ລັດ ເລັ່ງແກ້ໄຂແຮງງານລາວທີ່ເຮັດວຽກຢູ່ໄທແບບຜິດກົດໝາຍ

ອີງຕາມການເຫັນດີຂອງສອງຝ່າຍ ລາວ-ໄທ ເພື່ອໃຫ້ແຮງງານລາວທີ່ໄດ້ຮັບການຂຶ້ນທະບຽນຕາມມະຕິຄະນະລັດຖະມົນຕີ (ຄລມ) ຂອງປະເທດໄທໄດ້ຮັບອະນຸຍາດເຮັດວຽກຢ່າງຖືກຕ້ອງຕາມກົດໝາຍຂອງສອງປະເທດ, ຜູ້ອອກແຮງງານລາວໄດ້ຮັບການຕິດຕາມ, ຄຸ້ມຄອງ ແລະ ຊ່ວຍເຫລືອຕະຫລອດໄລຍະເວລາ 2 ປີ. ສປປ ລາວ ໄດ້ສົ່ງຄະນະຮັບຜິດຊອບແກ້ໄຂແຮງງານລາວໄປດໍາເນີນການອອກອະນຸມັດບັນຊີລາຍຊື່ ແລະຮວບຮວມເອກະສານເພື່ອສະເໜີປ່ຽນໜັງສືຜ່ານແດນໃຫ້ແຮງງານລາວທີ່ເຮັດວຽກຢູ່ປະເທດໄທແບບບໍ່ຖືກຕ້ອງໃຫ້ສາມາດອອກບັດອະນຸຍາດເຮັດວຽກ ແລະວີຊາເພື່ອສືບຕໍ່ເຮັດວຽກໄດ້ 2 ປີ.

ສຳລັບແຮງງານລາວຕາມມະຕິ (ຄຣມ) ຄື: ມະຕິ 29 ທັນວາ 2563; ມະຕິ 13 ກໍລະກົດ 2564; ມະຕິ 28 ກັນຍາ 2564 ແລະມະຕິ 5 ກໍລະກົດ 2565 ໃຫ້ໄປຂຶ້ນທະບຽນອະນຸມັດບັນຊີລາຍຊື່ ແລະສະເໜີປ່ຽນໜັງສືຜ່ານແດນນໍາໜ່ວຍງານແກ້ໄຂແຮງງານລາວ ຢູ່ທີ່ອາພາດເມັ້ນພົງພະນາ ຊຶ່ງຕັ້ງຢູ່ດ້ານຫລັງຂອງສະຖານເອກອັກຄະລັດຖະທູດແຫ່ງ ສປປ ລາວ ທີ່ບາງກອກ, ປະເທດໄທນັບແຕ່ວັນທີ 22 ກັນຍາ ເຖິງວັນທີ 04 ພະຈິກ 2022. ການປະກອບເອກະສານ ມີດັ່ງນີ້:
ສຳລັບ ກຸ່ມທີ່ມີໜັງສືຜ່ານແດນ ທີ່ບໍ່ໝົດອາຍຸການນໍາໃຊ້ຕາມກໍານົດການອະນຸຍາດໃຫ້ເຮັດວຽກແຕ່ວີຊາໝົດກໍານົດໃຫ້ມາຂຶ້ນທະບຽນອະນຸມັດບັນຊີລາຍຊື່ເອກະສານປະກອບ ມີດັ່ງນີ້: ສໍາເນົາໜັງສືຜ່ານແດນ01 ໃບ, ສໍາເນົາບັດອະນຸຍາດເຮັດວຽກ ຫລື ບັດ ທລ 38 ຫລື ໃບຂຶ້ນທະບຽນ 01 ໃບ, ສໍາເນົາບັດປະຊາຊົນ ແລະທະບຽນບ້ານຂອງນາຍຈ້າງ 01 ໃບ.

