ນາຍົກລັດຖະມົນຕີ ຢ້ຽມຢາມ ສ ສິງກະໂປ ຢ່າງເປັນທາງການ

ໂດຍຕອບສະໜອງຕາມຄຳເຊີນຂອງ ທ່ານ ລີ ຊຽນ ລຸງ ນາຍົກລັດຖະມົນຕີ ແຫ່ງ ສາທາລະນະລັດ ສິງກະໂປ, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງໄດ້ເດີນທາງຢ້ຽມຢາມສາທາລະນະລັດສິງກະໂປຢ່າງເປັນທາງການໃນວັນທີ 27-28 ກັນຍາ 2022 ເພື່ອຮັດແໜ້ນ ແລະເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ມີມາແຕ່ດົນນານ ແລະການຮ່ວມມືທີ່ດີງາມ ລະຫວ່າງ ລາວ-ສິງກະໂປ ໃຫ້ແໜ້ນແຟ້ນຍິ່ງໆຂຶ້ນໃນຕໍ່ໜ້າ.

ພິທີຕ້ອນຮັບຢ່າງເປັນທາງການໄດ້ມີຂຶ້ນໃນຕອນເຊົ້າຂອງວັນທີ 28 ກັນຍາ 2022, ທີ່ທໍານຽບປະທານາທິບໍດີ Istana ໂດຍໃຫ້ກຽດຕ້ອນຮັບຈາກທ່ານນາຍົກລັດ ຖະມົນຕີ ລີ ຊຽນ ລຸງ ພ້ອມດ້ວຍພັນລະຍາ ແລະຄະນະ. ພ້ອມທັງໄດ້ພົບປະສອງຝ່າຍຊຶ່ງທ່ານ ພັນຄໍາ ວິພາວັນ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງໄດ້ສະແດງຄວາມຫວັງວ່າການຢ້ຽມຢາມສິງກະໂປໃນຄັ້ງນີ້ຈະເປັນຂີດໝາຍອັນສໍາຄັນໃນການເພີ່ມທະວີ ແລະຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ແລະທັງເປັນການຢືນຢັນຄືນເຖິງຄວາມມຸ່ງໝັ້ນຂອງລັດຖະບານ ແຫ່ງ ສປປ ລາວ ໃນການສົ່ງເສີມສາຍພົວພັນມິດຕະພາບ ແລະການຮ່ວມມືທີ່ດີລະຫວ່າງ ລາວ-ສິງກະໂປ ໃຫ້ໄດ້ຮັບການພັດທະນາຂຶ້ນເທື່ອລະກ້າວ.

ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະການຮ່ວມມືທີ່ດີລະຫວ່າງສອງປະເທດທີ່ໄດ້ຮັບການເສີມຂະຫຍາຍຂຶ້ນເລື້ອຍໆ ໂດຍສະເພາະແມ່ນການຮ່ວມມືສອງຝ່າຍທາງດ້ານການເມືອງ, ດ້ານການຄ້າ-ການລົງທຶນ, ດ້ານພະລັງງານ, ສິ່ງແວດລ້ອມ, ການສຶກສາ, ວັດທະນະທໍາ, ການທ່ອງທ່ຽວ, ເຕັກໂນໂລຊີ, ຂໍ້ມູນຂ່າວສານ, ເຕັກໂນໂລຊີດີຈິຕອນ ແລະ ດ້ານອື່ນໆ. ພ້ອມກັນນັ້ນ, ສອງຝ່າຍໄດ້ສະແດງຄວາມຊົມເຊີຍຕໍ່ກະຊວງອຸດສາຫະກໍາ ແລະການຄ້າ ແຫ່ງ ສິງກະໂປ ແລະ ສະພາການຄ້າ ແລະອຸດສາຫະກໍາແຫ່ງຊາດລາວທີ່ຈະໄດ້ຈັດສໍາມະນານັກທຸລະກິດຂຶ້ນ ໃນໂອກາດຢ້ຽມຢາມຄັ້ງນີ້, ເຊິ່ງເປັນການເຜີຍແຜ່ນະໂຍບາຍດ້ານການລົງທຶນ ຂອງສອງປະເທດ, ນໍາສະເໜີກາລະໂອກາດການເຮັດທຸລະກິດ ແລະການລົງທຶນຢູ່ປະເທດຂອງກັນ ແລະກັນທັງເປັນການສ້າງໂອກາດພົບປະແລກປ່ຽນລະຫວ່າງເຈົ້າໜ້າທີ່ ແລະນັກທຸລະກິດຮ່ວມກັນແນໃສ່ຊຸກຍູ້ການຄ້າ ແລະການລົງທຶນລະຫວ່າງສອງປະເທດໃຫ້ຂະຫຍາຍຕົວ ແລະ ມີປະສິດທິຜົນດີຍິ່ງໆຂຶ້ນ. ຕົວເລກການລົງທຶນຂອງສິງກະໂປ ຢູ່ ສປປ ລາວ ມີມູນຄ່າ 362 ລ້ານໂດລາສະຫະລັດ ລວມມີ 83 ໂຄງການ, ຊຶ່ງຈັດເປັນອັນດັບທີ 10 ຂອງການລົງທຶນຕ່າງປະເທດ ຢູ່ ສປປ ລາວ. ສໍາລັບ ມູນຄ່າການຄ້າສອງຝ່າຍ, ໃນປີ 2021 ມີ 115,9 ລ້ານໂດລາສະຫະລັດ, ສປປ ລາວ ສົ່ງອອກມີມູນຄ່າປະມານ 90,9 ລ້ານໂດລາສະຫະລັດ ແລະ ນໍາເຂົ້າປະມານ 52 ລ້ານໂດລາສະຫະລັດ. ນອກຈາກນັ້ນ, ສອງຝ່າຍຍັງໄດ້ປຶກສາຫາລື ແລະແລກປ່ຽນຄໍາຄິດເຫັນກ່ຽວກັບສະພາບການພົ້ນເດັ່ນໃນພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ.

