ຮອງເຈົ້າແຂວງສາລະວັນ ລົງຕິດຕາມຜົນເສຍຫາຍນ້າຖ້ວມຈາກລົມພະຍຸ ໂນຣູ ຢູ່ເມືອງວາປີ ແລະເມືອງຄົງເຊໂດນ

ໃນວັນທີ 30 ກັນຍາ 2022 ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ພ້ອມດ້ວຍພາກສ່ວນທີ່ກ່ຽວຂ້ອງໄດ້ລົງເຄື່ອນໄຫວຕິດຕາມຜົນເສຍຫາຍສະພາບນໍ້າຖ້ວມຈາກລົມພະຍຸ ໂນຣູ ຢູ່ 2 ເມືອງຄື: ເມືອງຄົງເຊໂດນ ແລະເມືອງວາປີ.

ໃນໂອກາດນີ້ທ່ານຮອງເຈົ້າແຂວງກໍໄດ້ຮັບຟັງການລາຍງານຜົນກະທົບ ຈາກພະຍຸເຂດຮ້ອນ ໂນຣູທີ່ພັດຜ່ານເຂົ້າແຂວງສາລະວັນ ໃນລະຫວ່າງວັນທີ 27-28 ກັນຍາ ຜ່ານມານີ້ສໍາລັບເມືອງຄົງເຊໂດນໄດ້ມີຫຼາຍພື້ນທີ່ໄດ້ຮັບຜົນກະທົບຢ່າງຫຼວງຫຼາຍຊຶ່ງເປັນເຂດທີ່ຢູ່ລຽບຕາມແມ່ນໍ້າລໍາເຊ, ພື້ນທີ່ຕໍ່າເປັນຕົ້ນເນື້ອທໍາການຜະລິດຖືກນໍ້າຖ້ວມ (ເນື້ອທີ່ນາ) ທັງໝົດ 2,416 ເຮັກຕາ, ກວມເອົາ 54 ບ້ານ ມີຈໍານວນ 2,019 ຄອບຄົວ, ເນື້ອທີ່ປູກພືດ 275 ເຮັກຕາ, ມີໂຮງຮຽນຖືກຖ້ວມ 4 ແຫ່ງ, ໜອງປາ 298 ໜອງ, ບາງເສັ້ນທາງຄົມມະນາຄົມຖືກຕັດຂາດ, ການສັນຈອນຂອງປະຊາຊົນພົບຄວາມຫຍຸ້ງຍາກ ໃນນັ້ນມີ ທາງຫຼວງຂອງແຂວງ ຖືກຜົນກະທົບ 2 ກິໂລແມັດ, ທາງຫຼວງຂອງເມືອງ ຖືກກະທົບ 2 ກິໂລແມັດ; ທາງເທດສະບານເມືອງ ຖືກກະທົບ 9 ກິໂລແມັດ; ທາງທ້ອງຖິ່ນ ຖືກກະທົບ 38 ກິໂລແມັດ ມີຫຼັງຄາເຮືອນຄົວ ຖືກລົມພະຍຸພັດ 1 ຫຼັງຄື: ບ້ານນາໂນງ; ຂົວໄມ້ຈໍານວນ 2 ແຫ່ງ, ຊົນລະປະທານຖືກກະທົບຈໍານວນ 2 ແຫ່ງຄື: ຊົນລະປະທານແກ້ງຫວດຍາວ 1,500 ແມັດ ຊົນລະປະທານນາທຶນ ຍາວ 800 ແມັດ (ກໍ່ສ້າງບໍ່ທັນສໍາເລັດ),

ສໍາລັບເມືອງວາປີໄດ້ມີຝົນຕົກຢ່າງຕໍ່ເນື່ອງໃນລະດັບປານກາງ ເຮັດໃຫ້ລະດັບນໍ້າເຊໂດນເພີ່ມຂຶ້ນຢ່າງໄວວາຊຶ່ງໄດ້ມີຜົນກະທົບຈາກຂົງເຂດຕ່າງໆເປັນຕົ້ນຂົງເຂດກະສິກໍາ ຂໍ້ມູນເບື້ອງຕົ້ນ ເນືອທີ່ນາຖືກຖ້ວມ 6,824 ຮຕ, ຖືກຖ້ວມຕົວຈິງ 28 ບ້ານ ມີ 1,144 ຄອບຄົວ 4,187 ຄົນ, ຍິງ 2,114 ຄົນ, ເນື້ອທີ່ 1,233 ຮຕ ຄາດຄະເນເນື້ອທີ່ເສຍຫາຍ 388,6 ຮຕ = 31,5% ຂອງເນື້ອທີ່ຖືກຖ້ວມ, ດ້ານຊົນລະປະທານ ຖືກກະທົບ 15 ໂຄງການຖ້ວມລະບົບທໍ່ສົ່ງນໍ້າ, ທໍ່ເຫຼັກສົ່ງນໍ້າຂອງໂຄງການຈັກສູບນໍ້າດ້ວຍໄຟຟ້າບ້ານມ່ວງ ຂາດ 12 ແມັດ, ຄິດເປັນມູນຄ່າ 20 ລ້ານກວ່າກີບ, ດ້ານການລ້ຽງສັດ-ການປະມົງ ໜອງປາຖືກນໍ້າຖ້ວມ 50 ໜອງ, ປາເສຍຫາຍປະມານ 33,200 ໂຕ; ສໍາລັບວຽກໂຍທາທິການ ແລະຂົນສົ່ງ: ເສັ້ນທາງຫຼວງເມືອງມີ 2 ເສັ້ນ ຖືກນໍ້າຖ້ວມ 3,1 ກິໂລແມັດ, ເສັ້ນທາງຊົນນະບົດ 12 ເສັ້ນ, ຖືກຖ້ວມ 15,75 ກິໂລແມັດ, ຂົວຖືກກະທົບທັງໝົດ 18 ແຫ່ງ ຖືກຖ້ວມ 403,60 ແມັດ.

ການເຄື່ອນໄຫວລົງເຮັດວຽກຂອງທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນໃນຄັ້ງນີ້ ກໍ່ໄດ້ລົງສໍາຫຼວດເບິ່ງພື້ນທີ່ຖືກນໍ້າຖ້ວມ ແລະໄດ້ຮັບຜົນກະທົບເສຍຫາຍໜ້ອຍຫຼືຫຼາຍ ຕາມສະພາບຕົວຈິງ ແລະເຂດທີ່ສາມາດເກັບກູ້ໄດ້ເປັນຕົ້ນເຂົ້າ, ພືດຜັກ, ສັດລ້ຽງ ແລະອື່ນໆ ທັງປະເມີນຜົນເສຍຫາຍຄັ້ງນີ້ໄປພ້ອມໂອກາດດັ່ງກ່າວທ່ານກໍໄດ້ນໍາເອົາເຄື່ອງອຸປະໂພກ-ບໍລິໂພກຈໍານວນໜຶ່ງມອບໃຫ້ອົງການປົກຄອງເມືອງເພື່ອລົງໄປມອບຕໍ່ໃຫ້ປະຊາຊົນທີ່ໄດ້ຮັບຜົນກະທົບໃນຄັ້ງນີ້.
ໂດຍ: ກິນດາວັນ ອ້ວນນາຄູ

แชร์