ອົງການໄອຍະການປະຊາຊົນສູງສຸດໄດ້ຮັບເຄື່ອງຊ່ວຍເຫຼືອ ມູນຄ່າ 360 ລ້ານກວ່າກີບ

ໃນວັນທີ 30 ກັນຍາຜ່ານມາ, ໄດ້ມີພິທີມອບ-ຮັບເຄື່ອງຊ່ວຍເຫລືອປະກອບມີຄອມພິວເຕີໂນດບຸກ 30 ເຄື່ອງ, ເຄື່ອງປິ້ນເອກະສານ 1 ເຄື່ອງ ລວມມູນຄ່າທັງໝົດ 360 ລ້ານກວ່າກີບ ຈາກສະຖານເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ, ກ່າວຮັບໂດຍ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ແລະກ່າວມອບ ໂດຍ ທ່ານ ປີເຕີ ເຮມ໋ອນ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສະຫະລັດອາເມລິກາ ປະຈຳ ສປປ ລາວ,ມີພະນັກງານຂັ້ນສູງຂອງສອງຝ່າຍເຂົ້າຮ່ວມ.

ໂອກາດນີ້, ທ່ານ ໄຊຊະນະ ໂຄດພູທອນ ໄດ້ສະແດງຄວາມຕ້ອນຮັບ ແລະຕີລາຄາສູງຕໍທ່ານທູດກໍຄືລັດຖະບານ ແຫ່ງ ສະຫະລັດອາເມລິກາ ທີ່ໄດ້ນຳເອົາເຄື່ອງຊ່ວຍ ເຫລືອມາໃຫ້ອົງການໄອຍະການປະຊາຊົນສູງສຸດໃນຄັ້ງນີ້ເພື່ອສະໜັບສະໜູນການປະຕິບັດວຽກງານຂອງອົງການໄອຍະການປະຊາຊົນໃນຂອບເຂດທົ່ວປະເທດ ພ້ອມກັນນັ້ນຍັງຕີລາຄາສູງຜົນສຳເລັດຂອງການຮ່ວມມື ລະຫວ່າງ ສປປ ລາວ ແລະສະຫະລັດອາເມລິກາໃນໄລຍະຜ່ານມາໂດຍສະເພາະການຮ່ວມມືລະຫວ່າງອົງການໄອຍະການປະຊາຊົນ ແຫ່ງ ສປປ ລາວ ແລະ ສະຖານເອກອັກຄະລັດຖະທູດ ແຫ່ງ ສະຫະລັດອາເມລິກາ ປະຈຳ ສປປ ລາວ ທີ່ໄດ້ຮັບການຊ່ວຍເຫລືອໃນການສ້າງຄວາມເຂັ້ມແຂງດ້ານວິຊາການໃຫ້ແກ່ອົງການໄອຍະການປະຊາຊົນຂອງ ສປປ ລາວ ເປັນຢ່າງດີອັນໄດ້ປະກອບສ່ວນເຮັດໃຫ້ວຽກງານໄອຍະການປະຊາຊົນຂອງ ສປປ ລາວ ໄດ້ຮັບການພັດທະນາດີຂຶ້ນເປັນກ້າວໆ, ຮັບປະກັນການປະຕິບັດວຽກງານໄອຍະການໃຫ້ມີປະສິດທິພາບສູງແນໃສ່ປົກປ້ອງຜົນປະໂຫຍດຂອງລັດ, ສັງຄົມ, ສິດ ແລະຜົນປະໂຫຍດອັນຊອບທຳຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະຄວາມເປັນລະບຽບຮຽບຮ້ອຍ, ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດຢ່າງບໍ່ຢຸດຢັ້ງ.
ຂ່າວ: ຈະເລີນສິນ

• 03/10/2022