ທຫລ ສ້າງຂະບວນແລ່ນ-ຍ່າງ ເພື່ອສຸຂະພາບຂໍ່ານັບຮັບຕ້ອນວັນສ້າງຕັ້ງ ທຫລ ຄົບຮອບ 54 ປີ

ວັນທີ 1 ຕຸລາ 2022 ທີ່ ເຂດເສດຖະກິດພິເສດບຶງທາດຫຼວງ ທະນາຄານແຫ່ງ ປປ ລາວ (ທຫລ) ພ້ອມດ້ວຍທະນາຄານທຸລະກິດທີ່ດຳເນີນທຸລະກິດຢູ່ ສປປ ລາວ ໄດ້ຮ່ວມກັນຈັດຂະບວນກິລາແລ່ນມິນິມາລາທອນ-ຍ່າງ ເພື່ອສຸຂະພາບເພື່ອຂໍ່ານັບຮັບຕ້ອນວັນສ້າງຕັ້ງທະນາຄານແຫ່ງ ສປປ ລາວ ຄົບຮອບ 54 ປີ (7/10/1968 – 7/10/2022) ໄລຍະ 2,5 ກິໂລແມັດ ແລະ 5,5 ກິໂລແມັດ ພາຍໃຕ້ການເປັນປະທານຂອງ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ພ້ອມດ້ວຍ ຄະນະນຳ-ຄະນະກົມຈາກທະນາຄານແຫ່ງ ສປປ ລາວ, ຄະນະອຳນວຍການຂອງທະນາຄານທຸລະກິດ ແລະບໍລິສັດ Fintech ພ້ອມດ້ວຍພະນັກງານຂະແໜງການທະນາຄານເຂົ້າຮ່ວມ.

ການຈັດຂະບວນການແລ່ນມິນິມາລາທອນ ແລະຍ່າງເພື່ອສຸຂະພາບໃນຄັ້ງນີ້ໄດ້ໃຫ້ຮູ້ວ່າ: ຈຸດປະສົງຂອງຂະບວນການໃນມື້ນີ້ ແມ່ນເພື່ອສ້າງຂະບວນການຂໍ່ານັບຮັບຕ້ອນວັນສ້າງຕັ້ງທະນາຄານແຫ່ງ ສປປ ລາວ ຄົບຮອບ 54 ປີ ໃຫ້ມີຄວາມເບີກບານມ່ວນຊື່ນ, ມີຄວາມຟົດຟື້ນ, ມີຊີວິດຊີວາ, ເສີມສ້າງຄວາມສາມັກຄີ, ເສີມຂະຫຍາຍສາຍສຳພັນອັນສະໜິດແໜ້ນໃຫ້ແໜ້ນແຟ້ນຂຶ້ນກວ່າເກົ່າພາຍໃນຂະແໜງການທະນາຄານ-ການເງິນຂອງພວກເຮົາ. ໂດຍກ່ອນໜ້ານີ້,ທຫລ ໄດ້ປະກອບສ່ວນຊ່ວຍສັງຄົມ ໂດຍມອບເງິນຊ່ວຍຜູ້ປະສົບໄພນໍ້າຖ້ວມຢຸ່ແຂວງອຸດົມໄຊຈຳນວນ 215.880.000 ກີບ ແລະສະໜັບໜູນການປະກວດພິທີກອນ, ໂຄສົກໄວໜຸ່ມທີ່ຈັດໂດຍສະຖານນີໂທລະພາບແຫ່ງຊາດລາວຈຳນວນ 20.000.000 ກີບ ແລະໃນມໍ່ໆນີ້ຈະມີການພົບປະອາດີດການນຳ-ພະນັກງານບຳນານຂອງ ທຫລ ຕື່ມອີກ.

ທຫລ ໄດ້ຮັບການສ້າງຕັ້ງຂຶ້ນ ໃນວັນທີ 7 ຕຸລາ 1968 ທີ່ເມືອງວຽງໄຊ ແຂວງຫົວພັນໂດຍການຊີ້ນໍາ-ນໍາພາຂອງພັກ ກໍຄືສູນກາງແນວລາວສ້າງຊາດມີໜ້າທີ່ພິມຈໍາໜ່າຍເງິນກີບປົດປ່ອຍອອກຈໍລະຈອນ ແລະຄຸ້ມຄອງ-ນໍາພາວຽກງານທະນາຄານຢູ່ເຂດປົດປ່ອຍ ທັງເປັນຄັງເງິນຮັບໃຊ້ເບີກຈ່າຍເງິນເດືອນ-ເງິນບໍລິຫານໃຫ້ບັນດາສໍານັກງານ-ອົງການອ້ອມຂ້າງສູນກາງ ແລະເຂດພິເສດ, ຜະລິດບັດນະໂຍບາຍສິນເຊື່ອ ເພື່ອຂະຫຍາຍການຜະລິດ ແລະທັງເປັນການຕໍ່ສູ້ດ້ານເງິນຕາກັບຝ່າຍສັດຕູ. ຈົນມາຮອດປະຈຸບັນ, ທຫລ ແມ່ນປະຕິບັດ 3 ໜ້າທີ່ຫຼັກຄື: ❶ ຄຸ້ມຄອງມະຫາພາກທາງດ້ານເງິນຕາ ໃຫ້ມີສະຖຽນລະພາບ, ❷ ຄຸ້ມຄອງສະຖາບັນການເງິນໃຫ້ມີຄວາມໝັ້ນຄົງ, ❸ ຄຸ້ມຄອງລະບົບການຊໍາລະໃຫ້ມີປະສິດທິພາບ.

ຜ່ານຂະບວນວິວັດແຫ່ງການກໍາເນີດ ແລະເຕີບໃຫຍ່ຂະຫຍາຍຕົວຕະຫຼອດ 54 ປີ ພາຍໃຕ້ການຊີ້ນໍາ-ນໍາພາຂອງພັກ ແລະລັດຖະບານ; ຂະແໜງການທະນາຄານ ໂດຍສະເພາະ ທຫລ ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງເປັນຕົ້ນວຽກງານວິຊາສະເພາະໄດ້ຮັບການຍົກສູງຂຶ້ນທາງດ້ານປະລິມານ ແລະ ຄຸນນະພາບຊຶ່ງຖືເອົາວຽກງານການເມືອງ-ແນວຄິດ ເປັນບັນຫາສໍາຄັນຕົ້ນຕໍໂດຍຈັດຕັ້ງປະຕິບັດຂໍ້ແຂ່ງຂັນ “ຮັກຊາດ ແລະພັດທະນາຕິດພັນກັບການຮັກສະຖຽນລະພາບເງິນຕາ ແລະສະໜອງທຶນແກ້ໄຂຄວາມທຸກຍາກ”.

 

แชร์