ເມືອງຫົງສາ ເປີດແຂ່ງຂັນກີລາປະຈຳປີ

  ວັນທີ 26 ມີນາ ຜ່ານມາເມືອງຫົງສາ ແຂວງໄຊຍະບູລີໄດ້ຈັດພິທີເປີດງານແຂ່ງຂັນກີລາ ປະຈຳປີຢ່າງເປັນທາງການ, ທີ່ເດີນກີລາຂອງເມືອງ. ໂດຍການໃຫ້ ກຽດເຂົ້າຮ່ວມຂອງທ່ານ ພອນສະຫວັນ ໄຊສົມພັນ ຮອງເຈົ້າເມືອງ ຫົງສາ, ມີບັນດາການນໍາຂອງ ເມືອງ, ຕາງໜ້າບໍລິສັດ, ລັດວິສາຫະກິດ, ນາຍບ້ານ, ອຳນວຍການ ໂຮງຮຽນ, ຄະນະກຳມະການຕັດ ສິນພ້ອມດ້ວຍນັກກີລາຈາກທຸກ ພາກສ່ວນເຂົ້າຮ່ວມ.

 ໃນພິທີທ່ານ ພອນສະຫວັນ ໄຊສົມພັນ ຮອງເຈົ້າເມືອງຫົງສາ ກໍ່ໄດ້ກ່າວສະແດງຄວາມຊົມເຊີຍຕໍ່ຄະນະກຳມະການຝ່າຍຕ່າງໆ, ຄູຝຶກ, ນັກກີລາ ແລະນ້ອງນັກຮຽນ.ທີ່ທຸ້ມເທເຫື່ອແຮງ, ສະຕິປັນຍາ, ເວລາໃນການຈັດງານແຂ່ງຂັນກີລາປະຈໍາປີເທື່ອນີ້. ໃຫ້ປະກົດຜົນເປັນຈິງ, ຈາກນັ້ນ, ທ່ານ ຂາວພອນ ທຳມະໂນລາຮອງຫົວໜ້າຫ້ອງກາສຶກສາທິການ ແລະກີລາເມືອງຫົງສາໄດ້ຂຶ້ນລາຍງານການເຄື່ອນໄຫວໃຫ້ຮູ້ວ່າ: ການແຂ່ງຂັນກີລາປະຈຳປີນີ້, ແມ່ນໄດ້ເລີ່ມແຂ່ງຂັນມາຕັ້ງແຕ່ຕົ້ນເດືອນມີນາ ແລະຄາດວ່າຈະໃຫ້ສຳເລັດໃນຕົ້ນເດືອນ ພຶດສະພາ 2019 ນີ້. ລວມມີ 3 ປະເພດກີລາຄື: ບານເຕະ, ບານສົ່ງ  ແລະກະຕໍ້ຫວາຍຊຶ່ງໄດ້ແຍກລຸ້ນອາຍຸການແຂ່ງຂັນຄື: ລຸ້ນອານຸຊົນ, ລຸ້ນເຍົາວະຊົນ ແລະລຸ້ນຊາວໜຸ່ມ.

 ການຈັດການແຂ່ງຂັນກີລາຄັ້ງ ນີ້, ກໍ່ເພື່ອເປັນການສ້າງຂະບວນການຂ່ຳນັບຮັບຕ້ອນວັນສຳຄັນຕ່າງໆຂອງພັກ-ຂອງຊາດເວົ້າລວມເວົ້າສະເພາະກໍ່ເພື່ອຂ່ຳນັບຊົມ ເຊີຍວັນສ້າງຕັ້ງພັກປະຊາຊົນລາວ ຄົບຮອບ 64 ປີ ແລະເພື່ອຂ່ຳນັບຮັບຕ້ອນກອງປະຊຸມໃຫຍ່ອົງຄະນະພັກເມືອງຫົງສາຄັ້ງທີ 8 ທີ່ຈະໄດ້ຈັດຂຶ້ນໃນຕໍ່ໜ້ານີ້.ອີກດ້ານໜຶ່ງ, ກໍ່ເພື່ອເປັນການສ້າງທັກສະທາງດ້ານກີລາ ແລະເຮັດໃຫ້ນັກກີລາຊາວໜຸ່ມ-ເຍົາວະຊົນຫັນມາຫຼິ້ນກີ ລາເພື່ອຫ່າງໄກຢາເສບຕິດ ແລະ ທັງເປັນການຄັດເລືອກເອົາຕົວແທນນັກກີລາຊາວໜຸ່ມ-ເຍົາວະຊົນທີ່ມີຄວາມສາມາດເຂົ້າເປັນນັກກີລາຂອງເມືອງເພື່ອເຂົ້າຮ່ວມການແຂ່ງຂັນກີລາຂັ້ນຕ່າງໆໃນຕໍ່ໜ້າ ນີ້.

 ໃນໂອກາດນີ້, ບັນດາຜູ້ເຂົ້າຮ່ວມກໍ່ໄດ້ຮັບຊົມກິດຈະກຳການເຕັ້ນ ແອໂລບິກຂອງນ້ອງນັກຮຽນ ແລະຮັບຊົມການແຂ່ງຂັນບານເຕະລຸ້ນ ຊາວໜຸ່ມນັດເປີດພິທີລະຫວ່າງທີມໂຮງຮຽນ ມສ ຫົງສາ ພົບກັບ ທີມໂຮງຮຽນ ມສ ບ້ານຫານ.

ນສພ ເສດຖະກິດ-ສັງຄົມ

• 02/04/2019