ສະຫຼອງວັນຕ້ານພະຍາດວໍ້ໂລກ

ພິທີໂຮມຊຸມນຸມສະເຫຼີມສະຫຼອງວັນຕ້ານພະຍາດວໍ້ໂລກປີນີ້ພາຍໃຕ້ຄໍາຂວັນ ”ຮ່ວມແຮງຮ່ວມໃຈກັນຕ້ານພະຍາດວໍ້ເພື່ອບໍ່ໃຫ້ມີຜູ້ເສຍຊີວິດ” ຈັດຂຶ້ນໃນວັນທີ 28 ກັນຍາ 2022 ທີ່ສວນສາທາລະນະເຈົ້າຟ້າງຸ່ມນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ນາງ ຣັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ; ທ່ານ Matthew Scott SHORTUS, HTM/NTD Team Leader ອົງການອະນາໄມ; ມີທ່ານຫົວໜ້າກົມລ້ຽງສັດ ແລະ ການປະມົງ, ກະຊວງກະສິກຳ ແລະປ່າໄມ້; ຜູ້ຕາງໜ້າອົງການອາຫານ ແລະການກະເສດ (FAO) ປະຈໍາລາວພ້ອມດ້ວຍພະນັກງານສັດຕະວະແພດ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຣັດສະໝີ ວົງຄໍາຊາວ ໄດ້ກ່າວວ່າ: ການຈັດໂຮມຊຸມນຸມວັນຕ້ານພະຍາດວໍ້ໂລກແມ່ນໄດ້ຈັດຂຶ້ນໃນວັນທີ 28 ເດືອນກັນຍາ ຂອງທຸກໆປີ, ເພື່ອໃຫ້ຄວາມຮູ້ ແລະ ຂໍ້ມູນຂ່າວສານແກ່ປະຊາຊົນໄດ້ຮັບຮູ້ ແລະເຂົ້າໃຈເພື່ອນໍາໄປປະຕິບັດໃຫ້ຖືກຕ້ອງແກ່ຄອບຄົວ ຫຼືຊຸມຊົນທີ່ຕົນອາໄສຢູ່. ວັນຕ້ານພະຍາດວໍ້ໂລກແມ່ນໄດ້ມີການຕັ້ງຂຶ້ນ ໂດຍສູນປ້ອງກັນ ແລະຄວບຄຸມພະຍາດຕິດຕໍ່ ແລະ ສະມາຄົມໂລກເພື່ອການຄວບຄຸມພະຍາດວໍ້ ໃຫ້ພາກສ່ວນຕ່າງໆທີ່ກ່ຽວຂ້ອງໄດ້ມີສ່ວນຮ່ວມໃນການກັນ ແລະ ຄວບຄຸມພະຍາດວໍ້, ພະຍາດວໍ້ເປັນພະຍາດຕິດຕໍ່ຮ້າຍແຮງຊະນິດໜຶ່ງຊຶ່ງຕິດຕໍ່ຈາກສັດສູ່ຄົນ, ສາເຫດເກີດຈາກເຊື້ອ Rabies virus, ສາຍພັນ Lyssa virus, ເຊື້ອພະຍາດດັ່ງກ່າວ ຍັງສາມາດຕິດຕໍ່ໃສ່ສັດເລືອດອຸ່ນທຸກຊະນິດເຊັ່ນ: ໝາ, ແມວ, ງົວ, ຄວາຍ, ລີງ, ຊະນີ, ກະຮອກ, ກະແຕ, ເສືອ, ໝີ, ໜູ ແລະ ເຈຍ ລວມທັງຄົນເຮົາ. ການຕິດເຊື້ອຜ່ານທາງນ້ຳລາຍຂອງສັດທີ່ເປັນພະຍາດວໍ້ເຂົ້າສູ່ບາດແຜ ດ້ວຍການຖືກສັດກັດ ຫຼືຄູດ, ເລຍ ໂດຍນໍ້າລາຍກະເດັນເຂົ້າທາງຜີວໜັງທີ່ມີບາດແຜ, ທາງຕາ ຫຼື ທາງປາກ. ການລະບາດຂອງພະຍາດວໍ້ ສ່ວນໃຫຍ່ແມ່ນໃນປະເທດທີ່ດ້ອຍພັດທະນາ ແລະ ປະເທດທີ່ກໍາລັງພັດທະນາໃນຂົງເຂດທະວີບອາຊີ ແລະອາຟຣິກາ, ພາຫະນະນຳເຊື້ອທີ່ສຳຄັນແມ່ນສັດເລືອດອຸ່ນທຸກຊະນິດທີ່ເປັນສັດລ້ຽງລູກດ້ວຍນໍ້ານົມ (ຈຳພວກສັດກັດແຫ້ນ), ໂດຍສະເພາະແມ່ນໝາ, ພະຍາດດັ່ງກ່າວນີ້ໄດ້ມີລາຍງານມາແຕ່ດົນນານແລ້ວວ່າເປັນນັກຂ້າມະນຸດຊຶ່ງໃນແຕ່ລະປີມີຄົນເສຍຊີວິດຍ້ອນພະຍາດວໍ້ປະມານ 59.000 ຄົນຕໍ່ປີ ໃນນີ້ 95% ແມ່ນຢູ່ອາຟຣິກາ ແລະ ອາຊີ, ຄົນເສຍຊີວິດສ່ວນຫຼາຍແມ່ນຍ້ອນຖືກໝາກັດ, ປະມານ 30 ຫາ 60 ເປີເຊັນ ຂອງຜູ້ທີ່ໄດ້ຮັບຜົນກະທົບຖືກໝາກັດ ແມ່ນເດັກນ້ອຍລະຫວ່າງ 5 ຫາ 14 ປີ. ອັດຕາການຕາຍຍ້ອນເປັນພະຍາດວໍ້ ແມ່ນ 100%. ເຖິງວ່າມີຢາວັກຊິນກັນພະຍາດວໍ້ທີ່ມີຄຸນນະພາບ ແລະ ຄວາມປອດໄພສູງ, ແຕ່ການນໍາໃຊ້ວັກຊິນແມ່ນຍັງຢູ່ໃນລະດັບຕໍ່າໃນປະເທດກຳລັງພັດທະນາເນື່ອງຈາກວ່າລາຄາແພງ. ໃນ ສປປ ລາວ ແມ່ນໄດ້ຮັບຜົນກະທົບຈາກພະຍາດວໍ້ຕະຫຼອດມາ ແລະ ມີຂໍ້ມູນລາຍງານຈາກຄົນຖືກໝາກັດ ແລະພົບເຊື້ອໄວຣັດວໍ້ ໃນຕົວຢ່າງຂອງແຕ່ລະປີ, ໄດ້ຮັບການລາຍງານຈາກບາງແຂວງຫາສູນວິເຄາະ ແລະລະບາດວິທະຍາທີ່ມີໂຕເລກສະສົມແຕ່ປີ 2012 ຫາ ວັນທີ 4 ເດືອນ ກັນຍາ 2022 ໃຫ້ເຫັນວ່າ: ມີກໍລະນີທີ່ຖືກສັດມີທັງໝົດ 318 ຄົນ ແລະເສຍຊີວິດ 59 ຄົນ.

ພາຍໃນພິທີ, ໄດ້ມີກິດຈະກໍາສັກຢາກັນພະຍາດວໍ້ໃຫ້ສັດລ້ຽງປະເພດໝາ ແລະແມວໂດຍບໍ່ເສຍຄ່າ ແລະກິດຈະກຳຖາມ-ຕອບຂອງນ້ອງນັກສຶກສາ, ເລີ່ມແຕ່ເວລາ 9:30 – 16:00 ໂມງ ເຊີນຊວນປະຊາຊົນນຳເອົາສັດລ້ຽງຂອງຕົນມາສັກຢາວັກຊິນກັນພະຍາດວໍ້ໃຫ້ຄົບຕາມຄຳແນະນຳຂອງພະນັກງານສັດຕະວະແພດ.
ຂ່າວ: ຍຸພິນທອງ, ພາບ: ບຸນອູ້ມ

แชร์