JDB ມອບເງິນສະໜັບສະໜູນງານບຸນຊ່ວງເຮືອທ່າວັດຈັນ 100 ລ້ານກີບ

ໃນວັນທີ 29 ກັນຍາຜ່ານມາ, ທີ່ສໍານັກງານໃຫຍ່ທະນາຄານຮ່ວມພັດທະນາ (JDB) ນະຄອນຫຼວງວຽງຈັນ ໄດ້ມີພິທີມອບເງິນສະໜັບສະໜູນງານບຸນຊ່ວງເຮືອທ່າວັດຈັນ ຈໍານວນ 100.000.000 ກີບ ໃຫ້ເມືອງຈັນທະບູລີເພື່ອເປັນການປະກອບສ່ວນສະໜັບສະໜູນງານບຸນຊ່ວງເຮືອທ່າວັດຈັນ ປະຈໍາປີ 2022 ໃຫ້ມີຄວາມເບີກບານມ່ວນຊື່ນ ແລະມີຄວາມໝາຍ, ເພື່ອເປັນການດຶງດູດນັກທອ່ງທຽວ ໃຫ້ມາທ່ອງທ່ຽວລາວນັບມື້ນັບຫຼາຍ. ເປັນກ່ຽດເຂົ້າຮ່ວມໃນພິທີດັ່ງກ່າວ ມີທ່ານ ດວງຕາ ສຸລິວົງ ກໍາມະການພັກນະຄອນຫຼວງວຽງຈັນ ເຈົ້າເມືອງຈັນທະບູລີພ້ອມດ້ວຍຄະນະທີ່ໄດ້ມາຢ້ຽມຢາມທະນາຄານຮ່ວມພັດທະນາໃນຄັ້ງນີ້.

ທ່ານ ວິໄລ ສີພະພອນ ຜູ້ອໍານວຍການໃຫຍ່ JDB ໄດ້ກ່າວຕ້ອນຮັບ ແລະ ໄດ້ຍົກໃຫ້ເຫັນພາບລວມຂອງ JDB ຊຶ່ງເປັນທະນາຄານເອກະຊົນລາວທີ່ໄດ້ຮັບຄວາມເຊື່ອໝັ້ນຈາກລູກຄ້າໂດຍການບໍລິການໃຫ້ເປັນທີ່ປະທັບໃຈທັນຍຸກທັນສະໄໝໄດ້ມາດຕະຖານສາກົນຖືເອົາຄວາມຕ້ອງການຂອງລູກຄ້າເປັນຫຼັກໃນການພັດທະນາຜະລິດຕະພັນຢ່າງຫຼວງຫຼາຍດ້ວຍລະບົບເຕັກໂນໂລຊີທີ່ທັນສະໄໝ, ສ້າງຜົນປະໂຫຍດໃຫ້ແກ່ທຸກຝ່າຍສາມາດເຕີບໃຫຍ່ຂະຫຍາຍຕົວໄປພ້ອມກັນ ແລະເປັນການປະກອບສ່ວນທີ່ສໍາຄັນໃນການພັດທະນາປະເທດຊາດ. JDB ໄດ້ມີການປ່ຽນແປງດ້ານການບໍລິຫານ ແລະການບໍລິການລູກຄ້າຂອງຕົນໃຫ້ແທດເໝາະກັບສະພາບການຕົວຈິງຂອງສັງຄົມ, ເຮັດໃຫ້ JDB ມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ. JDB ເຫັນໄດ້ຄວາມໝາຍ ຄວາມສໍາຄັນຂອງງານບຸນດັ່ງກ່າວ ຈຶ່ງໄດ້ປະກອບສ່ວນສະໜັບສະໜູນງານບຸນຄັ້ງນີ້ ມູນຄ່າ 100.000.000 ກີບ, ເພື່ອເຮັດໃຫ້ງານບຸນຊ່ວງເຮືອທ່າວັດຈັນປີນີ້ມີບັນຍາກາດເບີກບານມ່ວນຊື່ນ ແລະມີຄວາມໝາຍ.

ຈາກນັ້ນ, ທ່ານ ດວງຕາ ສຸລິວົງ ກໍໄດ້ໃຫ້ກຽດກ່າວຮັບພ້ອມທັງໄດ້ສະແດງຂອບໃຈ ແລະຄວາມຮູ້ບຸນຄຸນມາຍັງຄະນະຜູ້ບໍລິຫານຂອງ JDB ທີ່ເຫັນໄດ້ຄາວມສໍາຄັນຂອງງານບູນຊ່ວງເຮືອທ່າວັດຈັນຊຶ່ງຊາວນະຄອນຫຼວງວຽງຈັນ ໄດ້ປະຕິບັດກັນມາແຕ່ບູຮານນະການເພື່ອດຶງດູດນັກທ່ອງທ່ຽວໄດ້ເຂົ້າມາທ່ຽວຊົມນະຄອນຫຼວງວຽງຈັນ ນັບມື້ນັບຫຼາຍຂຶ້ນ. ນະຄອນຫຼວງວຽງຈັນ ຍັງຮັກສາຮີດຄອງປະເພນີວັດທະນາທໍາ ແລະ ວິຖີການດໍາລົງຊີວິດແບບດັ້ງເດີມໄວ້ໄດ້. ບຸນຊ່ວງເຮືອປະເພນີຂອງຊາວນະຄອນຫຼວງວຽງຈັນ ກໍແມ່ນບຸນມະໂຫລານໜຶ່ງທີ່ມີຊື່ສຽງທັງເປັນທີ່ຮູ້ຈັກກັນດີຂອງນັກທ່ອງທ່ຽວທາງພາຍໃນ ແລະຕ່າງປະເທດ. ໂອກາດດຽວກັນນີ້,ທ່ານ ດວງຕາ ສຸລິວົງ ໄດ້ອວຍພອນໃຫ້ການດໍາເນີນທຸລະກິດຂອງ JDB ຈົ່ງປະສົບຜົນສໍາເລັດຍິ່ງໆຂຶ້ນ.

ໃນໄລຍະຜ່ານມາ, JDB ກໍໄດ້ມີການປະກອບສ່ວນເຂົ້າໃນການຊ່ວຍເຫຼືອສັງຄົມຢ່າງຕໍ່ເນື່ອງ. JDB ມີຄວາມພາກພູມໃຈ ທີ່ໄດ້ມີໂອກາດໄດ້ຮັບໃຊ້ສັງຄົມໄດ້ຮັບການສະໜັບສະໜູນຈາກສັງຄົມ ແລະເປັນກໍາລັງໃຈໃຫ້ຕະຫຼອດມາ.
ບົດຂ່າວ: ຄໍາຕົ້ນ ວໍລະຈັກ

แชร์