ໃນໂອກາດດຽວນີ້, ທ່ານ ພັນຄໍາ ວິພາວັນ ກໍສະເໜີຕໍ່ ທ່ານ ລີ ຊຽນ ລຸງ ເພື່ອຊຸກຍູ້ໃຫ້ນັກລົງທຶນສິງກະໂປເຂົ້າມາລົງທຶນ ຢູ່ ສປປ ລາວ ໃຫ້ນັບມື້ນັບຫລາຍຂຶ້ນໃນຂະແໜງການທີ່ສອງຝ່າຍມີທ່າແຮງເປັນຕົ້ນຂົງເຂດບໍລິການປິ່ນອ້ອມໂລຈິດສະຕິກກໍຄື ໃນ 9 ຂະແໜງການທີ່ ສປປ ລາວ ໄດ້ສົ່ງເສີມ ແລະໃຫ້ນະໂຍບາຍພິເສດ ຄື: ຂະແໜງການຄົ້ນຄວ້າວິໄຈທີ່ນໍາໃຊ້ເຕັກໂນໂລຊີສູງທີ່ທັນສະໄໝ, ຂະແໜງກະສິກໍາສະອາດປອດສານພິດ, ອຸດສາຫະກໍາປຸງແຕ່ງຜະລິດຕະພັນກະສິກໍາ,ການພັດທະນາອຸດສາຫະກໍາທ່ອງທ່ຽວ, ການສຶກສາ, ສາທາລະນະສຸກ,ການພັດທະນາພື້ນຖານໂຄງລ່າງ, ທະນາຄານນະໂຍບາຍ-ສະຖາບັນການເງິນ ແລະສູນການຄ້າທີ່ທັນສະໄໝ. ພ້ອມດຽວກັນນັ້ນ, ທ່ານ ພັນຄໍາ ວິພາວັນ ກໍໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ສິງກະໂປ ທີ່ໄດ້ໃຫ້ການຊ່ວຍເຫລືອ ສປປ ລາວ ຕະຫລອດມາ ໂດຍສະເພາະແມ່ນວຽກງານສົ່ງເສີມຂີດຄວາມສາມາດໃຫ້ແກ່ພະນັກງານລັດ, ດ້ານການພັດທະນາຊັບພະຍາກອນມະນຸດ, ການສະໜອງທຶນການສຶກສາ ແລະທຶນຝຶກອົບຮົບ,ການສົ່ງອາສາສະໝັກມາຊ່ວຍເຫລືອວຽກຊຸມຊົນ,ການຊ່ວຍເຫລືອໃນໄລຍະເກີດໄພພິບັດສັນຄູກັ້ນນໍ້າເຊປຽນ-ເຊນໍ້ານ້ອຍແຕກ ທີ່ແຂວງອັດຕະປືລວມທັງການຊ່ວຍເຫລືອໃນການສະກັດກັ້ນ ແລະປ້ອງກັນການແພ່ລະບາດຂອງພະຍາດໂຄວິດ-19 ຢູ່ໃນ ສປປ ລາວ. ນອກຈາກນີ້, ທ່ານ ພັນຄໍາ ວິພາວັນ ຍັງໄດ້ແຈ້ງວ່າ ສປປ ລາວ ກຽມພ້ອມທີ່ຈະຮ່ວມມືກັບສິງກະໂປ ແລະປະເທດສະມາຊິກອາຊຽນອື່ນໆ ເພື່ອສືບຕໍ່ຮັດແໜ້ນປະຊາຄົມອາຊຽນໃຫ້ເຂັ້ມແຂງໂດຍສະເພາະການເປັນປະທານອາຊຽນໃນປີ 2024ຂອງ ສປປ ລາວ ພ້ອມທັງໄດ້ສະແດງຄວາມຂອບໃຈຕໍ່ ລັດຖະບານສິງກະໂປ ທີ່ໄດ້ໃຫ້ການຮ່ວມມື ແລະ ຊ່ວຍເຫລືອ ສປປ ລາວ ໃນຂອບວຽກອາຊຽນ ໂດຍສະເພາະການປະກາດໃຫ້ການຊ່ວຍເຫລືອແກ່ການເປັນປະທານອາຊຽນຂອງ ສປປ ລາວ ໃນປີ 2024. ພ້ອມດຽວກັນນີ້, ທ່ານຍັງໄດ້ເຊື້ອເຊີນ ທ່ານ ລີ ຊຽນ ລຸງ ເດີນທາງຢ້ຽມຢາມ ສປປ ລາວ ໃນໂອກາດທີ່ສະດວກ, ເຊິ່ງທ່ານນາຍົກລັດຖະມົນຕີ ສິງກະໂປ ກໍໄດ້ສະແດງຄວາມຂອບໃຈຕໍ່ການເຊື້ອເຊີນດັ່ງກ່າວ ແລະຈະເດີນທາງໄປຢ້ຽມຢາມທາງການທີ່ ສປປ ລາວ ໃນໂອກາດທີ່ສະດວກ.

