ທ​ຫລ ປະຊຸມສະພາບໍລິຫານ ຄັ້ງທີ II

ວັນທີ 30 ກັນຍາ 2022 ກອງປະຊຸມສະພາບໍລິຫານ ທຫລ ຄັ້ງທີ II ປະຈໍາປີ 2022ໄດ້ໄຂຂຶ້ນໂດຍອີງຕາມລະບອບປະຊຸມສະພາບໍລິຫານ ທຫລ ທີ່ກໍານົດໄວ້ເພື່ອເປັນການສະຫຼຸບ-ຕີລາຄາໝາກຜົນຂອງການເຄື່ອນໄຫວວຽກງານທະນາຄານແຫ່ງ ສປປ ລາວ ໃນໄລຍະ 8 ເດືອນຕົ້ນປີ ແລະ ກໍານົດທິດທາງແຜນການ 4 ເດືອນທ້າຍປີ 2022, ພາຍໃຕ້ການເປັນປະທານຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການ ທຫລ, ປະທານສະພາບໍລິຫານ ທຫລ, ພ້ອມດ້ວຍການເຂົ້າຮ່ວມຂອງສະມາຊິກສະພາບໍລິຫານ ທຫລ.

ກອງປະຊຸມໃນຄັ້ງນີ້ໄດ້ໄຂຂຶ້ນທ່າມກາງສະ​ພາບ​ແວດ​ລ້ອມ​ຢູ່​ພາກ​ພື້ນ ​ແລະ​ສາ​ກົນ​ຍັງ​ສືບ​ຕໍ່ມີ​ຄວາມ​ສັບ​ສົນ ​ແລະ​ຜັນ​ແປ​ຕໍ່​ເນື່ອງຈາກບັນ​ຫາຄວາມ​ຂັດ​ແຍ່ງລະ​ຫວ່າງ​ລັດ​ເຊຍ​ ແລະອູ​ແກ​ຮນໄດ້ສົ່ງ​ຜົນ​ກະ​ທົບຕໍ່​ເສດ​ຖະ​ກິດ​ຂອງ​ພາກ​ພື້ນ ​ແລະ​ສາ​ກົນເຮັດ​ໃຫ້ລາຄານໍ້າມັນ ແລະລາຄາສະບຽງອາຫານຢູ່ຕະຫຼາດສາກົນເພີ່ມຂຶ້ນສູງ, ຄວາມຜັນຜວນສູງຂອງລາຄາຄໍາ, ອັດຕາເງິນເຟີ້ຢູ່ຫຼາຍ​ປະ​ເທດ​ໃນ​ທົ່ວ​ໂລກມີ​ການ​ເພີ່ມ​ຂຶ້ນສູງ​ໃນ​ຮອບ​ຫຼາຍ​ທົດ​ສະ​ວັດເປັນປະ​ຫວັດການເປັນຕົ້ນແມ່ນ ໃນເດືອນ ສິງຫາ 2022 ຢູ່ ສະຫະລັດອາເມລິກາ ແມ່ນ 8,3%, ລັດເຊຍ 14,3%, ອັງກິດ 9,9%, ໄທ 7,86% ແລະມົງໂກນ 14,4%, ເພື່ອຮັບມືກັບການເພີ່ມຂຶ້ນຂອງອັດຕາເງິນເຟີ້, ທະນາຄານກາງຂອງສະຫະລັດອາເມລິກາ ໄດ້ປັບຂຶ້ນອັດຕາດອກເບ້ຍນະໂຍບາຍແຕ່ເດືອນມິຖຸນາ-ກັນຍາຢູ່ໃນລະດັບ 0.75% ຕໍ່ຄັ້ງຈົນມາຢູ່ໃນລະດັບ 3.25% ຊຶ່ງສູງສຸດໃນຮອບ 28 ປີ ສົ່ງຜົນໃຫ້ເງິນໂດລາແຂງຄ່າຂຶ້ນຫຼາຍຈົນຢູ່ໃນລະດັບທີ່ແຂງກວ່າເງິນເອີໂຣ ໃນທ້າຍເດືອນສິງຫາ 2022 ແລະບັນດາຄ່າເງິນໃນພາກພື້ນ ແລະສາກົນອ່ອນຄ່າລົງທຽບໃສ່ເງິນໂດລາ, ໃນເດືອນກັນຍາ ປີ 2022 ເງິນເຢນທຽບໂດລາ ອ່ອນຄ່າ 22.8%, ເງິນເອີໂຣອ່ອນຄ່າ 15,7%, ເງິນບາດອ່ອນຄ່າ  10,3% ທຽບໃສ່ໄລຍະດຽວກັນຂອງປີ.

ສະເພາະຢູ່ ສປປ ລາວ ທີ່ເປັນປະເທດທີ່ມີຂະໜາດເສດຖະກິດຂະໜາດນ້ອຍ, ພື້ນຖານເສດຖະກິດຍັງບໍ່ໜັກແໜ້ນ, ມີການເຊື່ອມໂຍງທາງດ້ານຕະຫຼາດທຶນ ແລະຕະຫຼາດເງິນນຳສາກົນ ແລະເປັນປະເທດທີ່ມີການນຳເຂົ້າສູງ, ຈຶ່ງຫຼີກລ່ຽງບໍ່ໄດ້ຕໍ່ຜົນກະທົບຈາກຄວາມຜັນຜວນຂອງສາກົນ. ຊຶ່ງຜົນກະທົບເຫັນໄດ້ຊັດເຈນແມ່ນອັດຕາເງິນເຟີ້ ເພີ່ມຂຶ້ນສູງສຸດໃນຮອບ 20ກວ່າປີ ທີ່ລະດັບ 30,01% (ໃນເດືອນ 8/2022), ອັດຕາແລກປ່ຽນເງິນກີບທຽບໃສ່ໂດລາ ອ່ອນຄ່າ 17,28%, ທຽບໃສ່ບາດອ່ອນຄ່າ16,6%.

ກອງປະຊຸມໃນຄັ້ງນີ້ຈຶ່ງໄດ້ປຶກສາຫາລືບັນດາມາດຕະການຕອບຕ້ານຕໍ່ຜົນກະທົບດັ່ງກ່າວ,ພ້ອມທັງປຶກສາຫາລືໜ້າວຽກທີ່ພົ້ນເດັ່ນ 4 ໜ້າວຽກຄື: 1. ການເຄື່ອນໄຫວວຽກງານພົ້ນເດັ່ນຂອງ ທຫລ 8 ເດືອນຕົ້ນປີ ແລະທິດທາງແຜນການ 4 ເດືອນທ້າຍປີ 2022; 2. ການຈັດຕັ້ງປະຕິບັດແຜນເງິນຕາຂອງ ທຫລ 8 ເດືອນຕົ້ນປີ 2022 ແລະທິດທາງແຜນການ4 ເດືອນທ້າຍປີ 2022; 3. ການຈັດຕັ້ງປະຕິບັດແຜນງົບປະມານຂອງ ທຫລ 6 ເດືອນຕົ້ນປີ, ຄາດຄະເນປະຕິບັດ 6 ເດືອນທ້າຍປີ ແລະ ສະເໜີດັດແກ້ແຜນງົບປະມານ ປະຈຳປີ 2022 ແລະ 4. ການລາຍງານຄວາມຄືບໜ້າຂອງໂຄງການເງິນກູ້ຈາກ ທະນາຄານພັດທະນາແຫ່ງຊາດຈີນ (CDB) ເພື່ອສົ່ງເສີມ SME ໃນ ສປປ ລາວ.

แชร์