ປະທານ ສະພາແຫ່ງຊາດຕ້ອນຮັບນາຍົກລັດຖະມົນຕີ ສ ກູບາ

ໃນວັນທີ 3 ຕຸລາ 2022 ທີ່ສະພາແຫ່ງຊາດ, ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ໄດ້ຕ້ອນຮັບ ແລະພົບປະກັບສະຫາຍ ມານູເອັນ ມາເຣໂຣ ກຣູຊ໌(Manuel Marrero Cruz), ນາຍົກລັດຖະມົນຕີ ແຫ່ງ ສາທາລະນະລັດກູບາ ໃນໂອກາດເດີນທາງຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 2-4 ຕຸລາ 2022.

ໃນໂອກາດນີ້, ສະຫາຍປະທານສະພາແຫ່ງຊາດລາວໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະຕີລາຄາສູງຕໍ່ການຢ້ຽມຢາມ ສປປ ລາວ ຢ່າງເປັນທາງການ ຂອງ ສະຫາຍ ມານູເອັນ ມາເຣໂຣ ກຣູຊ໌ ແລະ ຄະນະ ໃນຄັ້ງນີ້ ຊຶ່ງເປັນການປະກອບສ່ວນອັນສຳຄັນເຂົ້າໃນການຊຸກຍູ້ ແລະເສີມຂະຫຍາຍສາຍພົວພັນມິດຕະພາບທີ່ມີມູນເຊື້ອອັນດີງາມ ແລະການຮ່ວມມືຖານອ້າຍນ້ອງຮ່ວມອຸດົມການດຽວກັນຂອງສອງຊາດ ລາວ-ກູບາ ໃຫ້ແໜ້ນແຟ້ນ ແລະແຕກດອກອອກຜົນຍິ່ງໆຂຶ້ນ.

ໃນໂອກາດດຽວກັນ, ສະຫາຍ ມານູເອັນ ມາເຣໂຣ ກຣູຊ໌ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນຄັ້ງນີ້, ພ້ອມທັງໄດ້ແຈ້ງໃຫ້ ສະຫາຍ ໄຊສົມພອນ ພົມວິຫານ ຊາບກ່ຽວກັບຈຸດປະສົງຂອງການຢ້ຽມຢາມຄັ້ງນີ້ລວມເຖິງຜົນສໍາເລັດຂອງການພົບປະສອງຝ່າຍກັບ ສະຫາຍ ນາຍົກລັດຖະມົນຕີ ພັນຄໍາ ວິພາວັນ ໃນມື້ຜ່ານມາ, ທັງໄດ້ແຈ້ງໃຫ້ຊາບສະພາບພົ້ນເດັ່ນ ຂອງກູບາ ແລະທິດທາງການເສີມຂະຫຍາຍການພົວພັນຮ່ວມມືລະຫວ່າງ ສອງປະເທດ ລາວ-ກູບາ ໃນຕໍ່ໜ້າ.

ສະຫາຍ ໄຊສົມພອນ ພົມວິຫານ ໄດ້ຕີລາຄາສູງຕໍ່ສາຍພົວພັນມິດຕະພາບທີ່ເປັນມູນເຊື້ອແຫ່ງການຮ່ວມມືອັນດີງາມ ແລະຄວາມສາມັກຄີຖານອ້າຍນ້ອງລະຫວ່າງ ສອງພັກ, ສອງລັດ ແລະປະຊາຊົນສອງຊາດ ລາວ-ກູບາ ໃນໄລຍະສະໄໝຕໍ່ສູ້ກູ້ຊາດກໍຄືໄລຍະສ້າງສາປະເທດຊາດໃນປັດຈຸບັນ. ສະຫາຍປະທານສະພາແຫ່ງຊາດໄດ້ຕີລາຄາສູງການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດອໍານາດປະຊາຊົນກູບາ ຊຶ່ງໃນເດືອນເມສາ 2022 ຜ່ານມາ, ສອງປະທານສະພາກໍໄດ້ມີກອງປະຊຸມພົບປະທາງໄກຮ່ວມກັນຊຶ່ງໄດ້ທົບທວນຄືນການພົວພັນຮ່ວມມື, ການແລກປ່ຽນບົດຮຽນ ແລະ ຂໍ້ມູນຂ່າວສານຕ່າງໆ ແລະອື່ນໆ ບົນພື້ນຖານການຈັດຕັ້ງປະຕິບັດ ບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງສອງອົງການນິຕິບັນຍັດທີ່ລົງນາມຮ່ວມກັນ ໃນປີ 2019. ທັງໝົດນີ້ເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍການພົວພັນຮ່ວມມືທີ່ມີມູນເຊື້ອອັນດີງາມມາແຕ່ດົນນານລະຫວ່າງສອງຊາດ ລາວ-ກູບາ ບົນພື້ນຖານຮ່ວມອຸດົມການສັງຄົມນິຍົມ. ພ້ອມນີ້, ສະຫາຍ ໄຊສົມພອນ ພົມວິຫານ ກໍໄດ້ຢືນຢັນຄືນວ່າພັກ,ລັດຖະບານ ແລະປະຊາຊົນລາວບັນດາເຜົ່າຈະສືບຕໍ່ເຮັດສຸດຄວາມສາມາດຮ່ວມກັບພັກ, ລັດຖະບານ ແລະ ປະຊົນກູບາ ອ້າຍນ້ອງ ໃນການປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບອັນດີງາມ ທີ່ເປັນມູນເຊື້ອມາແຕ່ດົນນານລະຫວ່າງ ສອງຊາດ ລາວ-ກູບາ ໃຫ້ແຕກດອກອອກຜົນຍິ່ງໆຂຶ້ນຕອບສະໜອງຜົນປະໂຫຍດຂອງ ປະຊາຊົນສອງຊາດ ກໍຄືເພື່ອພາລະກິດສັນຕິພາບ, ມິດຕະພາບ ແລະການຮ່ວມມືໃນພາກພື້ນ ແລະໃນໂລກ.

ໃນຕອນທ້າຍ, ສະຫາຍ ໄຊສົມພອນ ພົມວິຫານ ໄດ້ຝາກຄວາມຢື້ຢາມຖາມຂ່າວຂອງການນໍາພັກ ແລະລັດຖະບານລາວກໍຄືໃນນາມສ່ວນຕົວສົ່ງຜ່ານສະຫາຍ ມານູເອັນ ມາເຣໂຣ ກຣູຊ໌ ໄປຍັງການນໍາພັກ ແລະ ລັດຖະບານກູບາ ໂດຍສະເພາະສະຫາຍ ເອັສເຕບານ ລາ ໂຊເຮີ ນານເດສ ປະທານສະພາແຫ່ງຊາດອໍານາດປະຊາຊົນ ແຫ່ງສ ກູບາ. ພ້ອມທັງ ໄດ້ຢໍ້າຄືນການເຊື້ອເຊີນສະຫາຍປະທານສະພາແຫ່ງຊາດອໍານາດປະຊາຊົນກູບາເພື່ອເດີນທາງຢ້ຽມຢາມ ສປປ ລາວ ໃນເວລາທີ່ມີຄວາມສະດວກ ແລະ ຂໍອວຍພອນໃຫ້ຄະນະເດີນທາງກັບປະເທດດ້ວຍຄວາມສະຫວັດດີພາບ.
ຂ່າວ: ກົມການຂ່າວ ພາບ:ເກດສະໜາ

แชร์