ຢຶດຊີ້ນໝູລັກລອບນຳເຂົ້າ 170 ກວ່າກິໂລ

 ໃນໄລຍະຜ່ານມາ, ໄດ້ເກີດມີການແຜ່ລະບາດຂອງພະຍາດອະຫິວາໝູອາຟຣິກາໃນປະເທດເພື່ອນບ້ານເປັນຕົ້ນແມ່ນ ຈີນ ແລະ ຫວຽດນາມ, ຕໍ່ສະພາບການດັ່ງກ່າວ, ການນໍາຂອງແຂວງສະຫວັນນະເຂດ ກໍ່ຄືພາກສ່ວນທີ່ກ່ຽວຂ້ອງກໍ່ໄດ້ເອົາໃຈໃສ່ລົງຕິດຕາມກວດສອບຕາມເຂດຊາຍແດນທີ່ມີຄວາມສ່ຽງໃນການນໍາເຂົ້າ ແລະລັກລອບນໍາເຂົ້າໝູທີ່ອາດຈະນໍາເຊື້ອພະຍາດດັ່ງກ່າວເຂົ້າມາແຜ່ລະບາດພາຍໃນປະເທດຂອງເຮົາ.

  ໃນວັນທີ 27 ມີນາ 2019 ນີ້, ທ່ານ ຄໍາຈັນ ສີດາວົງ ຫົວໜ້າຂະແໜງການລ້ຽງສັດ ແລະການປະມົງພະແນກກະສິກໍາ ແລະ ປ່າໄມ້ແຂວງສະຫວັນນະເຂດ ເປີດເຜີຍໃຫ້ຮູ້ວ່າ: ຫຼັງຈາກທີ່ເກີດການແຜ່ລະບາດຂອງພະຍາດດັ່ງກ່າວພວກເຮົາກໍ່່ບໍ່ໄດ້ນິ້ງນອນໃຈ, ໄດ້ມີການຕິດຕາມເຝົ້າລະວັງ, ສະກັດກັ້ນບໍ່ໃຫ້ມີການນໍາເຂົ້າຫຼືລັກລອບນໍາເຂົ້າ

 ໝູຈາກປະເທດໃກ້ຄຽງໂດຍໄດ້ມີການຈັດຕັ້ງພະນັກງານລົງຕິດຕາມຮ່ວມກັບເຈົ້າໜ້າທີ່ໃນ 14 ເມືອງ 1 ນະຄອນເຊິ່ງຈະເນັ້ນໜັກໃນເຂດເມືອງນອງ ແລະ ເຊໂປນທີ່ມີດ່ານຊາຍແດນຕິດຈອດກັບຫວຽດນາມ.

  ຜ່ານການຕິດຕາມກວດກາຢ່າງໃກ້ຊິດສາມາດພົບເຫັນ ແລະຢຶດທໍາລາຍຊີ້ນໝູທີ່ນໍາເຂົ້າຈາກປະເທດໃກ້ຄຽງໄດ້ກວ່າ 170 ກິໂລ, ເຊິ່ງໃນການປະຕິບັດໜ້າທີ່ຂອງຂະແໜງລ້ຽງສັດ ແລະການປະມົງໄດ້ມີການຮ່ວມມືສົບທົບກັບເຈົ້າໜ້າທີ່ແຕ່ລະພາກສ່ວນທີ່ກ່ຽວຂ້ອງໃນການລົງກວດສອບເປັນຕົ້ນແມ່ນຕະຫຼ າດພາຍໃນ 14 ເມືອງ 1 ນະຄອນ ແລະມີການສີດພົ່ນຢາຂ້າເຊື້ອໃສ່ລົດທີ່ສັນຈອນຕາມດ່ານຊາຍແດນເພື່ອຫຼຸດຄວາມສ່ຽງໃນການແຜ່ລະບາດຂອງເຊື້ອພະ ຍາດ.

   ທ່ານຍັງກ່າວອີກວ່າ: ກ່ຽວກັບພະຍາດດັ່ງກ່າວນີ້ແມ່ນສາມາດສັງເກດໝູທີ່ຕິດເຊື້ອພະຍາດໄດ້ຄືຈະເຫັນໃບຫູ, ຜິວໜັງເປັນປ່າມສີແດງຊໍ້າ ແລະ ຊີ້ນຕາຍເປັນຈຸດໆຢູ່ບໍລິເວນຜິວໜັງພື້ນທ້ອງຫຼັງຈາກທີ່ໝູຕາຍແລ້ວ, ພະຍາດດັ່ງກ່າວນີ້, ເມື່ອຕິດເຊື້ອຈະມີອັດຕາການຕາຍສູງເຖິງ 100% ບໍ່ມີຢາປ້ອງກັນ ແລະບໍ່ສາມາດປິ່ນປົວໄດ້.

  ຕໍ່ສະພາບການດັ່ງກ່າວຈຶ່ງຮຽກຮ້ອງໃຫ້ປະຊາຊົນຈົ່ງເປັນຫູເປັນຕາຊ່ວຍກັນໃນການເຝົ້າລະວັງ ແລະ ສະກັດກັ້ນຫາກພົບເຫັນການລັກລອບນໍາເຂົ້າຊີ້ນໝູຂໍໃຫ້ແຈ້ງເຈົ້າໜ້າທີ່ໂດຍດ່ວນທັງນີ້ກໍ່່ເພື່ອບໍ່ໃຫ້ພະຍາດອະຫິວາໝູອາຟຣິກາເກີດຂຶ້ນຢູ່ໃນແຂວງຂອງພວກເຮົາ.

ຂ່າວ: ນສພ ເສດຖະກິດ-ສັງຄົມ

แชร์