ສ່ວນກຸ່ມທີ່ມີໜັງສືຜ່ານແດນທີ່ມີອາຍຸການນໍາໃຊ້ຕໍ່າກວ່າກໍານົດການອະນຸຍາດໃຫ້ເຮັດວຽກຫລືໝົດອາຍຸ ແລະວີຊາໝົດກໍານົດໃຫ້ປະກອບເອກະສານດັ່ງນີ້: ໜັງສືຜ່ານແດນ ສະບັບຕົ້ນ (ສະບັບແທ້), ສໍາເນົາບັດປະຈໍາຕົວ (ບັດປະຊາຊົນ) ຫລື ສໍາມະໂນຄົວ 01 ຊຸດ, ສໍາເນົາບັດອະນຸຍາດເຮັດວຽກ ຫລື ບັດ ທລ 38 ຫລື ໃບຂຶ້ນທະບຽນ 01 ໃບ, ສໍາເນົາບັດປະຊາຊົນ ແລະທະບຽນບ້ານຂອງນາຍຈ້າງ 01 ຊຸດ, ຮູບຖ່າຍພື້ນສີຂາວ, ໃສ່ເສື້ອສູດ/ຄໍປົກ ທີ່ມີຂະໜາດ 4x6 cm 03 ໃບ.
ສະເພາະກຸ່ມທີ່ບໍ່ມີໜັງສືຜ່ານແດນ ໃຫ້ມາຂື້ນທະບຽນຮັບໃບເດີນທາງຊົ່ວຄາວ(ບັດເຫລືອງ) ເພື່ອເດີນທາງກັບຄືນ ສປປ ລາວ ໃນການປະກອບເອກະສານເຮັດໜັງສືຜ່ານແດນມາໃໝ່. ໃຫ້ປະກອບເອກະ ສານ ດັ່ງນີ້: ສໍາເນົາບັດປະຈໍາຕົວ(ບັດປະຊາຊົນ) ແລະ/ຫລື ສໍາມະໂນຄົວ ຫລື ສໍາເນົາໃບຢັ້ງຢືນທີ່ຢູ່ຈາກບ້ານທີ່ຕົນເອງອາໄສ ຢູ່ໃນປະເທດລາວ 01 ຊຸດ, ຮູບຖ່າຍພື້ນສີຂາວ, ໃສ່ເສື້ອສູດ/ຄໍປົກ ທີ່ມີຂະໜາດ 4x6 cm 03 ໃບ.

ໝາຍເຫດ: ກຸ່ມທີ 1 ແລະກຸ່ມທີ 2 ໃນກໍລະນີແຮງງານລາວບໍ່ສາມາດເຂົ້າມາດ້ວຍຕົນເອງແມ່ນໃຫ້ສົ່ງເອກະສານທີ່ກ່ຽວຂ້ອງໃຫ້ເຈົ້າໜ້າທີ່ທາງໄປສະນີ: (556 ຊອຍຣິດງາມ, ຖະໜົນປະຊາອຸທິດ, ແຂວງວັງທອງຫລາງ, ເຂດວັງທອງຫລາງ, ກຸງເທບມະຫານະຄອນ 10310).

ສໍາລັບຄ່າໃຊ້ຈ່າຍໃນການອອກອະນຸມັດບັນຊີລາຍຊື່, ຕິດຕາມ, ຄຸ້ມຄອງ ແລະຊ່ວຍເຫລືອ ຕະ ຫລອດໄລຍະ 2 ປີ ເປັນເງິນຈໍານວນ 3.500 ບາດ (ບໍ່ລວມຄ່າໃຊ້ຈ່າຍໃນການຂໍອະນຸມັດຕ່າງໆຈາກທາງການໄທ). ໃນກໍລະນີສະເໜີອອກໜັງສືຜ່ານແດນແມ່ນມີຄ່າໃຊ້ຈ່າຍເພີ່ມຕາມລະບຽບການ.
ຂ່າວ: ສຸກສະຫວັດ
ຂໍ້ມູນ-ພາບ: ຂ່າວສານ ຮສສ

แชร์