ທິບເກສອນ ໄຊສົມບູນ ສຳປະທານໂຄງການພັດທະນາກະສິກຳປູກຝັງເມືອງອະນຸວົງ

ໃນວັນທີ 29 ກັນຍາ ຜ່ານມານີ້ ແຂງໄຊສົມບູນຈັດພິທີ ເຊັນສັນຍາສໍາປະທານ ໂຄງການພັດທະນາກະສິກສໍາປູກຝັງ ( ຂີງດໍາ, ພິກໄທ, ໝາກເພັດ ແລະ ພືດຜັກ ) ຢູ່ບ້ານທົ່ງຄູນ ແລະ ບ້ານອ່າວໃຕ້ ເມືອງອະນຸວົງ ແຂວງໄຊສົມບູນ ລະຫວ່າງອົງການປົກຄອງແຂວງໄຊສົມບູນ ກັບບໍລິສັດ ທິບເກສອນ ໄຊສົມບູນ ຈຳກັດ ໂດຍການເຂົ້າຮ່ວມຂອງທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍການນຳແຂວງ, ມີທ່ານນາງ ມຸກນິດາ ພົມເມືອງງາ ອຳນວຍການບໍລິສັດ ທິບເກສອນ ໄຊສົມບູນ ຈຳກັດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

          ຈຸດປະສົງຂອງສັນຍາສະບັບນີ້ ແມ່ນການຕົກລົງເຫັນດີໃຫ້ບໍລິສັດ ທິບເກສອນໄຊສົມບູນ ຈຳກັດ ສຳປະທານໂຄງການພັດທະນາກະສິກຳປູກຝັງ ( ຂີງດຳ,ພິກໄທ,ໝາກເພັດ ແລະ ພືດຜັກ )ຢູ່ບ້ານທົ່ງຄູນ ແລະ ບ້ານອ່າວໃຕ້ ເມືອງອະນຸວົງ ແຂວງໄຊສົມບູນ ໃນເນື້ອທີ່ທັງໝົດເກືອບ200 ເຮັກຕາ,ໄລຍະເວລາຂອງສັນຍາແມ່ນ 30 ປີເພື່ອເປັນການພັດທະນາເສດຖະກິດຂອງປະເທດຊາດ ຊຸກຍູ້ ແລະ ສົ່ງເສີມການພັດທະນາດ້ານກະສິກຳ ເພື່ອຜະລິດເປັນວັດຖຸດິບຕອບສະໜອງໃຫ້ແກ່ບັນດາໂຮງງານອຸດສາຫະກຳປຸງແຕ່ງ ຢູ່ພາຍໃນປະເທດ ແລະ ສົ່ງເສີມການຜະລິດເປັນສິນຄ້າ ຈຳໜ່າຍພາຍໃນ ແລະ ສົ່ງອອກຕ່າງປະທດ ທັງເປັນການສະໜັບສະໜູນການພັດທະນາທ້ອງຖິ່ນ ແລະ ສ້າງວຽກເຮັດງານໃຫ້ແກ່ປະຊາຊົນໃນຂອບເຂດພື້ນທີ່ດັ່ງກ່າວ ກໍຄືພັດທະນາຊີວິດການເປັນຢູ່ຂອງປະຊາຊົນ ຊາວແຂວງໄຊສົມບູນ ໃຫ້ມີຊີວິດການເປັນຢູ່ທີ່ດີຂຶ້ນ ແລະ ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ ນອກຈາກນີ້ ກໍຍັງເປັນການສົ່ງເສີມທຸລະກິດພາຍໃນນຳອີກ ສຳລັບພັນທະຂອງບໍລິສັດ ຕ້ອງຮັບຜິດຊອບຕໍ່ສິ່ງແວດລ້ອມສັງຄົມ ແລະ ທຳມະຊາດ, ຕ້ອງຮັບປະກັນໃຫ້ຖືກຕ້ອງຕາມເຕັກນິກຂອງການປູກພືດ ເພື່ອຮັບປະກັນບໍ່ໃຫ້ມີຜົນກະທົບຕໍ່ທຳມະຊາດ -ສັງຄົມ ແລະສະພາບດິນ,ຕ້ອງປະຕິບັດພັນທະໃນການເສຍພາສີ, ອາກອນ ແລະ ຄ່າທຳນຽມຕ່າງ ທີ່ໄດ້ກຳນົດໄວ້ໃນກົດໝາຍສວຍສາອາກອນ,ພ້ອມທັງເສຍ ເງິນພັນທະໃນການພັດທະນາທ້ອງຖິ່ນ ຈຳນວນ 10.000.000 ກີບ/ປີ,ເງິນພັນທະໃນການພັດທະນາສັງຄົມ 10.000.000 ກີບ /ປີ,ເງິນຕິດຕາມການຈັດຕັ້ງປະຕິບັດຕາມສັນຍາ ພະແນກແຜນການ ແລະ ການລົງທຶນແຂວງ: 10.000.000 ກີບ/ປີ,ເງິນຕິດຕາມກວດກາໂຄງການໃຫ້ພະແນກກະສິກໍາແລະປ່າໄມ້ແຂວງ 10.000.000 ກີບ/ປີພາຍຫຼັງທັງສອງຝ່າຍ ໄດ້ລົງນາມໃນສັນຍາສະບັບນີ້ ຝ່າຍບໍລິສັດ ຕ້ອງວາງເງິນຄໍ້າປະກັນໂຄງການ ຈຳນວນ  20,000 ໂດລາສະຫາລັດ ໃຫ້ແກ່ແຂວງໄຊສົມບູນ.

          ໂອກາດນີ້ ທ່ານ ພອຍຄຳ ຮຸ່ງບຸນຍວງ ໄດ້ມີຄຳເຫັນໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ ບໍລິສັດ ທິບເກສອນ ໄຊສົມບູນ ຈຳກັດ ທີ່ໄດ້ປະກອບສ່ວນອັນສຳຄັນ ເຂົ້າໃນການສ້າງສາພັດທະນາ ແຂວງໄຊສົມບູນ ຊຶ່ງມັນໄດ້ເປັນການພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນ ພ້ອມນີ້ ທ່ານຍັງຮຽກຮ້ອງໃຫ້ຝ່າຍບໍລິສັດ ຈົ່ງຍົກສູງຄວາມຮັບຜິດຊອບ ໃນການຈັດຕັ້ງປະຕິບັດສັນຍາສະບັບນີ້ ພ້ອມທັງ ເນັ້ນໜັກໃຫ້ທຸກພາກສວ່ນທີ່ກ່ຽວຂ້ອງ ຈົ່ງເປັນເຈົ້າການໃນການຕິດຕາມກວດກາ ການຈັດຕັ້ງປະຕິບັດໂຄງການຢ່າງໃກ້ສິດ ເພື່ອຮັບປະກັນໃຫ້ແກ່ການດຳເນີນໂຄງການມີຜົນສຳເລັດຕາມແຜນການທີ່ວາງໄວ້

แชร์