ຈຳປາສັກ ເປັນເຈົ້າພາບຈັດງານວາງສະແດງ ສິນຄ້າກະສິກໍາປຸງແຕ່ງ 9 ແຂວງຕົວແບບ ເພື່ອສົ່ງອອກຕະຫຼາດ ສປ ຈີນ

ໃນວັນທີ 30 ກັນຍາ 2022 ຜ່ານມາໄດ້ມີພິທີເປີດງານວາງສະແດງ ແລະຈໍາໜ່າຍສິນຄ້າກະສິກໍາປຸງແຕ່ງ 9 ແຂວງ ຕົວແບບ ຄື: ແຂວງອຸດົມໄຊ, ໄຊຍະບູລີ,ຫຼວງພະບາງ,ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ ແລະແຂວງຈໍາປາສັກເຈົ້າພາບ, ງານຈັດຂຶ້ນທີ່ສູນການຄ້າແຟຣັນຊິບມໍ ນະຄອນປາກເຊ, ແຂວງຈໍາປາສັກ ໂດຍການເຂົ້າຮ່ວມຂອງ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະການຄ້າ (ອຄ), ມີບັນດາການນໍາແຂວງຈໍາປາສັກ, ຫົວໜ້າພະແນກ, ຮອງຫົວໜ້າພະແນກອຸດສາຫະກໍາ ແລະການຄ້າ 9 ແຂວງ, ເຈົ້ານະຄອນ, ເຈົ້າເມືອງ, ການນໍາຫ້ອງການອຸດສາຫະກໍາ ແລະການຄ້າ 9 ເມືອງ, 1 ນະຄອນ, ນັກທຸລະກິດ, ຜູ້ປະກອບການດ້ານກະສິກໍາປຸງແຕ່ງ ໃນ 9 ແຂວງ ເຂົ້າຮ່ວມ.

ໃນພິທີ ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າແຂວງຈໍາສັກ ໄດ້ລາຍງານວ່າ: ການຈັດງານຄັ້ງນີ້ໂດຍປະຕິບັດຕາມໜັງສືສະເໜີຂອງກົມສົ່ງເສີມການຄ້າກະຊວງອຸດສາຫະກໍາ ແລະການຄ້າຊຶ່ງໄດ້ຮັບການສະໜັບສະໜູນດ້ານງົບປະມານທັງໝົດຈາກໂຄງການປະເມີນການພັດທະນາສິນຄ້າຫົວໜ່ວຍທຸລະກິດຂະ ໜາດນ້ອຍ ແລະ ກາງ ເພື່ອສົ່ງອອກ ແລະ ເຂົ້າເຖິງຕະຫຼາດ ສປ ຈີນ ສົກປີ 2022 ບົນພື້ນຖານສັນຍາຮ່ວມມືໂຄງການກອງທຶນພິເສດແມ່ນໍ້າຂອງ – ແມ່ນໍ້າລ້ານຊ້າງ ລະຫວ່າງ ສປປ ລາວ ແລະ ສປ ຈີນ ລົງວັນທີ 2 ສິງຫາ 2022 ເຊິ່ງພະແນກອຸດສາຫະກໍາ - ການຄ້າແຂວງ ແລະກົມສົ່ງເສີມການຄ້າໄດ້ປະສານສົມທົບກັນເພື່ອວາງແຜນໃນການຈັດຕັ້ງປະຕິບັດງານແຕ່ຕົ້ນເດືອນສິງຫາ 2022 ຜ່ານມາ ໃນການກະກຽມຈັດງານວາງສະແດງ ແລະຈໍາໜ່າຍສິນຄ້າໃນຄັ້ງນີ້.

