຍໃຕ້ຫົວຂໍ້ກິດຈະກຳ “ຮູ້ຮັກພາສາລາວ”. ໃນງານຄັ້ງນີ້ແມ່ນຈະມີກິດຈະກໍາຫຼາຍກວ່າ 10 ລາຍການ ເພື່ອແນໃສ່ການສ້າງຄົນຮຸ່ນໃໝ່ໃຫ້ໄດ້ຮັບການພັດທະນາຮອບດ້ານ ແລະສົມສ່ວນທາງດ້ານຮ່າງກາຍ, ຈິດໃຈ ແລະສະຕິປັນຍາ (ຄວາມຮູ້ຄວາມສາມາດ).

ການຈັດງານໃນຄັ້ງນີ້ເປັນການສານຕໍ່ງານບຸນມະໂຫລານສົ່ງເສີມການອ່ານໃຫ້ມີຂຶ້ນຢ່າງຕໍ່ເນື່ອງທຸກໆປີເພື່ອເປັນການສົ່ງເສີມໃຫ້ຄົນລາວເລັງເຫັນເຖິງຄວາມສຳຄັນຂອງການອ່ານ ແລະສົ່ງເສີມໃຫ້ອ່ານໜັງສືຢ່າງຕໍ່ເນື່ອງ ແລະເປັນການສົ່ງເສີມໃຫ້ເຍົາວະຊົນ-ຊາວໜຸ່ມ ມີຄວາມມັກຮັກໃນການອ່ານ.
ຂ່າວ: ສຸກສະຫວັດ

แชร์