ສຳມະນາກ່ຽວກັບການພັດທະນາທ່າບົກ, ການດຳເນີນທຸລະກິດ ລັດວິສາຫະກິດໄຟຟ້າລາວ

ໃນລະຫວ່າງວັນທີ 29-30 ກັນຍາ 2022 ທີ່ແຂວງຫຼວງພະບາງ, ກຳມາທິການເສດຖະກິດ, ເຕັກໂນໂລຊີ ແລະສິ່ງແວດລ້ອມສະພາແຫ່ງຊາດ ໄດ້ຈັດກອງປະຊຸມສຳມະນາກ່ຽວກັບການພັດທະນາທ່າບົກ, ການດຳເນີນທຸລະກິດຂອງລັດວິສາຫະກິດໄຟຟ້າລາວ, ທິດທາງການປັບປຸງໂຄງສ້າງລາຄາໄຟ ຟ້າ ແລະການພັດທະນາ ລະບົບສາຍສົ່ງໄຟຟ້າແຫ່ງຊາດພາຍໃຕ້ການເປັນປະທານຮ່ວມຂອງທ່ານ ສົມມາດ ພົນເສນາ ຮອງປະທານສະພາແຫ່ງຊາດ ຜູ້ຊີ້ນຳວຽກງານເສດຖະກິດ, ແຜນການ ແລະ ການເງິນສະພາແຫ່ງຊາດ ແລະທ່ານ ວົງສະຫວັນ ເທບພະຈັນ ປະທານສະພາປະຊາຊົນແຂວງຫຼວງພະບາງ; ໂດຍມີບັນດາທ່ານຮອງເຈົ້າແຂວງຜູ້ຊີ້ນຳວຽກງານເສດຖະກິດ, ຫົວໜ້າພະແນກການ ແລະ ພາກສ່ວນທີ່ກ່ຽວຂ້ອງຂອງແຂວງ ບໍ່ແກ້ວ, ຫຼວງນໍ້າທາ, ຜົ້ງສາລີ, ອຸດົມໄຊ, ໄຊຍະບູລີ ແລະແຂວງຫຼວງພະບາງ, ມີທ່ານສະມາຊິກສະພາແຫ່ງຊາດ ທີ່ເປັນກຳມະການຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ປະຈຳຢູ່ເຂດເລືອກຕັ້ງ ແຂວງຜົ້ງສາລີ, ຫຼວງນໍ້າທາ, ອຸດົມໄຊ, ບໍ່ແກ້ວ, ຫຼວງພະບາງ ແລະໄຊຍະບູລີ, ກຳມາທິການແຜນການການເງິນ ແລະການກວດສອບ, ກົມວິຊາການກ່ຽວຂ້ອງຂອງສະພາແຫ່ງຊາດ ແລະ ກະຊວງເຂົ້າຮ່ວມ.