ພາຍຫລັງສໍາເລັດການພົບປະສອງຝ່າຍ, ທັງສອງນາຍົກລັດຖະມົນຕີໄດ້ຮ່ວມກັນເປັນສັກຂີພິຍານການລົງນາມບົດບັນທຶກຄວາມເຂົ້າໃຈ 4 ສະບັບ ຄື: ບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສ ສິງກະໂປ; ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານປ້ອງກັນສິ່ງແວດລ້ອມ, ການປ່ຽນແປງດິນຟ້າອາກາດ ແລະການບໍລິຫານຈັດສັນຊັບພະຍາກອນທາງນໍ້າ; ບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນຂົງເຂດເຕັກໂນໂລຊີ, ຂໍ້ມູນຂ່າວສານ ແລະເຕັກໂນໂລຊີດີຈິຕອນ ແລະບົດບັນທຶກຄວາມເຂົ້າໃຈວ່າດ້ວຍ ການຮ່ວມມືດ້ານພະລັງງານ.

ໃນໂອກາດຢ້ຽມຢາມ ສິງກະໂປ ຄັ້ງນີ້, ທ່ານ ພັນຄໍາ ວິພາວັນ ຍັງໄດ້ເປັນກຽດຂຶ້ນກ່າວເປີດກອງປະຊຸມພົບປະພາກທຸລະກິດລາວ-ສິງກະໂປ, ພ້ອມທັງໄດ້ຢ້ຽມຢາມ ໂຮງຮຽນວິຊາຊີບ ນັນຢາງໂພລີເທັກນິກ(Nanyang Polytechic) ແລະ ຍັງໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ທາມັນ ຊັນມູກາຣັດນັນ (Tharman Shanmugaratnam) ລັດຖະມົນຕີອາວຸໂສ, ລັດຖະມົນຕີປະສານງານດ້ານນະໂຍບາຍສັງຄົມ ແຫ່ງ ສ ສິງກະໂປ ອີກດ້ວຍ ແລະນໍາພາຄະນະໄປຢ້ຽມຊົມສວນພຶກສາຊາດສິງກະໂປ (National Garden, Singapore Botanic Garden) ເພື່ອຕັ້ງຊື່ດອກໄມ້ຕາມປະເພນີທີ່ເຄີຍປະຕິບັດຂອງຝ່າຍສິງກະໂປ.
ຂ່າວ: ກົມການຂ່າວ, ກະຊວງການຕ່າງປະເທດ
ພາບ: ກົມປະຊາສໍາພັນ, ຫສນຍ

แชร์