ງານວາງສະແດງ ແລະຈໍາໜ່າຍສິນຄ້າຄັ້ງນີ້ມີຫ້ອງວາງສະແດງສິນຄ້າເຂົ້າຮ່ວມທັງໝົດ 40 ຫ້ອງ ມີ 46 ຫົວໜ່ວຍ, ໃນນັ້ນຫ້ອງວາງສະແດງສິນຄ້າຕົວແບບຂອງໂຄງການ ຈາກ 9 ແຂວງ 1 ຫ້ອງໃຫຍ່ ກວມເອົາ 6 ຫ້ອງ, ມີ 9 ຫົວໜ່ວຍ; ຫ້ອງວາງສະແດງສິນຄ້າຜະລິດຕະພັນທີ່ພົ້ນເດັ່ນຂອງ 4 ແຂວງພາກໃຕ້: ຈໍາປາສັກ, ສາລະວັນ, ເຊກອງ, ອັດຕະປື 4 ຫ້ອງ, ມີ 4 ຫົວໜ່ວຍ; ຫ້ອງວາງສະແດງ ແລະ ຈໍາໜ່າຍສິນຄ້າ ວິສາຫະກິດພາຍໃນແຂວງຈໍາປາສັກ ມີ 30 ຫ້ອງ. ໃນນັ້ນ, ສິນຄ້າໂອດອບ ມີ 33 ຫົວໜ່ວຍ ຈາກ 9 ເມືອງ 1 ນະຄອນ ມີ 8 ຫ້ອງ; ສິນຄ້າຫັດຖະກໍາ ມີ 6 ຫົວໜ່ວຍ; ສິນຄ້າກະສິກໍາ ແລະອຸດສາຫະກໍາ ປຸງແຕ່ງ ມີ 17 ຫົວໜ່ວຍ. ສິນຄ້າທີ່ນໍາມາວາງສະແດງ ແລະຈໍາໜ່າຍ ແມ່ນປະເພດຜະລິດຕະພັນສິນຄ້າກະສິກໍາ – ອຸດສາຫະກໍາປຸ່ງແຕ່ງ, ກາເຟ, ຊາ, ເຂົ້າ, ພືດຜັກ, ມັນຕົ້ນ, ພາສຕິກ-ທໍ່ພີອີ, ເຄື່ອງຫັດຖະກໍາຈັກສານໄມ້ປ່ອງ, ຫວາຍ, ຜ້າຝ້າຍ, ຝ້າໃໝ, ສິນຄ້າໂອດ໊ອບພ້ອມທັງສິນຄ້າອື່ນໆ ທີ່ເປັນທ່າແຮງຂອງແຂວງ ແລະສິນຄ້າຈາກ 9 ແຂວງທີ່ເຂົ້າຮ່ວມໂຄງການ.

ຕໍ່ມາ, ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າໄດ້ລາຍງານກ່ຽວກັບໂຄງການ ແລະກ່າວເປີດງານ ບາງຕອນທ່ານກ່າວວ່າ: ຈຸດປະສົງ ແລະເປົ້າໝາຍຂອງງານຄັ້ງນີ້ແມ່ນເພື່ອແນ່ໃສ່ການໂຄສະນາຜະລິດຕະພັນສິນຄ້າກະສິກໍາປຸງແຕ່ງ ເພື່ອສົ່ງອອກ ແລະເຂົ້າເຖິງຕະຫຼາດພາຍໃນ ແລະຕ່າງປະເທດຂອງຜະລິດຕະພັນລາວເປັນຫຼັກທັງເປັນການສົ່ງເສີມສິນຄ້າລາວເຂົ້າສູ່ຕະຫຼາດພາຍໃນ ແລະ ສາກົນ ເພື່ອກະຕຸ້ນການຕະຫຼາດ ຢູ່ພາຍໃນປະເທດໃຫ້ມີການຂະຫຍາຍຕົວເພີ່ມຂຶ້ນ, ເຮັດໃຫ້ຜູ້ຜະລິດ ແລະ ຜູ້ປະກອບການເຂົ້າໃຈກ່ຽວກັບສະພາບການປ່ຽນແປງຕະຫຼາດທັງພາຍໃນ ແລະ ຕ່າງປະເທດ ເພື່ອສາມາດປັບໂຕໃຫ້ເຂົ້າກັບສະພາບການປົກກະຕິແບບໃໝ່ໃນປັດຈຸບັນ (New normal), ເຮັດໃຫ້ຫົວໜ່ວຍທຸລະກິດໄດ້ແລກປ່ຽນບົດຮຽນເຊິ່ງກັນ ແລະກັນທັງດ້ານການປຸງແຕ່ງຕະຫຼອດຮອດການຈັບຄູ່ທຸລະກິດ (Business Matching) ລະຫວ່າງຜູ້ປຸງແຕ່ງ ແລະຜູ້ປະກອບການທຸລະກິດກະສິກໍາ, ຫັດຖະກໍາໃຫ້ມີມູນຄ່າທີ່ສູງຂຶ້ນ.

ຈາກນັ້ນ, ກໍມີການຕັດແຖບຜ້າເປີດງານໂດຍການໃຫ້ກຽດຕັດແຖບຜ້າເປີດງານຂອງທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະການຄ້າ. ມີການນໍາ ແລະແຂກເຂົ້າຮ່ວມ. ຕອນທ້າຍຄະນະຮັບຜິດຊອບຈັດງານ ກໍໄດ້ນໍາພາແຂກ ແລະການນໍາທ່ຽວຊົມຫ້ອງວາງສະແດງຕົວແບບ, ທ່ຽວຊົນ 4 ຫ້ອງສິນຄ້າທ່າແຮງ 4 ແຂວງ ແລະມອບຂອງທີ່ລະນຶກໃຫ້ກັບການນໍາຕ່າງໜ້າບັນດາແຂວງຕື່ມອີກ.
ທີ່ມາຂ່າວ: ວສລ

แชร์