ຈຸດປະສົງຂອງກອງປະຊຸມສໍາມະນາຄັ້ງນີ້ເພື່ອຍົກລະດັບຄວາມຮູ້ ແລະຄວາມເຂົ້າໃຈກ່ຽວກັບວຽກງານການພັດທະນາທ່າບົກໃນຂອບເຂດທົ່ວປະເທດເປັນຕົ້ນການກໍານົດທີ່ຕັ້ງ, ສິດ ແລະພາລະບົດບາດຂອງແຕ່ລະທ່າບົກ ແລະບັນຫາອື່ນໆທີ່ກ່ຽວຂ້ອງ; ຮັບຟັງການລາຍງານ ກ່ຽວກັບສະພາບລວມ, ຂໍ້ສະດວກ ແລະຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຢູ່ທ່າບົກ 3 ແຫ່ງ ທີ່ໄດ້ດໍາເນີນທຸລະກິດ ແລະເປີດໃຫ້ບໍລິການແລ້ວໂດຍສະເພາະບ່ອນອີງທາງດ້ານນິຕິກຳໃນການຈັດຕັ້ງປະຕິບັດ ວຽກງານທ່າ ບົກ 3 ແຫ່ງນັ້ນ ຄົບຖ້ວນ, ຊັດເຈນ ແລະ ສອດຄ່ອງກັນແລ້ວບໍ່ ຄວນຈະມີການປັບປຸງຄືແນວໃດເພື່ອບໍ່ໃຫ້ເກີດມີຊ່ອງຫວ່າງ? ລະດົມແນວຄວາມຄິດຕໍ່ທິດທາງການພັດທະນາທ່າບົກອີກ 6 ແຫ່ງທີ່ຈະດຳ ເນີນການໃນຕໍ່ໜ້ານັ້ນ ຄວນຈະມີນິຕິກຳຄຸ້ມຄອງຄືແນວໃດເພື່ອໃຫ້ສອດຄ່ອງກັບສະພາບ ຈຸດພິເສດທີ່ຕັ້ງຂອງແຕ່ລະທ່າບົກ; ລະດົມຄວາມຄິດຄວາມເຫັນ ຕໍ່ທິດທາງການປັບປຸງໂຄງສ້າງລາຄາໄຟຟ້າ ແລະ ການພັດທະນາລະບົບສາຍສົ່ງແຫ່ງຊາດ, ໂຄງສ້າງລາຄາໄຟຟ້າໂດຍສະເພາະພາກອຸດສາຫະກຳ, ພາກປະເພດກະສິກຳ ທີ່ນຳໃຊ້ໃນປັດຈຸບັນເໝາະສົມແລ້ວ ຫຼືບໍ ແລະຄວນຈະປັບປຸງຄືແນວໃດ ເພື່ອບໍ່ໃຫ້ມີຜົນກະທົບຫຼາຍຕໍ່ຜູ້ຊົມໃຊ້ ແລະຜູ້ສະໜອງ ແລະສອດຄ່ອງກັບທ່າອ່ຽງການຂະຫຍາຍຕົວທາງດ້ານເສດຖະກິດ. ການພັດທະນາລະບົບສາຍສົ່ງໄຟຟ້າແຫ່ງຊາດຜ່ານມາລັດຖະບານກໍໄດ້ສຸມທຶນຮອນເຂົ້າໃສ່ໃນການພັດທະນາບໍ່ໜ້ອຍແຕ່ຍັງມີຫາງສຽງໃນສັງຄົມວ່າເປັນຫຍັງການລຳລຽງໄຟຟ້າຂອງພວກເຮົາຈຶ່ງບໍ່ທົ່ວເຖິງ, ບໍ່ສະຖຽນ, ຄຸນນະພາບບໍ່ສູງເຮັດໃຫ້ມີໄຟຟ້າດັບໄຟຟ້າມອດເປັນປະຈຳຢູ່ບາງເຂດ. ບາງບ່ອນມີເຂື່ອນແຕ່ບໍ່ມີສາຍສົ່ງບາງບ່ອນມີສາຍສົ່ງແຕ່ບໍ່ມີເຂື່ອນບັນຫາເກີດຂຶ້ນຍ້ອນສາເຫດອັນໃດ ແລະ ຄວນຈະມີວີທີການແກ້ໄຂຄືແນວໃດ?; ຮັບຟັງການລາຍງານກ່ຽວກັບການດຳເນີນທຸລະກິດຂອງລັດວິສາຫະກິດໄຟຟ້າຊຶ່ງກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ຜ່ານມາ ໄດ້ຮັບຮອງເອົາທິດທາງແຜນການປັບປຸງລັດວິສາຫະກິດແລ້ວ ໜຶ່ງໃນນັ້ນກໍມີລັດວິສາຫະກິດ ໄຟຟ້າລາວ, ການດຳເນີນທຸລະກິດຂອງລັດວິສາຫະກິດໄຟຟ້າຜ່ານມາ ກໍພົບຫຼາຍບັນຫາບໍ່ໜ້ອຍ, ການດຳເນີນທຸລະກິດຂາດທຶນແກ່ຍາວມາຫຼາຍປີ, ບັນຫາໄຟຟ້າເຫຼືອບໍ່ພໍ ແລະອື່ນໆ. ບັນຫາເກີດຂຶ້ນຍ້ອນສາເຫດອັນໃດ ແລະ ຄວນຈະມີວີທີການແກ້ໄຂຄືແນວໃດ?; ທັງໝົດນີ້ກໍເພື່ອເປັນຂໍ້ມູນພື້ນຖານໃຫ້ແກ່ສະພາແຫ່ງຊາດພິຈາລະນາ ແລະມີທິດຊີ້ນໍາ ເພື່ອສະເໜີໃຫ້ລັດຖະບານປັບປຸງວຽກງານດັ່ງ ກ່າວໃຫ້ມີປະສິດທິພາບ ປະສິດທິຜົນ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມ ຂອງປະເທດເຮົາໃນແຕ່ລະໄລຍະ. ໃນກອງປະຊຸມສຳມະນາຄັ້ງນີ້ ແມ່ນໄດ້ຮັບຟັງການສະເໜີລາຍງານ ຈາກກະຊວງໂຍທາທິການ ແລະຂົນສົ່ງ, ກະຊວງພະລັງງານ ແລະບໍ່ແຮ່, ກະຊວງການເງິນ ແລະກົມຕໍາຫຼວດກວດກາຄົນເຂົ້າ-ອອກເມືອງ ແລະການປະກອບຄວາມຄິດເຫັນຂອງກຳມາທິການທີ່ກ່ຽວຂ້ອງພາຍໃນສະພາແຫ່ງຊາດ.
(ຂ່າວ-ພາບ: ກຸກກິກ ບຸດດາໄຊ)

แชร์